ខេត្តសៀមរាប៖ រហាត់ទឹកឈើដ៏ធំមួយស្ថិតក្នុងទីតាំងបណ្តុះកូនឈើប្រាសាទតាកែវក្នុងឧទ្យានអង្គរ គឺបានកសាងឡើងតាំងពីសម័យសង្គមរាស្ត្រនិយមមក ហើយអមដោយផ្ទះលម្ហែកាយមួយនៅក្បែរនោះ ប៉ុន្តែត្រូវបានរងនូវការខូចខាតស្ទើរបាត់រូបរាងដោយសារអាយុកាល និងសង្គ្រាមនាសម័យប៉ុលពត ។ នេះបើតាមការរៀបរាប់របស់លោកម៉ៃ មួន ដែលជាអតីតអ្នកគ្រប់គ្រងរដ្ឋបាលព្រៃឈើ…
ខេត្តសៀមរាប៖ រហាត់ទឹកឈើដ៏ធំមួយស្ថិតក្នុងទីតាំងបណ្តុះកូនឈើប្រាសាទតាកែវក្នុងឧទ្យានអង្គរ គឺបានកសាងឡើងតាំងពីសម័យសង្គមរាស្ត្រនិយមមក ហើយអមដោយផ្ទះលម្ហែកាយមួយនៅក្បែរនោះ ប៉ុន្តែត្រូវបានរងនូវការខូចខាតស្ទើរបាត់រូបរាងដោយសារអាយុកាល និងសង្គ្រាមនាសម័យប៉ុលពត ។ នេះបើតាមការរៀបរាប់របស់លោកម៉ៃ មួន ដែលជាអតីតអ្នកគ្រប់គ្រងរដ្ឋបាលព្រៃឈើ ខេត្តសៀមរាប ដែលសព្វថ្ងៃបម្រើការនៅនាយកដ្ឋានគ្រប់គ្រងព្រៃឈើទេសភាពវប្បធម៌និងបរិស្ថាននៃអាជ្ញាធរជាតិអប្សរា។
ផេកហ្វេសប៊ុកអាជ្ញាធរជាតិអប្សរាផ្សាយកាលពីថ្ងៃទី១៦ សីហា ២០១៩ថា លោក ម៉ៃ មួន រៀបរាប់ថា ចូលដល់សម័យខ្មែរក្រហម រហាត់ទឹកនេះក៏បានខូចខាតទាំងស្រុង តែក៏ត្រូវបានរដ្ឋបាលព្រៃឈើខេត្តសៀមរាបធ្វើការសាងសង់ឡើងវិញនៅចុងទសវត្សរ៍ទី៨០ ប៉ុន្តែមិនមានផ្ទះលម្ហែកាយដូចមុនទេ ដើម្បីទាញទឹកពីស្ទឹងសៀមរាបមកស្រោចស្រពកូនឈើនៅក្នុងសួនបណ្តុះកូនឈើប្រាសាទតាកែវដែលខ្លួនគ្រប់គ្រង ។
ក្រោយមកពេលអង្គរចូលជាសម្បត្តិបេតិកភណ្ឌពិភពលោក រហាត់ទឹកនិងសួនបណ្តុះកូនឈើប្រាសាទតាកែវ ត្រូវបានប្រគល់សិទ្ធិគ្រប់គ្រងដោយអាជ្ញាធរជាតិអប្សរាជំនួសរដ្ឋបាលព្រៃឈើខេត្តសៀមរាប ។ ក្នុងដំណាក់កាលគ្រប់គ្រងរបស់អាជ្ញាធរជាតិអប្សរា រហាត់ទឹកនេះ ក៏មានការជួសជុលដោយសហការជាមួយជប៉ុន និងសាលាសង្កាត់នគរធំ និងមានដំណើរការផ្គត់ផ្គត់ទឹកសម្រាប់ស្រោចកូនឈើបានតិចតួចប៉ុណ្ណោះ ព្រោះរហាត់ធំ ឯទឹកស្ទឹងមានតិច ។ តែបច្ចុប្បន្ន រហាត់ទឹកនេះ បានរងនូវការខូចខាតជាដំណំ សល់តែរូបរាងពុកផុយមិនអាចដំណើរការបានតែម្តង ។
ដោយមើលឃើញពីតម្លៃដ៏មានសារសំខាន់ក្នុងការទាញយកពីទឹកស្ទឹងសៀមរាប មកស្រោចស្រពកូនឈើនៅសួនបណ្តុះកូនឈើប្រាសាទតាកែវ និងជាអត្តសញ្ញាណមួយនៃខេត្តសៀមរាបតាមរយៈប្រវត្តិនៃរហាត់ទឹកនេះ រួមនឹងតម្រូវការ ផ្សេងៗជាប្រយោជន៍ក្នុងការទាក់ទាញភ្ញៀវទេសជាតិ និងអន្តរជាតិផងនោះ ព្រះតេជគុណព្រះសទ្ធម្មប្បកាសេនី បណ្ឌិត តាត មហាទី ព្រះចៅអធិការវត្តព្រះឥន្ទកោសានិងអាជ្ញាធរជាតិអប្សរា បានស្នើសុំដល់លោកជំទាវឧកញ៉ាសៀង ចាន់ហេង អគ្គនាយិកា ក្រុមហ៊ុន ហេងអភិវឌ្ឍន៍ សុំជួយជួសជុលរហាត់ទឹកនេះឡើងវិញ ។
ជាកិច្ចឆ្លើយតប លោកជំទាវ ក៏បានទទួលយកសំណើរជួសជុលដើម្បីឱ្យរហាត់ទឹកនេះដំណើរការឡើងវិញ ហើយក៏បានស្នើសុំឱ្យខាងអាជ្ញាធរជាតិអប្សរា សិក្សា និងពិភាក្សាអំពីតម្លៃក្នុងការជួសជុល រួមទាំងសម្ភារដែលត្រូវយកមកប្រើប្រាស់ឱ្យបានគង់វង្សយូរអង្វែង ។
អាជ្ញាធរជាតិអប្សរាសូមថ្លែងអំណរគុណដ៏ជ្រាលជ្រៅចំពោះការរួមចំណែករបស់លោកជំទាវឧកញ៉ាសៀង ចាន់ហេង រួមទាំងព្រះតេជគុណព្រះសទ្ធម្មប្បកាសេនី បណ្ឌិតតាត មហាទី ព្រះចៅអធិការវត្តព្រះឥន្ទកោសា ក្នុងការកសាងសមិទ្ធផលក្នុងតំបន់អង្គរជាមួយអាជ្ញាធរជាតិអប្សរាសម្រាប់ជាប្រយោជន៍ដល់ជនរួមជាតិគ្រប់ជំនាន់ ៕ (កែសម្រួលដោយ ៖ បុប្ផា)
ចែករំលែកព័តមាននេះ