ទីក្រុងហុងកុង កំពុងតែជួបនឹងវិបត្តិនយោបាយដ៏ធ្ងន់ធ្ងរ បន្ទាប់ពីមានការធ្វើបាតុកម្មទ្រង់ទ្រាយធំអស់ប្រមាណ១០សប្តាហ៍កន្លងមក ។ បាតុកម្មបានចាប់ផ្តើមដោយសារការអនុម័តច្បាប់ដ៏ចម្រូងចម្រាសមួយ ហើយវាបានរាលដាលដល់រឿងរ៉ាងដែលធំនិងធ្ងន់ជាងនេះ ។
ក្នុងរយៈពេលប៉ុន្មានខែកន្លងមកនេះ ការធ្វើបាតុកម្ម បានវិវឌ្ឍពីមានអ្នកចូលរួមប៉ុន្មានលាននាក់ បង្ហាញភាព មិនពេញចិត្តលើផ្លូវថ្នល់ហើយឈានដល់ការសំរុកចូលក្នុងកន្លែងការងាររបស់រដ្ឋាភិបាល និងថែមទាំងបង្កឲ្យមានការបិទដំណើរការអាកាសយានដ្ឋានអន្តរជាតិរបស់ទីក្រុងផងដែរ ។ បាតុករភាគច្រើនមិនប្រើហិង្សាទេ ប៉ុន្តែភាគីដែលចូលរួមទាំងអស់កាន់តែធុញថប់នឹងស្ថានការបច្ចុប្បន្ន ។
បាតុករកំពុងតែទាមទារឲ្យមានប្រជាធិបតេយ្យកាន់តែធំធេងក្នុងទីក្រុង និងស្នើការបកស្រាយ ពីការប្រើប្រាស់ ហិង្សាដោយភាគីខាងប៉ូលីសទៅលើបាតុករ ។ មហាសេដ្ឋីធំៗក្នុងហុងកុងកំពុងតែសំណូម ពរឲ្យមានសណ្តាប់ ធ្នាប់ក្នុងទីក្រុង ហុងកុងប៉ុន្តែភាពចលាចលកាន់តែកើនឡើង ។ ខណៈដែលភាពចលាចលកាន់តែវឹកវរ រដ្ឋាភិបាលក្រុងប៉េកាំងកាន់តែក្តៅស្លឹកត្រចៀកហើយនិយាយក្នុងសំឡេងដែលកាន់តែខ្លាំង ។
តើរឿងនេះកើតឡើងដោយដូចម្តេច ?
ហុងកុងស្ថិតក្រោមការគ្រប់គ្រងរបស់ប្រទេសចិន ប៉ុន្តែទីក្រុងនេះមានរូបិយប័ណ្ណ ប្រព័ន្ធនយោបាយ និងអត្តសញ្ញាណប្រជាជនខុសពីប្រទេស ចិន ។ ប្រជាជនជាច្រើននៅក្នុងទីក្រុងហុងកុងមិនគិតថាខ្លួនឯង ជាជនជាតិចិនទេ តែពួកគេគិតថាខ្លួនជាជនជាតិហុងកុង ។
ភាពខុសគ្នានេះកើតមានឡើងជាច្រើនជំនាន់មកហើយ ។ ទីក្រុងហុងកុងធ្លាប់ជាទីក្រុងស្ថិតក្រោមអាណានិគមរបស់ចក្រភពអង់គ្លេសអស់ច្រើនជាង ១៥០ឆ្នាំ រហូតដល់ចក្រភពអង់គ្លេស ប្រគល់ហុងកុងឲ្យទៅប្រទេសចិនវិញក្នុងឆ្នាំ១៩៩៧ ។ បច្ចុប្បន្ននេះ ប្រព័ន្ធនីតិសាស្ត្ររបស់ហុងកុងមានរូបរាង ដូចប្រព័ន្ធអង់គ្លេសស្ទើរតែទាំងស្រុង និងមានតម្លាភាពខ្ពស់ផងដែរ ។
ច្បាប់មូលដ្ឋានរបស់ហុងកុងដែលត្រូវបានចាត់ទុកជារដ្ឋធម្មនុញ្ញរបស់ទីក្រុងនេះបានចែងភាពខុសគ្នា ។ ច្បាប់នេះផ្តល់សិទ្ធិសេរីភាពដល់ប្រជាជនហុងកុងច្រើនជាងជនជាតិចិនដូចជាសិទ្ធិក្នុងការធ្វើបាតុកម្ម សេរីភាពសារព័ត៌មាន និងសេរីភាពក្នុងការបញ្ចេញមតិជាដើម ។
តម្លៃចម្បងមួយនៃច្បាប់មូលដ្ឋានហុងកុង គឺការដែលហុងកុងមានសិទ្ធិក្នុងការអភិវឌ្ឍន៍របបប្រជាធិបតេយ្យរបស់ខ្លួន ហើយមន្ត្រីរដ្ឋាភិបាលចិនមុនៗបានសន្យាថារដ្ឋាភិបាលកណ្តាលក្នុង ទីក្រុងប៉េកាំងនឹងមិន ជ្រៀតជ្រែក សិទ្ធិនេះដាច់ខាត ។ ប៉ុន្តែក្នុងរយៈពេលប៉ុន្មានឆ្នាំមកនេះ ប្រទេសចិនបានធ្វើការបកប្រែច្បាប់សាជាថ្មីជាច្រើន ដងរហូតមកដល់បច្ចុប្បន្នដែលអះអាងថា ហុងកុងស្ថិតក្រោមយុត្តាធិកាប្រទេសចិនទាំងស្រុង ។
ច្បាប់មូលដ្ឋានហុងកុងចែងមកថាហុងកុង ត្រូវតែការពារសិទ្ធិនិងសេរីភាពរបស់ប្រជាជនក្នុងរយៈពេល៥០ឆ្នាំ បន្ទាប់ពីត្រូវបានប្រគល់ទៅប្រទេសចិន ។ ប៉ុន្តែប្រជាជនហុងកុងជាច្រើននិយាយថា ប្រទេសចិនកំពុងតែចាប់ផ្តើមដកសិទ្ធិទាំងនោះហើយ ។ការគំរាមកំហែងនេះបានបង្កឲ្យមានការឈ្លោះប្រកែកគ្នា និងបង្កឲ្យមានការចាប់ខ្លួនបាតុករ រាប់រយនាក់មកហើយ ។
តើការធ្វើបាតុកម្មដើម្បីទាមទារអ្វី ?
បាតុកម្មក្នុងហុងកុងមានទ្រង់ទ្រាយ និងសភាពខុសៗគ្នាដូចជា មានការធ្វើបែបសាតុកម្មដោយការដើរដង្ហែក្បួន ដោយសន្តិវិធីទ្រង់ទ្រាយធំ ឬការធ្វើកូដកម្មមិនចូលធ្វើការងារនៅក្នុងឧស្សាហកម្មផ្សេងៗ ។ ពេលខ្លះវាមានទ្រង់ទ្រាយ ជាការធ្វើសកម្មភាពរបស់មនុស្សមួយក្រុមតូចដែលឈានដល់ការប៉ះទង្គិចគ្នាឬក៏មានការបំផ្លាញទ្រព្យសម្បត្តិ ។
កាលពីពេលថ្មីៗនេះ អំពើហិង្សាបានផ្ទុះ ឡើងនៅអាកាសយានដ្ឋានហុងកុង ហើយរឿងនេះបានបង្ហាញពី សញ្ញានៃការតទល់គ្នាថ្មីមួយទៀតដែលបង្កឲ្យមានការចាប់ខ្លួនមនុស្សចំនួនពីររូប ។បាតុកម្មបានចាប់ផ្តើមនៅខែមីនា ប៉ុន្តែវាមានទ្រង់ទ្រាយធំចាប់ពីខែមិថុនា ព្រោះតែការប្រឆាំងនឹងច្បាប់បត្យាប័ន ថ្មីដែលបច្ចុប្បន្ននេះ ត្រូវបានទុកចោលមួយឡែកសិន ប៉ុន្តែតាំងពីនោះមកបាតុករបានទាមទាររបបប្រជាធិបតេយ្យពេញលេញ ព្រមទាំងទាមទារឲ្យមាន ការទទួលខុសត្រូវពីភាគីខាងប៉ូលីសផងដែរ ។ បាតុករមានការខឹងសម្បាទៅនឹងអ្វីដែលគេអះអាងថាជាការប្រើហិង្សាពីភាគីខាងប៉ូលីស។ បន្ទាប់ពីបាតុករភេទស្រីម្នាក់ រងរបួសភ្នែកក្នុងអំឡុងពេលធ្វើបាតុកម្ម បាតុករដ៏ទៃនៅអាកាសយានដ្ឋានបាននាំគ្នាពាក់ម៉ាស់ភ្នែកម្ខាងដើម្បីរំលឹកពីស្ត្រីខាងលើ ។
ខណៈដែលបាតុកម្មមិនមានមេដឹកនាំត្រឹមត្រូវ មនុស្សទាំងអស់មិនមានគោលដៅរួមឡើយ។ ប៉ុន្តែជាទូទៅ ការទាមទារមានចំនួនប្រាំធំៗគឺ ទីមួយ លប់ចោលច្បាប់បត្យាប័នដ៏ចម្រូងចម្រាសទីពីរ មេដឹកនាំហុងកុង បច្ចុប្បន្នគឺលោកស្រី ខែរី ឡាម ( Carrie Lam) ត្រូវចុះចេញពីតំណែង ទីបីត្រូវមានការស៊ើបអង្កេត ទៅលើភាពសាហាវរបស់ប៉ូលិស ទីបួនដោះលែងបាតុករដែលត្រូវបានចាប់ខ្លួន និងទីប្រាំហុងកុងត្រូវមានប្រជាធិបតេយ្យកាន់តែធំធេង ។
ចំពោះការធ្វើបាតុកម្ម បាតុករត្រូវប្រឈមមុខនឹងប៉ូលិសហើយបានក្លាយជាគោលដៅ បុរសអាវសកាន់ដំបង ដែលត្រូវគេគិតថាត្រូវដៃជើងជាមួយនឹងរដ្ឋាភិបាលចិន។ ប្រជាជនហុងកុងជាច្រើនជួបប្រទះទុក្ខលំបាក ព្រោះតែប្រព័ន្ធដឹកជញ្ជូន និងការធ្វើដំណើរផ្សេងៗត្រូវបានផ្អាកដំណើរការ ។ ប៉ុន្តែជារួមការធ្វើបាតុកម្មមិនបង្កការគ្រោះថ្នាក់អ្វីផ្សេងឡើយ ។
មូលហេតុអ្វីបានជាបាតុករដាក់គោលដៅលើអាកាសយានដ្ឋាន ? (សម្រួលដោយ៖ ស្រីណា)
(អត្ថាធិប្បាយនឹងមានផ្សាយនៅថ្ងៃស្អែកទៀត)
ចែករំលែកព័តមាននេះ