ក្រុងហុងកុង ៖ ប្រធានាធិបតីអាមេរិកលោកដូណាល់ត្រាំ កាលពីថ្ងៃទី១៨សីហាបានព្រមានចិនដោយអះអាងថា ការបង្ក្រាបបាតុកម្មក្រុងហុងកុងដូចការកម្ទេចការបះបោរនៅទីលានធៀនអានមេន នឹងបំផ្លាញធ្ងន់ធ្ងរដល់ការចរចាស្ដីពីកិច្ចព្រមព្រៀងពាណិជ្ជកម្មចិន-អាមេរិក។
លោកត្រាំថ្លែងកាលពីថ្ងៃទី១៨សីហាទៅកាន់បណ្ដាអ្នកកាសែតនៅញូវចឺស៊ីថា ខ្ញុំយល់ថាវាពិតជាពិបាកខ្លាំងណាស់ ក្នុងការចុះហត្ថលេខាលើកិច្ចព្រមព្រៀងមួយ ប្រសិនបើចិនប្រើអំពើហិង្សាដូចគ្នានឹងអ្វីដែលខ្លួនធ្លាប់ធ្វើនៅទីលានធៀនអានមេន។ លោកត្រាំធ្វើសេចក្ដីថ្លែងការណ៍នោះ ខណៈទីប្រឹក្សាសេដ្ឋកិច្ចពិសេសរបស់់លោក គឺលោកLARRY KUDLOV អះអាងនាព្រឹកថ្ងៃទី១៨សីហាថា ក្រុងវ៉ាស៊ិនតោននិងក្រុងប៉េកាំង ប៉ុនប៉ងយ៉ាងសកម្មឲ្យកិច្ចចរចាដំណើរការ ដើម្បីបញ្ចប់ សង្គ្រាមពាណិជ្ជកម្មរវាងមហាអំណាចទាំង២។
កាលពីថ្ងៃទី១៨សីហាពួកបាតុករស្និទ្ធលទ្ធិប្រជាធិបតេយ្យជាច្រើនរយពាន់នាក់ បានលើកគ្នាដើរហែក្បួនយ៉ាងគគ្រឹកគគ្រេង តាមដងវិថីនានានៃក្រុងហុងកុង ដោយផ្គើនប៉ូលិសនិងមិនចុះញ៉មចំពោះកាណុងបាញ់ទឹក ដើម្បីបង្ហាញថាចលនារបស់ពួកគេ នៅតែមានប្រជាប្រិយភាព ទោះបីមានអំពើហិង្សានានានិងការគំរាមធ្វើអន្តរាគមន៍របស់ចិនក្ដី។
ដើម្បីតតាំងនឹងការចោទប្រកាន់ពីភេរវកម្មពីសំណាក់រដ្ឋាភិបាលចិន ការអំពាវនាវឲ្យមានការប្រមូលផ្ដុំមនុស្សធ្វើបាតុកម្មធំដោយគ្មានអំពើហិង្សា ត្រូវបានធ្វើដោយរណៈសិរ្សស៊ីវិលនៃសិទ្ធិមនុស្ស។ យោងតាមអង្គការនោះថាបាតុកម្មលើកនេះដែលអហិង្សា មានមនុស្សចូលរួមដល់ទៅជាង១,៧លាននាក់ គឺជាមហាបាតុកម្មពុំធ្លាប់មានចាប់តាំងពីច្រើនសប្ដាហ៍មកហើយ។ ចំណែកប៉ូលិសប៉ាន់ប្រមាណថា មានមនុស្ស១២៨.០០០នាក់ បានមកចូលរួមក្នុងបាតុកម្មដែលមានការអនុញ្ញាតនោះ នៅក្នុងឧទ្យានមួយនៃទីក្រុង តែដោយមិនរាប់បញ្ចូនបាតុករដែលប្រមូលផ្ដុំគ្នាជាច្រើននៅតាមបណ្ដាវិថីជាប់ជិតខាងផងទេ។
នាដើមរសៀលបាតុករដំបូងប្រមូលផ្ដុំគ្នា ក្រោមដំណក់ទឹកភ្លៀង ក្នុងឧទ្យានPARC VICTORIA នាកណ្ដាលកោះហុងកុង ដោយបង្កើតជាសមុទ្រឆ័ត្រចម្រុះពណ៌មួយ។ ពួកបាតុករបន្ទាប់មកលើកគ្នាដើរហែក្បួន សំដៅទៅសង្កាត់ADMIRALTY ដោយបំពានការហាមឃាត់របស់ប៉ូលិស ដែលអនុញ្ញាតឲ្យធ្វើបាតុកម្មតែក្នុងឧទ្យាន។ រួចនាយប់ថ្ងៃទី១៨សីហាបាតុករច្រើនរយនាក់ដែលពាក់ម៉ាស់ បានលើកគ្នាហែក្បួនជុំវិញវិមានរដ្ឋាភិបាលដោយស្រែកពាក្យថា យើងដណ្ដើមយកហុងកុងមកវិញឬបដិវត្តន៍នៃសម័យកាលយើង។
កងទ័ពចិននៅក្រុងSHENZHENចម្ងាយ៧គីឡូម៉ែត្រពីក្រុងហុងកុង ពេលនេះកំពុងហាត់ពីការប្រើឧបករណ៍ពិសេស គឺស្លាបព្រាយក្ស ដែលមានអគ្គិសនីឆក់ទប់ទល់ពួកបាតុករ៕ (កែសម្រួលដោយ ៖ បុប្ផា)
ចែករំលែកព័តមាននេះ