រាជធានីភ្នំពេញ ៖ ក្រោយបោះបង់ជាបេក្ខភាពប្រឡងសញ្ញាបត្រមធ្យមសិក្សាទុតិយភូមិកាលឆ្នាំ២០១៨ ដោយសារតែហេតុផលជីវភាព កីឡាករ ឈុត សេរីវ៉ាន់ថន មកពីក្លិបប្រដាល់រាហ៊ូខេត្តបាត់ដំបង ត្រូវបានគេរុញច្រានឱ្យចូលរួមប្រឡងសារជាថ្មីនៅក្នុងឆ្នាំនេះ។
អ្វីដែលគួរឱ្យចាប់អារម្មណ៍ទៅទៀតនោះ គឺកីឡាកររូបនេះ ត្រូវបានអ្នករៀបចំការប្រដាល់មួយរូបប្រកាសផ្ដល់ឱ្យនូវអាហារូបករណ៍លើគ្រប់មុខវិជ្ជាដែលចង់សិក្សា ដោយសារតែចង់ឱ្យកីឡាកររូបនេះ មានឱកាសទៅបន្តការសិក្សាក្នុងកម្រិតមហាវិទ្យាល័យ។
លោក ឈុត សេរី ជាឪពុកបានអះអាងថា កូនប្រុសប្រឹងប្រែងរៀនសូត្រខ្លាំងណាស់ តាំងពីមុនត្រៀម ប្រឡងបាក់ឌុប រហូតដល់បញ្ចប់ការប្រលង បើទោះគ្រាន់តែគេជាសិស្សស្វ័យរិន្ទ។ លោកថា ឈុត សេរីវ៉ាន់ថន មិនសូវទាំងហា៑នបង្ហាញខ្លួននៅលើសង្វៀនប្រកួតនោះផង ដោយសារតែចង់ប្រលងឱ្យជាប់នៅក្នុងឆ្នាំនេះ។
លោកថា មូលហេតុដែលធ្វើឲ្យ ឈុត សេរីវ៉ាន់ថន បោះបង់ការប្រឡងបាក់ឌុបកាលពីឆ្នាំមុន គឺដោយសារ វ៉ាន់ថន គ្មានពេលវេលាសិក្សាគ្រប់គ្រាន់ ខណៈដែលក្នុងពេលនោះគេក៏ជាប់រវល់ហ្វឹកហាត់ពង្រឹងសមត្ថភាព ដើម្បីដណ្តើមខ្សែក្រវាត់ប្រចាំកម្មវិធីរបស់ស្ថានីយទូរទស្សន៍អាស៊ីអាគ្នេយ៍ និងការប្រកួតផ្សេងទៀត ដែលមិនអាចដកខ្លួនបាន។ ប៉ុន្តែគួរឱ្យស្ដាយ ខ្សែក្រវាត់នៅក្នុងពេលនោះក៏ដណ្ដើមមិនបាន។
លោក ស៊ីថូ ណាថាន់ ប្រធានផ្នែកកីឡា បានបង្ហាញការអបអរចំពោះការតាំងចិត្តរបស់ ឈុត សេរីវ៉ាន់ថន ដែលសុខចិត្តដកខ្លួនពីការប្រដាល់ ហើយងាកទៅប្រលងនៅក្នុងឆ្នាំនេះ។ លោកសន្យាថា ជួយផ្គត់ផ្គង់ការរៀនសូត្រថ្នាក់មហាវិទ្យាល័យដល់កីឡាករ ឈុត សេរីវ៉ាន់ថន តាំងពីដើមដល់ចប់ឱ្យតែគេប្រឡងជាប់បាក់ឌុប ដើម្បីជួយគេឱ្យមានឱកាសចូលរៀនមហាវិទ្យាល័យផង។ លោកថា ខ្លួនបានប្រាប់សាមីខ្លួន និងឪពុលរបស់សាមីខ្លួនរួចហើយ ក្នុងពេលដែលលោកក៏ហា៑នឱ្យមហាជនធ្វើជាសាក្សី ដើម្បីកុំឱ្យមានការយល់ថា លោកនិយាយចោល ឬ និយាយចង់ល្បី ហើយមិនធ្វើ។ (កែសម្រួលដោយ ៖ បុប្ផា)
ចែករំលែកព័តមាននេះ