ខេត្តកំពត ៖ ស្នងការដ្ឋាននគរបាលខេត្តកំពតបានប្រមូលអាវុធខូចគុណភាពប្រើការមិនកើតពីតាមបណ្ដាក្រុង និងស្រុកទាំង៨ទូទាំងខេត្តកំពត មានចំនួនសរុប១៣៩២ដើមយកមករក្សាទុកក្នុងឃ្លាំង រង់ចាំទទួលបទបញ្ជាពីថ្នាក់លើ និងគ្រោងដឹកយកទៅកិនកំទិចចោលនៅចុងខែសីហាពេលខាងមុខនេះ ។
បើយោងតាមការអោយដឹងពីមន្ត្រីនគរបាលការិយាល័យអាវុធជាតិផ្ទុះខេត្តកំពតបានឱ្យដឹងអោយដឹងកាលពីព្រឹកថ្ងៃទី១៩ សីហា កន្លងទៅនេះថា អាវុធតូចធំនៅតាមបណ្ដាក្រុងស្រុកទាំង៨ក្នុងខេត្តកំពត ដោយពិនិត្យឃើញថា មានកាំភ្លើងខូចគុណភាពចំនួន១៣៩២ដើម ត្រូវបាននគរបាលជំនាញដឹកមករក្សាទុកក្នុងឃ្លាំងអស់ហើយ។
តាមប្រភពដដែលបានបន្តថា អាវុធតូចធំខាងលើរួមមាន អាវុធធុន M16 ចំនួន១០២ដើម, អាវុធធុន៨០មីល្លីម៉ែត្រ ចំនួន១ដើម, អាវុធធុនM79 ចំនួន១៥ដើម, កាំភ្លើងយន្ត ចំនួន៤ដើម, អាវុធធុន៦០មីល្លីម៉ែត្រ ចំនួន៦ដើម និងអាវុធធុន B40 ចំនួន៥៣ដើម ក្រៅពីនោះមានអាវុធAK និងអាវុធអឹមសី។
តាមប្រភពដដែលបានបន្តទៀតថា អាវុធធុនតូចធមដែលពិនិត្យឃើញថាខូចគុណភាពទាំង នោះបានរៀបចំរួចរាល់អស់ហើយ រង់ចាំតែទទួលបទបញ្ជាពីថ្នាក់លើតែប៉ុណ្ណោះនឹងត្រូវដឹកចេញពីស្នងការទៅកិនកម្ទេចចោល ទំនងជាធ្វើការកិនកម្ទេចចោលនៅខេត្តកំពង់ស្ពឺ ៕ (កែសម្រួលដោយ ៖ ធីតា)
ចែករំលែកព័តមាននេះ