ខេត្តពោធិ៍សាត់ ៖ ទោះបីមន្ត្រីជំនាញកាំកុងត្រូលខិតខំផ្សព្វផ្សាយ និងត្រួតពិនិត្យយ៉ាងណាក៏ដោយ ក៏នៅតែមានការដាក់តាំងលក់ចំណីអាហារនិងទំនិញហួសសុពលភាពតាមមផ្សារ និងតាមលំនៅឋានមិនដែលដាច់។ ជាក់ស្ដែង កាលពីថ្ងៃទី១៦ សីហា សាខាកាំកុងត្រូលខេត្តពោធិ៍សាត់ សហការជាមួយមន្ទីរពាណិជ្ជកម្មខេត្ត អាជ្ញាធរមូលដ្ឋាន និងនគរបាលប៉ុស្តិរដ្ឋបាលបានចុះត្រួតពិនិត្យការលក់ដូររបស់អាជីវករ នៅផ្សារស្រែស្ដុក ឃុំស្រែស្ដុក ស្រុកកណ្ដៀង ដើម្បីរកទំនិញខូចគុណភាពប៉ះពាល់សុខភាពអ្នកទទួលទាន ។
មន្ត្រីជំនាញបានពិនិត្យមើលការលក់ដូររបស់អាជីវករចំនួន១១កន្លែង រកឃើញទំនិញហួសសុពលភាពសរុប១៥៩គីឡូក្រាម ក្នុងនោះ មានទឹកដោះគោរជូរ ទឹកដោះគោឡេកតាសយ ទឹកក្រូចកូកាកូឡា ទឹកក្រូចសាមតូ ទឹកក្រូចសាមូរ៉ៃ ទឹកក្រូចអាយស៍ ទឹកសេរ៉ូរូបមាន់ និងទឹកក្រូចចំរុះច្រើនប្រភេទទៀត ដែលមួយចំនួនផលិតនៅក្នុងស្រុក និងមួយចំនួនទៀតនាំចូលពីប្រទេសជិតខាង ។ ជាមួយគ្នានេះ មន្ត្រីជំនាញបានចែកផ្ទាំងរូបភាពផ្សព្វផ្សាយ ដែលមានខ្លឹមសារនិយាយអំពីទំនិញឫចំណីអាហារបែបណា ដែលគួរទទួលទាននិងចំណីអាហារបែបណាដែលមិនគួរទទួលទាន ដើម្បីឲ្យអាជីវករ ប្រជាពលរដ្ឋ និងសិស្សានុសិស្សបានយល់ដឹងបង្ការទប់ស្កាត់ទាំងអស់គ្នា។
លោក តូច ចៅកុយ ប្រធានសាខាកាំកុងត្រូលខេត្តពោធិ៍សាត់និងសហការី បានណែនាំដល់អ្នកលក់ដូរទាំងអស់ ចៀសវាងការប្រើប្រាស់សារធាតុគីមី បន្ថែមទៅលើផលិតផលម្ហូបអាហារ ឬការកែច្នៃដែលធ្វើឲ្យមានគ្រោះថ្នាក់ដល់សុខភាពអ្នកទទួលទាន ។ ណែនាំដល់អាជីវករឲ្យចេះអនាម័យ រៀបចំទំនិញដាក់លក់ឲ្យមានសណ្ដាប់ធ្នាប់ល្អ ទៅតាមប្រភេទទំនិញហូបចុកនិងទំនិញប្រើប្រាស់ឲ្យនៅដាច់ពីគ្នា ចៀសវាងកំប៉ុង
ក្រពិត ឬប៉ោងបណ្ដាលឲ្យមានច្រេះខាងក្នុង។
លោក តូច ចៅកុយ មានប្រសាសន៍ថា អាជីវករពេលដែលយកទំនិញមកដាក់តាំងលក់ ត្រូវពិនិត្យមើលកាលបរិច្ឆេតឲ្យបានច្បាស់លាស់ ចៀសវាងសមត្ថកិច្ចមកត្រួតពិនិត្យមើលឃើញទំនិញហួសសុពលភាពមួយដងជាពីរដងនៅកន្លែងដដែលៗ ព្រោះមន្ត្រីកាំកុងត្រូលមិនមែនជាក្រុមហ៊ុនស៊ិនទ្រីដើរប្រមូលសម្រាមតាមផ្សារនិងតាមលំនៅដ្ឋានរបស់អាជីវករនោះទេ។
ចែករំលែកព័តមាននេះ