រាជធានីភ្នំពេញ ៖ អ្នកគ្រូបង្រៀនថ្នាក់ទី៣នៃសាលាបឋមសិក្សាវត្តទួលទំពូងម្នាក់បានរងរបួសយ៉ាងធ្ងន់ធ្ងរដោយបាក់ជើងខាងឆ្វេងម្ខាង ពកក្បាល និងបែកមាត់ហូរឈាម ខណៈជនរងគ្រោះកំពុងតែបើកបរម៉ូតូមួយគ្រឿងធ្វើដំណើរចេញពីផ្ទះទៅបង្រៀននៅសាលាបឋមសិក្សាវត្តទួលទំពូង លុះដល់ចំណុចផ្លូវបំបែកជា៤ ក្បែរមណ្ឌលប្រឡងសាវិទ្យាល័យទួលទំពូង ក៏ត្រូវបានរថយន្តមួយគ្រឿងម៉ាកកាម៉ារី បើកមកបុកពេញទំហឹង…
រាជធានីភ្នំពេញ ៖ អ្នកគ្រូបង្រៀនថ្នាក់ទី៣នៃសាលាបឋមសិក្សាវត្តទួលទំពូងម្នាក់បានរងរបួសយ៉ាងធ្ងន់ធ្ងរដោយបាក់ជើងខាងឆ្វេងម្ខាង ពកក្បាល និងបែកមាត់ហូរឈាម ខណៈជនរងគ្រោះកំពុងតែបើកបរម៉ូតូមួយគ្រឿងធ្វើដំណើរចេញពីផ្ទះទៅបង្រៀននៅសាលាបឋមសិក្សាវត្តទួលទំពូង លុះដល់ចំណុចផ្លូវបំបែកជា៤ ក្បែរមណ្ឌលប្រឡងសាវិទ្យាល័យទួលទំពូង ក៏ត្រូវបានរថយន្តមួយគ្រឿងម៉ាកកាម៉ារី បើកមកបុកពេញទំហឹង បណ្តាលអោយដួលចូលខាងក្រោមរថយន្តនោះ ។
ករណីគ្រោះថ្នាក់ចរាចរណ៍ខាងលើនេះដែរបានកើតឡើងកាលពីវេលាម៉ោង១រសៀលថ្ងៃទី ១៩ ខែសីហា ឆ្នាំ២០១៩ នៅចំណុចផ្លូវលេខ៤៣២ កែងផ្លូវលេខ១៥៥ ក្នុងសង្កាត់ទួលទំពូងទី១ ខណ្ឌចំការមន។
តាមប្រភពព័ត៌មានពីនគរបាលបានប្រាប់ឱ្យដឹងថា ជនរងគ្រោះខាងលើឈ្មោះ ឃុំ ប៉ុណ្ណាបាប់ ភេទស្រី អាយុជាង៥០ឆ្នាំ ជាគ្រូបង្រៀនថ្នាក់ទី៣នៅសាលាបឋមសិក្សាវត្តទួលទំពូង មានទីលំនៅម្តុំរង្វង់មូលផ្សារដើមថ្កូវ ក្នុងសង្កាត់ផ្សារដើមថ្កូវ ខណ្ឌចំការមន និងជាអ្នកបើកបរម៉ូតូមួយគ្រឿងម៉ាកវ៉េវ ពណ៌ក្រហម ពាក់ស្លាកលេខ ភ្នំពេញ ១BC-៧២៧០ ។
តាមប្រភពដដែលបានឱ្យដឹងថា មុនពេលកើតហេតុ អ្នកគ្រូរងគ្រោះបានបើកបរម៉ូតូមួយគ្រឿងធ្វើដំណើរចេញពីផ្ទះនៅម្តុំរង្វង់មូលផ្សារដើមថ្កូវ ក្នុងបំណងទៅបង្រៀនសិស្សនៅសាលាបឋមសិក្សាវត្តទួលទំពូង តាមបណ្តោយផ្លូវលេខ១៥៥ ក្នុងទិសដៅពីត្បូងទៅជើង។ ចំណែករថយន្តមួយគ្រឿងខាងលើម៉ាកកាមរី ពណ៌ទឹកមាស ពាក់ស្លាកលេខ ភ្នំពេញ ២R-៨១៥៤ បើកបរដោយបុរសជនជាតិខ្មែរម្នាក់ មិនស្គាល់អត្តសញ្ញាណ ត្រូវសមត្ថកិច្ចឃាត់ខ្លួន និងមានបុរសម្នាក់ទៀតជាជនបរទេស ជាអ្នករួមដំណើរ មិនស្គាល់អត្តសញ្ញាណនោះទេ ត្រូវសមត្ថកិច្ចចាប់ឃាត់ខ្លួន ។
តាមប្រភពដដែលបានបន្តថា លុះពេលអ្នកគ្រូរងគ្រោះធ្វើដំណើរមកដល់ចំណុចកើតហេតុខាងលើ ក្បែរមណ្ឌលប្រឡងវិទ្យាល័យទួលទំពូងជិតដល់សាលាដែលអ្នកគ្រូបង្រៀនទៅហើយនោះ ក៏ស្រាប់តែមានរថយន្តមួយគ្រឿងម៉ាកកាម៉ារី បានបើកបោះពួយក្នុងល្បឿនយ៉ាងលឿនតាមបណ្តោយផ្លូវលេខ៤៣២ ក្នុងទិសដៅពីកើតទៅលិច មកបុកម៉ូតូអ្នកគ្រូរងគ្រោះយ៉ាងពេញទំហឹង បណ្តាលអោយដួលចូលក្រោមរថយន្ត ចំណែកអ្នកគ្រូរងគ្រោះបានរងរបួសយ៉ាងធ្ងន់ធ្ងរដោយបាក់ជើងខាងឆ្វេងម្ខាង ពកក្បាល និងបែកមាត់ហូរឈាម ។
ក្រោយពេលកើតហេតុ កម្លាំងសមត្ថកិច្ចដែលយាមប្រចាំការនៅមណ្ឌលប្រឡងវិទ្យាល័យទួលទំពូងក្បែរនោះក៏បានហៅរថយន្តសាមុយរបស់មន្ទីរពេទ្យមិត្តភាពខ្មែរ-សូវៀត អោយមកដឹកយកអ្នកគ្រូរងគ្រោះយកទៅធ្វើការសង្គ្រោះភ្លាមៗផងដែរ ។ ចំណែកអ្នកបើកបររថយន្ត និងអ្នករួមដំណើរ ព្រមទាំងរថយន្ត និងម៉ូតូ ត្រូវបានកម្លាំងសមត្ថកិច្ចនាំយកទៅកាន់នៅអធិការដ្ឋាននគរបាលខណ្ឌចំការមន ដើម្បីរង់ចាំធ្វើការដោះស្រាយគ្នាជាបន្តទៅទៀត ៕ (កែសម្រួលដោយ ៖ ធីតា)
ចែករំលែកព័តមាននេះ