រាជធានីភ្នំពេញ ៖ សម្តេច ហេង សំរិន ប្រធានរដ្ឋសភានៃព្រះរាជាណាចក្រកម្ពុជា សង្ឃឹមថា ជប៉ុននឹងបន្តជួយអភិវឌ្ឍន៍កម្ពុជាបន្ថែមទៀត ជាពិសេសការជួយអភិវឌ្ឍន៍ធនធានមនុស្ស ការកសាងសមត្ថភាពដល់ថ្នាក់ដឹកនាំវ័យក្មេង ក៏ដូចជាការកសាងសមត្ថភាពដល់យុវជនកម្ពុជា ដែលជាមូលដ្ឋានយ៉ាងសំខាន់ក្នុងការអភិវឌ្ឍន៍ប្រទេសកម្ពុជាឱ្យកាន់តែរីកចម្រើនថែមទៀត។
នោះបើតាមការឱ្យដឹងពីលោក កែវ ពិសិដ្ឋ នាយកខុទ្ទកាល័យ និងជាអ្នកនាំពាក្យសម្តេចប្រធានរដ្ឋសភា នៅក្នុងជំនួបសម្តែងការគួរសម និងជម្រាបលារបស់ឯកអគ្គរាជទូតជប៉ុនប្រចាំកម្ពុជា លោក Hidehisa HORINOUCHI នាព្រឹកថ្ងៃទី១៩ ខែសីហានេះ នៅវិមានរដ្ឋសភា ខណៈដែលលោកបញ្ចប់អាណត្តិការទូតបីឆ្នាំនៅកម្ពុជា ហើយត្រូវចាកចេញពីកម្ពុជានៅសប្តាហ៍ក្រោយនេះ។
ក្នុងជំនួបនោះ សម្តេចបានលើកឡើងថា កម្ពុជា-ជប៉ុន បានកសាងទំនាក់ទំនងការទូតរយៈពេលជាង៦៥ឆ្នាំមកហើយ។ ទំនាក់ទំនងដ៏យូរអង្វែងនេះ បានប្រែក្លាយវិវត្តន៍ជាបន្តបន្ទាប់ និងមានការរីកចម្រើន និងចងចាំចាក់ ឬសយ៉ាងជ្រៅទៅក្នុងបេះដូងប្រជាពលរដ្ឋកម្ពុជាគ្រប់រូប។ សម្តេចបានលើកឡើងថា ឆ្នាំ២០១៨ ថ្នាក់ដឹកនាំប្រទេសទាំងពីរបានលើកកម្ពស់ទំនាក់ទំនងកិច្ចសហប្រតិបត្តិការ ក្លាយជាដៃគូរយុទ្ធសាស្ត្រ ដែលសកម្មភាពទាំងអស់ បានអនុវត្តយ៉ាងផុលផុសលើគ្រប់វិស័យ និងប្រែក្លាយជាផលប្រយោជន៍ជាក់ស្តែងដល់ប្រជាពលរដ្ឋកម្ពុជា ក៏ដូចបានរួមចំណែកអភិវឌ្ឍន៍ប្រទេសកម្ពុជា មានការរីកចម្រើនរហូតបច្ចុប្បន្ន។
សម្តេចប្រធានក៏បានវាយតម្លៃខ្ពស់ផងដែរ ចំពោះកិច្ចប្រឹងប្រែងរបស់លោកទូត នៅក្នុងអាណត្តិ៣ឆ្នាំកន្លងមកនេះ មានសកម្មភាពលេចធ្លោខ្លាំង ជាពិសេសគឺជម្រុញលើកកម្ពស់ទំនាក់ទំនងពាណិជ្ជកម្ម វិនិយោគ ហើយសម្តេចក៏បានសង្កេតឃើញថា ក្នុងរយៈពេលប៉ុន្មានឆ្នាំចុងក្រោយនេះ ការវិនិយោគផ្ទាល់ពីជប៉ុន គឺមានការីកចម្រើន ក្នុងនោះមានក្រុមហ៊ុនល្បីៗជាច្រើនរបស់ជប៉ុនបានចូលមកវិនិយោគនៅកម្ពុជា។ ជាមួយនេះដែរ កិច្ចសហប្រតិបត្តិការលើវិស័យទេសចរណ៍ រួមទាំងកិច្ចសហប្រតិបត្តិការលើវិស័យវប្បធម៌ ក៏មានការរីកចម្រើនផងដែរ។
សម្តេចបានបញ្ជាក់ថា ក្នុងអាណត្តិ៣ឆ្នាំរបស់លោកទូតនៅកម្ពុជា សម្តេចសង្កេតឃើញដ៏ពេញចិត្តផងដែរ ក្នុងការលើកកម្ពស់កិច្ចសហប្រតិបត្តិការរវាងជប៉ុន និងបណ្តាប្រទេសក្នុងតំបន់ ក្នុងនោះរួមមានកម្ពុជាផងដែរ។ សម្តេចបន្ថែមថា ៣ឆ្នាំនៃអាណត្តិការទូតលោក ពិតជាបានឃើញសភាពការពិតរបស់កម្ពុជា រួមទាំងការអភិវឌ្ឍន៍ប្រទេសកម្ពុជាធានានូវស្ថេរភាព សន្តិភាព និងសណ្តាប់ធ្នាប់សង្គម ដែលជាមូលដ្ឋានគ្រឹះក្នុងការជំរុញការអភិវឌ្ឍន៍កម្ពុជា។
សម្តេចក៏បានសម្តែងអរគុណចំពោះរដ្ឋាភិបាលជប៉ុន ដែលបានផ្តល់ជំនួយដ៏សន្ធឹកសន្ធាប់ដល់ការអភិវឌ្ឍកម្ពុជា ដែលគិតពីឆ្នាំ១៩៩២ រហូតដល់បច្ចុប្បន្ននេះ ជំនួយអភិវឌ្ឍន៍របស់ជប៉ុននៅកម្ពុជាមានទំហំជិត៣ពាន់លានដុល្លារហើយ។ សង្ឃឹមថា ជប៉ុននឹងបន្តជួយអភិវឌ្ឍន៍កម្ពុជាបន្ថែមទៀត ជាពិសេសការជួយអភិវឌ្ឍន៍ធនធានមនុស្ស ការកសាងសមត្ថភាពដល់ថ្នាក់ដឹកនាំវ័យក្មេង ក៏ដូចជាការកសាងសមត្ថភាពដល់យុវជនកម្ពុជា ដែលជាមូដ្ឋានយ៉ាងសំខាន់ ក្នុងការអភិវឌ្ឍន៍ប្រទេសកម្ពុជាឱ្យកាន់តែមានការរីកចម្រើនបន្ថែមទៀត។
លោក Hidehisa HORINOUCHI ឯកអគ្គរាជទូតជប៉ុនប្រចាំកម្ពុជា ជាមួយការសម្តែងការអរគុណ លោកបានជំរាបជូនសម្តេចប្រធានរដ្ឋសភាថា នៅសប្តាហ៍ក្រោយលោកនឹងចាកចេញពីកម្ពុជា ដើម្បីទៅបំពេញបេសកកម្មការទូតនៅប្រទេសហូឡង់ជាបន្តទៀត។ លោកថា បីឆ្នាំនៅកម្ពុជា លោកសង្កេតឃើញថា កម្ពុជាមានការរីកចម្រើនខ្លាំង ហើយទំនាក់ទំនងកិច្ចសហប្រតិបត្តិការកម្ពុជា-ជប៉ុន ក៏មានការរីកចម្រើន ទាំងកិច្ចសហប្រតិបត្តិការវិស័យសេដ្ឋកិច្ច ពាណិជ្ជកម្ម វិនិយោគ ទេសចរណ៍។
លោកបញ្ជាក់ថា ឆ្នាំកន្លងទៅនេះគឺជាខួប៦៥ឆ្នាំ នៃទំនាក់ទំនងការទូតកម្ពុជា-ជប៉ុន ដែលប្រទេសទាំងពីរបានប្រារព្ធខួប៦៥ឆ្នាំនេះយ៉ាងឧឡារិក ហើយទន្ទឹមនេះជប៉ុនក៏បានបើកនូវកុលស៊ុលមួយនៅខេត្តសៀមរាបបន្ថែមទៀត។ បីឆ្នាំនៃបេសកកម្មការទូតរបស់លោកនៅកម្ពុជានេះដែរ លោកបានជំរុញឱ្យមានការផ្លាស់ប្តូរទស្សនកិច្ចរវាងថ្នាក់ដឹកនាំពីថ្នាក់កំពូល រហូតដល់កម្រិតថ្នាក់ក្រោមជាបន្តបន្ទាប់ រួមទាំងសភាប្រទេសទាំងពីរផងដែរ។
ដូចកាលពីឆ្នាំកន្លងទៅមានដំណើរទស្សនកិច្ច របស់សម្តេចនាយករដ្ឋមន្ត្រីកម្ពុជានៅជប៉ុន ហើយក្នុងដំណើរទស្សនកិច្ចនេះ ក៏មានជំនួបកំពូលរវាងប្រមុខដឹកនាំនៃប្រទេសទាំងពីរ ប្រកបដោយលទ្ធផលផ្លែផ្កាគួរជាទីមោទនៈ។
លោកទូតបានសម្តែងការអរគុណចំពោះសម្តេចប្រធានរដ្ឋសភា ដែលបានជំរុញ និងពង្រីកកិច្ចសហប្រតិបត្តិការរវាងសភាទាំងពីរឱ្យមានការរីកចម្រើនជាបន្តបន្ទាប់។ លោកទូតក៏បានសម្តែងនូវការរីករាយផងដែរ ចំពោះសម្តេចប្រធាន ដែលជាឥស្សរិជននយោបាយជើងចាស់របស់កម្ពុជាមួយរូប ដែលក្នុងមួយជីវិតរបស់សម្តេចបានរួមអភិវឌ្ឍន៍កម្ពុជាឱ្យមានការរីកចម្រើន ក្នុងនោះសម្តេចក៏ជាបុគ្គលក្នុងការជំរុញទំនាក់ទំនងកម្ពុជា-ជប៉ុនឱ្យមានការរីកចម្រើនផងដែរ៕ (កែសម្រួលដោយ ៖ បុប្ផា)
ចែករំលែកព័តមាននេះ