បង្គោលខៀវ ស៑ន រ៉ាគីម បំបាក់ជើងខ្លាំង ឡុង ខេត្ត ឲ្យហាល
- ភ្នំពេញ
រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា ការប្រកួតជ្រើសរើសជើងឯក TV5 Knock out Series by K-Cement…
រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា ការប្រកួតជ្រើសរើសជើងឯក TV5 Knock out Series by K-Cement រដូវកាលទី៦ ក្នុងប្រភេទទម្ងន់៦០គីឡូក្រាម កាលពីថ្ងៃទី១៧ សីហា គេមិននឹកស្មានថា កីឡាករបង្គោលខៀវ ស៑ន រ៉ាគីម អាចឈ្នះគូប្រកួត ហើយទម្លាក់បង្គោលក្រហម ឡុង ខេត្ត ដែលជាជើងខ្លាំង ឱ្យហាលអាវបានសម្រេចនោះទេ។ នេះជាការប្រកួតក្នុងវគ្គជម្រុះ៣២នាក់ យកទាំង១៦នាក់ ដើម្បីស្វែងរកអ្នកឈ្នះក្នុងជុំទី១ទាំង១៦ ឱ្យឡើងប្រកួតទម្លាក់គ្នាបន្តយកតែ៨នាក់ ក្នុងសប្ដាហ៍បន្តបន្ទាប់។
ការប្រកួតដែលបានធ្វើឡើងនៅក្នុងសង្វៀនប៉ុស្តិ៍លេខ៥ ព្រែកកំពិស បានទទួលការចាប់អារម្មណ៍ចំពោះមួយគូនេះយ៉ាងខ្លាំង ដោយសារតែអ្នកទាំងពីរ គឺជាគូប្រកួតស៊ីសាច់ហុតឈាម ហើយអ្នកចាញ់ហាលអាវ និងអ្នកឈ្នះបានឡើង។ ខុសពីគូប្រកួតផ្សេងៗ ដែលប្រើរយៈពេលប្រកួត៣ទឹកដូចគ្នា ប៉ុន្តែពេលខ្លះក៏ព្រលែងដៃដាក់គ្នាខ្លះៗ ។ សម្រាប់មួយគូនេះ គេកត់សម្គាល់ថា កីឡាករម្ខាងៗអត់មានសំចៃដៃ ឬទុកមុខឱ្យគ្នាតែម្ដង ពេញរយៈពេល៣ទឹក ដែលនេះ អាចមកពីអ្នកទាំងពីរសុទ្ធតែត្រូវការឡើងទៅកាន់វគ្គបន្ត ហើយមិនចង់ជ្រុះចេញពីកម្មវិធី។
យ៉ាងណាមិញ កីឡាករទាំងពីរមិនអាចទទួលឱកាសឡើងទៅវគ្គបន្តនោះទេ ដោយការប្រកួតបើទោះជាបង្គោលក្រហម ឡុង ខេត្ត ជាកីឡាករជើងខ្លាំង និងមានប្រវត្តិធ្លាប់ខ្លាំងស្ទើរគ្រប់សង្វៀនមកហើយ ក៏បង្គោលខៀវ នៅតែដណ្ដើមបានជ័យជម្នះ។ កីឡាករបង្គោលខៀវ បង្ហាញអារម្មណ៍លោតកញ្ជ្រោលសប្បាយអរចង់ហោះ បន្ទាប់ពីត្រូវបានគណៈកម្មការប្រកាសថា បានឈ្នះពិន្ទុ ដោយសារតែគេប្រកាសថា មិនចង់ជឿថាឈ្មោះរបស់ខ្លួនត្រូវបានប្រកាសឱ្យជាប់ក្នុងវគ្គ៨នាក់ ដែលវគ្គកាន់តែសំខាន់ក្នុងការប្រកួតជើងឯក។
យ៉ាងណាមិញ លោកនៅតែបង្ហាញអារម្មណ៍ភ័យៗសម្រាប់ការប្រកួតជម្រុះក្នុងវគ្គបន្ត ដោយមិនទាន់ដឹងថា នឹងមានសំណាងបែបនឹងម្ដងទៀត ឬ ត្រូវជ្រុះហាលអាវ លែងបានប្រកួតបន្តនោះទេ។ (កែសម្រួលដោយ ៖ បុប្ផា)
ចែករំលែកព័តមាននេះ