រាជធានីភ្នំពេញ ៖ ទោះបីជាមតិមួយចំនួនបានលើកឡើងថាបច្ចេកវិទ្យាបានធ្វើឲ្យប៉ះពាល់ដល់យុវជនខ្លះៗ ជាពិសេសក្មេងៗយុវវ័យដែលហាក់ប្រើប្រាស់បច្ចេកវិទ្យា ដើម្បីលួច(hack) យក Facebook Account ឬ ការបោកប្រាស់តាមប្រព័ន្ធបណ្តាញសង្គមផ្សេងៗ ឬក៏ប្រើប្រាស់ស្មាតហ្វូនដើម្បីមើលនូវកម្មវិធីអាសអាភាសមួយចំនួនក៏ដោយ តែគឺមានក្នុងចំនួនតិចតូច។ ជាមួយគ្នានោះផងដែរ សង្គមស៊ីវិលយល់់ឃើញថា បច្ចេកវិទ្យាទំនើបមិនប៉ះពាល់ដល់អ្នកប្រើប្រាស់នោះទេ ផ្ទុយទៅវិញប្រព័ន្ធអប់រំទេ ដែលធ្វើឲ្យយុវជនមិនទាន់យល់ដឹងបានច្រើនទៅវិញ។
អ្នកស្រី រស់ សុភាព ប្រធានអង្គការយេនឌ័រ និងអភិវឌ្ឍន៍ដើម្បីកម្ពុជា (GADC) បាន លើកឡើងកាលពីពេលថ្មីៗនេះថា ការប្រើប្រាស់បច្ចេវិទ្យាទំនើប ឬហៅស្មាតហ្វូន មានគុណសម្បត្តិច្រើន បើសិនយើងចេះគ្រប់គ្រងវាក្នុងការប្រើប្រាស់ ។ វាប្រផ្តល់ប្រយោជន៍ដល់មនុស្សគ្រប់វ័យមានភាពងាយស្រួលទទួលបានសេវាល្អ។
អ្នកស្រីបានបញ្ជាក់ថា «ខ្ញុំបានឮមនុស្សជាច្រើនថាការប្រើប្រាស់ស្មាតហ្វូនមានលក្ខណៈល្អ ក៏ប៉ុន្តែក៏មានមនុស្សមួយចំនួនថាការប្រើប្រាស់ស្មាតហ្វូនមិនល្អទេធ្វើឲ្យក្មេងខូច។ សម្រាប់ទស្សនៈខ្ញុំ ទោះបីជាយើងទប់វាមិនឲ្យមានពិបាកបន្តិច ប៉ុន្តែអ្វីដែលយើងត្រូវប្រយ័ត្នយើងត្រូវធ្វើយ៉ាងម៉េចឲ្យប្រជាពលរដ្ឋទទួលបានការអប់រំមួយដែលមានសក្តានុពលក្នុងការសម្រេចដោយខ្លួនឯង ថាអ្វីទៅស និងអ្វីខ្មៅ អ្វីអាក្រក់ និងអ្វីដែលល្អ និងព័ត៌មានអ្វីដែលគាត់យកមកសិក្សា វិភាគ ហើយព័ត៌មានអ្វីដែលមិនល្អ»។
អ្នកស្រីប្រធានក៏បានសង្កត់ធ្ងន់ថា «យើងមិនអាចបន្ទោសក្មេង និងបន្ទោសសម្ភារៈទេ ព្រោះចង់ ឬមិនចង់ សម្ភារៈទំនើប បចេ្ចកវិទ្យាទំនើបវាបានកើតនៅក្នុងពិភពលោកយើងនេះហើយ ។ បើសិនគាត់មិនបានចេះប្រើបច្ចេកវិទ្យាទំនើបនឹងគឺស្មើនឹងគាត់ដើរថយក្រោយ ។ អីចឹងជីវិតរស់នៅដើម្បីដើរឲ្យទាន់សង្គម គឺយើងមិនអាចដើរថយក្រោយបានទេ»។
ដើម្បីឲ្យទាន់សង្គមអ្នកស្រីបានលើកឡើងថាសង្គមមានប្រព័ន្ធអប់រំជាដើមគឺត្រូវធ្វើការអប់រំប្រជាពលរដ្ឋឲ្យមានការទទួលខុសត្រូវ និងយល់ដឹងថាអ្វីដូម្តេចត្រូវ ធ្វើបែរណាខុស។ អ្នកស្រីបានបន្ថែមថា «ខ្ញុំមើលឃើញថាមានក្មេងមួយចំនួនយល់ដឹងច្បាស់ពីផលប្រយោជន៍នៃបច្ចេកវិទ្យាទំនើប ដោយគាត់ប្រើប្រាស់វាមានផលប្រយោជន៍សម្រាប់ជីវិតរបស់គាត់»។ ជាមួយគ្នានោះដែរអ្នកស្រីក៏បានបញ្ជាក់ចំពោះការមើលរឿងអាសអាភាសរបស់យុវជនថាករណីនេះមិនមានជារឿងមិនល្អទាំងអស់នោះទេ ប៉ុន្តែសំខាន់នោះបុគ្គលមាន ការទទួល ខុសត្រូវច្បាស់លាស់ឬទេ នៅពេលគាត់បានមើលរឿងអាសអាភាស់នោះ។
អ្នកស្រីបានញ្ជាក់ថា «ករណីនេះខ្ញុំចង់សំដៅទៅលើប្រព័ន្ធអប់រំ គឺបើសិនយើង មានប្រព័ន្ធអប់រំរឹងមាំនឹងធ្វើឲ្យប្រជាពលរដ្ឋ ចាប់ពីកុមារទៅចេះគ្រប់គ្រងខ្លួន និងដឹងថាអ្វីល្អ ហើយអ្វីមិនល្អ ។ យើងមិនអាចទប់ទល់ជំនូសគាត់បានទេ អីចឹងយើងត្រូវធ្វើយ៉ាងណាឲ្យគាត់ចេះ ទប់ទល់អារម្មណ៍របស់គាត់ ហើយគាត់សម្រេចថាមើល ឬមិនមើល (រឿងអាសអាភាសហ្នឹង) »។ អ្នកស្រីបន្ថែមថាប្រសិនបើប្រព័ន្ធអប់រំល្អវិញ គឺក្មេងអាយុ១០ ឆ្នាំអាចដឹងថាផ្នែកនេះ (រឿងអាសអាភាស់ ) មិនគប្បីមើលនោះទេ ដោយសារវាមិនល្អសម្រាប់ខ្លួន។ តែបើក្នុងវ័យរបស់គាត់ (វ័យកណ្តាល) នេះដែរគាត់មើលដើម្បីអប់រំខ្លួនគាត់ គឺល្អ ដោយមើលមិនធ្វើឲ្យបញ្ហាអូសទាញនោះទេ ។ រឿងបច្ចេកវិទ្យាទំនើបនិងការមើលរឿងអាសអាភាស់នេះដែរនៅក្នុងកម្មវិធីសិក្សាគួរមានការពិភាក្សាគ្នាដើម្បីឲ្យសិស្សានុសិស្សសិក្សបានយល់ដឹងឲ្យច្បាស់ ។ ផ្ទុយទៅវិញបើសិនយើងនិយាយរឿងនឹង (អាសអាភាស់) ក្មេងមិនត្រូវមើលមិនត្រូវដឹងនោះទេ ។
អ្នកស្រី រស់ សុភាព បានបញ្ជាក់ថា «គាត់មិនត្រូវអនុវត្តក្នុងការរួមភេទនៅក្មេងទេ ប៉ុន្តែប្រព័ន្ធ អប់រំពន្យល់គាត់ថារឿងនឹងយ៉ាងម៉េចថាគាត់មិនត្រូវទេ ព្រោះថាស្ថិតនៅក្រោម ច្បាប់មួយ។ ទាល់តែគាត់មានអាយុប៉ុណ្ណេះ ទើបធ្វើទៅបាន។ តើប្រព័ន្ធអប់រំត្រូវធ្វើបែបម៉េច ដើម្បីឲ្យក្មេង នឹងមានស្មារតីល្អ ? ខ្ញុំមិនចង់បន្ទោសក្មេងនោះទេ តែខ្ញុំចង់មើលប្រព័ន្ធអប់រំរបស់ យើងថារឹង មាំប៉ុន្មាន ហើយធ្វើឲ្យសិស្សានិសិស្សបានចេះគ្រប់គ្រងអារម្មណ៍របស់គាត់ ក្នុងការយល់ ដឹងពីចំណេះដឹង»។ ចំពោះករណីរំលោភសម្លាប់ ក្នុងនោះក៏មានករណីក្មេងស្រីតូចៗ ដែលកើ តក្នុងសង្គមនាបច្ចុប្បន្នត្រូវអ្នកស្រីប្រធានអង្កការអះអាងថាមិនមានកើតពីបច្ចេកវិទ្យាទំនើបនោះទេ គឺមកពីប្រព័ន្ធគ្រប់គ្រងផ្នែកច្បាប់នៅប្រទេសនិមួយៗមិនបានអនុវត្តត្រឹមត្រូវ ព្រោះថានៅ ពេលរំលោភ និងសម្លាប់ហើយសង្គមភាពច្រើនតែងតែបន្ទោសជនរងគ្រោះថាស្លៀកពាក់ស៊ិចស៊ី ។ តែយើងឃើញថាអ្នកដែលគេរំលោភកន្លងមកមិនមែនស្លៀកពាក់ស៊ិចស៊ីឯណា ។ ជួនកាលគាត់នៅក្មេង ហើយគាត់ស្លៀកពាក់ជិត តែហេតុអ្វីបានជនល្មើសទៅរំ លោភហើយសម្លាប់គាត់ហើយបែរជាអ្នកផងទាំងពូងបន្ទោសជនរងគ្រោះទៅវិញ។
លោក រឿន ភិរុន វ័យ២៦ឆ្នាំ ជានិស្សិតសាកលវិទ្យាល័យមួយនៅក្នុងរាជធានីភ្នំពេញ បាននិយាយថា ការប្រើប្រាស់ប្រព័ន្ធបច្ចេកវិទ្យា ឬហៅថាប្រព័ន្ធឌីជីថល មានសារៈសំខាន់ណាស់ នៅសម័យបច្ចុប្បន្ន ព្រោះថាធ្វើឲ្យយុវជនមើលបានវែងឆ្ងាយ ។ លោកបានបញ្ជាក់ថា «ស្មាតហ្វូននៅលើកដៃយើង យើងអាចមើកឃើញនៅទូទាំងពិភព លោក តាមរយៈប្រព័ន្ធព័ត៌មានវិទ្យាហ្នឹង។ គឺយើងអាចតាមដាន រឿងផ្សេងៗពាក់ព័ន្ធនឹងការអ ប់រំ ការកម្សាន្ត និងចំណេះវិជ្ជាទូទៅផ្សេងផងដែរ»។ លោក ភិ រុន ក៏បានអះអាងផ្ទុយពីគុណសម្បត្តិ គឺគុណវិបត្តរបស់យុវជនក្នុងការប្រើប្រាស់បច្ចេកវិទ្យាទំនើបនឹង ក៏ធ្វើឲ្យប៉ះពាល់ដល់យុវជនផងដែរនៅពេលយុវជន មិនយល់ពីសារៈសំខាន់ ចំពោះការប្រើប្រាស់ប្រព័ន្ធបច្ចេកវិទ្យានេះ។ដូចជាពួកគេ ប្រើប្រាស់បច្ចេកវិទ្យានេះគ្មានប្រយោជន៍ដូចជាមើលរឿងអាសអាភាស៍ ឬផ្លូវភេទជាដើម្បីនោះនឹងធ្វើឲ្យប៉ះពាល់ដល់ផ្នែកសតិអារម្មណ៍ ។ ជាងនេះប្រសិនបើពូកគេមើលហើយគ្មានការពិចារណាវែងឆ្ងាយនោះនឹងអាចបង្ករឲ្យមានករណីរំលោភសម្លាប់ និងករណីផ្សេងៗទៀតដែលបានកើតឡើងក្នុងសង្គមកម្ពុជាពេលកន្លងមក។
យុវជនដែលក៏បានបន្ថែមថាករណីរំលោភ សម្លាប់នេះដែរមិនមានការកើត ឡើងច្រើននោះទេ។ ប៉ុន្តែប្រសិនបើខ្វះការអប់រំ ក៏ធ្វើឲ្យយុវជនមួយចំនួនបានអនុវ ត្តទង្វើរបស់គេតាមអារម្មណ៍ ឬតណ្ហារបស់គេនៅពេលគេមិនបានគិតថាទង្វើ របស់ពួកគេនឹងប៉ះពាល់គ្រួសារ កិត្តសយ និងសង្គមជាតិ។ លោកបញ្ជាក់ «ការអប់រំសំខាន់ណាស់ ពោលគឺនៅពេលគេនៅលើកប្រព័ន្ធបច្ចេកវិទ្យា ឬអនឡាយ យើងអប់រំគេនឹងឆាប់ទៅដល់ដៃគេ។ ក្រៅពីនេះគួរចុះផ្សព្វផ្សាយតាមសាលារៀន សហគមន៍ ទាក់ទងការប្រើប្រាស់បច្ចេកវិទ្យាបែបណាឲ្យមានប្រយោជន៍ តាមប្រភពណាព័ត៌មានប្រភេទណាមានប្រយោជន៍ ហើយព័ត៌មានណាអត់ប្រយោជន៍បង្កបញ្ហាអ្វីខ្លះ?នៅក្នុងសង្គមខ្លួនឯង និងគ្រួសារ ពិសេសនោះផលប្រយោជន៍ចំពោះយុវជនម្នាក់ៗតែម្តង»៕ កែសម្រួលដោយ ៖សុឃាក់
ចែករំលែកព័តមាននេះ