ខេត្តកណ្តាល ៖ បើតាមសេចក្តីរាយការណ៍បឋមបានឱ្យដឹងថា មានករណីឆបោកម៉ូតូមួយគ្រឿងបង្កឱ្យមានការភ្ញាក់ផ្អើលដល់សមត្ថកិច្ចស្រុកកៀនស្វាយ ឃាត់ខ្លួនបានជនសង្ស័យម្នាក់ជាក្មេងស្រី និងបន្តស្រាវជ្រាវរកមុខជនសង្ស័យពីរនាក់ទៀតដែលកំពុងរត់គេចខ្លួន បន្ទាប់ពីផ្សំគំនិតឆបោកម៉ូតូ ហេតុការណ៍នេះកើតឡើងកាលពីម៉ោង៥និង៣០នាទីល្ងាច ថ្ងៃទី១៨ ខែសីហា…
ខេត្តកណ្តាល ៖ បើតាមសេចក្តីរាយការណ៍បឋមបានឱ្យដឹងថា មានករណីឆបោកម៉ូតូមួយគ្រឿងបង្កឱ្យមានការភ្ញាក់ផ្អើលដល់សមត្ថកិច្ចស្រុកកៀនស្វាយ ឃាត់ខ្លួនបានជនសង្ស័យម្នាក់ជាក្មេងស្រី និងបន្តស្រាវជ្រាវរកមុខជនសង្ស័យពីរនាក់ទៀតដែលកំពុងរត់គេចខ្លួន បន្ទាប់ពីផ្សំគំនិតឆបោកម៉ូតូ ហេតុការណ៍នេះកើតឡើងកាលពីម៉ោង៥និង៣០នាទីល្ងាច ថ្ងៃទី១៨ ខែសីហា ឆ្នាំ២០១៩ ចំណុចរមណីយដ្ឋានកៀនស្វាយក្រៅ ស្ថិតក្នុងភូមិភូមិធំ ឃុំភូមិឃុំ ស្រុកកៀនស្វាយ ខេត្តកណ្តាល ។
សេចក្តីរាយការណ៍បន្តថា ជនសង្ស័យខាងលើមាន៣នាក់ ទី១-ឈ្មោះ ហង្ស សុខចេង ភេទស្រីអាយុ១៦ឆ្នាំ មានទីលំនៅភូមិត្នោតជ្រុំ សង្កាត់បឹងទំពន់ ខណ្ឌមានជ័យ មុខរបរអ្នករាំអកកាដង់(ឃាត់ខ្លួន) ទី២-មិនស្គាល់អត្តសញ្ញាណ ភេទស្រី អាយុប្រហែល៣៦ឆ្នាំ មិនស្គាល់ទីលំនៅ (គេចខ្លួន) និងទី៣-មិនស្គាល់អត្តសញ្ញាណ ភេទប្រុស អាយុប្រហែល៣២ឆ្នាំ (គេចខ្លួន) ចំណែកឯជនរងគ្រោះឈ្មោះ ហាន់ សូត ភេទប្រុស អាយុ១៨ឆ្នាំ មានទីលំនៅភូមិអូរអណ្តូង សង្កាត់ព្រែកប្រា ខណ្ឌច្បារអំពៅ រាជធានីភ្នំពេញ មុខរបរជាងផ្សាដែក ។
បើតាមនគរបាលស្រុកកៀនស្វាយ បានឱ្យដឹងថា នៅថ្ងៃកើតហេតុខាងលើ ម៉ោង៤ល្ងាចជនសង្ស័យជាស្ត្រី២នាក់បានបបួលជនរងគ្រោះមកលេងវត្តកៀនស្វាយក្រៅ ពេលមកដល់កៀនស្វាយផ្លាហ្សា ក៏នាំគ្នាអង្គុយហូបពោតស្ងោរ រួចជនសង្ស័យទី២ បានតេទូរសព្ទ័ហៅជន សង្ស័យទី៣ជាមនុស្សប្រុសឲ្យមកលេងដែរ ។
ខណៈពេលជនសង្ស័យទី៣មកដល់ ក៏នាំគ្នាជិះម៉ូតូជនរងគ្រោះ (ជិះទាំង៤នាក់) ទៅអង្គុយលេងផ្ទះទឹកនៅរមណីយដ្ឋានវត្តកៀនស្វាយក្រៅ ពេលទៅដល់ជនសង្ស័យជាស្ត្រី២នាក់បាននាំគ្នាទៅទិញម្ហូប ។ ចំណែកជនរងគ្រោះ និងជនសង្ស័យទី៣ នៅចាំរោង និងម៉ូតូ ខណៈពេលនោះជនសង្ស័យទី៣ បានខ្ចីម៉ូតូជនរងគ្រោះថា ទៅឌុបមេ មកលេងដែរ រួចក៏ទៅបាត់រហូត ។
នរគបាលបន្តទៀតថា ដោយចាំយូរពេកជនរងគ្រោះ និងជនសង្ស័យជាស្ត្រី២នាក់ ក៏តេទូរស័ព្ទទៅជនសង្ស័យទី៣ ហើយជនសង្ស័យទី៣ថា ឲ្យមកយកម៉ូតូនៅគល់ស្ពានច្បារអំពៅ ខណៈពេលមកដល់ច្បារអំពៅថា ឲ្យទៅយកនៅរង្វង់មូលតាខ្មៅ ពេលទៅដល់តាខ្មៅប្រាប់ថា ឲ្យទៅយកនៅមុខបន្ទាយអង្គរក្ស លុះពេលទៅដល់មុខបន្ទាយ ស្រាប់តែជនសង្ស័យជាស្ត្រីទី២នោះ បានឲ្យជនរងគ្រោះ និងជនសង្ស័យឈ្មោះ ហង្ស សុខចេង ចុះពីលើកង់បី ដោយប្រាប់ថា ខ្លួនទៅយកម៉ូតូឲ្យ រួចជនសង្ស័យទី២ក៏ទៅបាត់។
ប្រភពដដែលបន្តថា ដោយចាំយូរពេក និងទាក់ទងទូរស័ព្ទលែងបានជនរងគ្រោះក៏បានតេហៅ បងប្អូនឲ្យមកយក និងឃាត់ខ្លួនជនសង្ស័យឈ្មោះ ហង្ស សុខចេង មកប៉ុស្តិ៍នគរបាលរដ្ឋបាលភូមិធំ ដើម្បីសួរនាំនៅចំពោះមុខសមត្ថកិច្ច ។
ក្រោយជនសង្ស័យឈ្មោះ ហង្ស សុខចេង បានឆ្លើយមិនដឹង មិនស្គាល់ជនសង្ស័យទាំងពីរនាក់នោះទេ គឺស្គាល់តាមទូរស័ព្ទ និងធ្លាប់ទៅហូបមីហិរនៅផ្សារសុវណ្ណាម្តង ជាមួយជនរងគ្រោះ កាលពីថ្ងៃទី១៧ សីហា ម៉ោង៩យប់ ។ ក្រោយពេលសាកសួររួចហើយ ជនសង្ស័យដែលឃាត់ខ្លួនបាននោះ ត្រូវបានបញ្ជូនមកអធិការដ្ឋាននគរបាលស្រុក ដើម្បីបន្តចាត់ការតាមនីតិវិធី ។ (កែសម្រួលដោយ ៖ បុប្ផា)
ចែករំលែកព័តមាននេះ