រាជធានីភ្នំពេញ ៖ ផ្ទះមួយខ្នងមានទំហំ៦ម៉ែត្រគុណនឹង១៥មែត្រ ជាផ្ទះឈើលើថ្មក្រោមជារបស់បុរសពោះម៉ាយម្នាក់ផ្ទះ ត្រូវបានអគ្គិភ័យឆាបឆេះយ៉ាងសន្ធោសន្ធៅបណ្តាលឱ្យខ្ទេចអស់ទាំងស្រុង តែមិនមានមនុស្សណាម្នាក់រងរបួសនោះទេ ។ ហេតុការណ៍ខាងលើនេះបង្កការភ្ញាក់ផ្អើលកាលពីវេលាម៉ោង៨និង១៥នាទីយប់ថ្ងៃទី១៧ ខែ សីហា…
រាជធានីភ្នំពេញ ៖ ផ្ទះមួយខ្នងមានទំហំ៦ម៉ែត្រគុណនឹង១៥មែត្រ ជាផ្ទះឈើលើថ្មក្រោមជារបស់បុរសពោះម៉ាយម្នាក់ផ្ទះ ត្រូវបានអគ្គិភ័យឆាបឆេះយ៉ាងសន្ធោសន្ធៅបណ្តាលឱ្យខ្ទេចអស់ទាំងស្រុង តែមិនមានមនុស្សណាម្នាក់រងរបួសនោះទេ ។
ហេតុការណ៍ខាងលើនេះបង្កការភ្ញាក់ផ្អើលកាលពីវេលាម៉ោង៨និង១៥នាទីយប់ថ្ងៃទី១៧ ខែ សីហា ឆ្នាំ២០១៩ នៅចំណុចក្បែរវត្តកោះក្របី តាមបណ្ដោយផ្លូវ៣៦៩ ស្ថិតនៅភូមិកោះក្របី សង្កាត់ព្រែកថ្មី ខណ្ឌច្បារអំពៅ ។
តាមប្រភពព័ត៌មានពីសមត្ថកិច្ចបានអោយដឹងថា មុនកើតហេតុ មានប្រជាពលរដ្ឋទូរស័ព្ទរាយការណ៍ថាមានករណីភ្លើងឆេះផ្ទះប្រជាពលរដ្ឋយ៉ាងសន្ធោសន្ធៅ បន្ទាប់ពីទទួលបានព័ត៌មានខាងលើនេះភ្លាម សមត្ថកិច្ចក៏បានប្រមូលកម្លាំងនគរបាលប៉ុស្តិ៍ចុះមកដល់កន្លែងកើតហេតុក៏ឃើញអណ្តាតភ្លើងយ៉ាងសន្ធោសន្ធៅកំពុងលេបត្របាក់ផ្ទះប្រជាពលរដ្ឋ រួចក៏ជួយអន្តរាគមន៍និងរាយការណ៍ទៅក្រុមរថយន្តពន្លត់អគ្គីភ័យចុះមកជួយបាញ់ទឹកពន្លត់ ។ បន្តិចមកក៏មានរថយន្តពន្លត់អគ្គីភ័យជាច្រើនគ្រឿងមកដល់កន្លែងកើតហេតុបានត្រឹមតែបាញ់ទប់ស្កាត់មិនអោយភ្លើងឆេះរាលដាលដល់ផ្ទះប្រជាពលរដ្ឋជិតខាងតែប៉ុណ្ណោះ ចំណែកផ្ទះកើតហេតុត្រូវភ្លើងឆេះអស់គ្មានសល់ទៅហើយ ។
តាមប្រភពពីសមត្ថកិច្ចបានឱ្យដឹងបន្តថា ម្ចាស់ផ្ទះរងគ្រោះខាងលើជាបុរសពោះម៉ាយឈ្មោះ ទិត ជា អាយុ៦៨ឆ្នាំ ជាមន្ត្រីរាជការចូលនិវត្តន៍ ស្នាក់នៅផ្ទះកើតហេតុខាងលើ និងមានកូនប្រុសម្នាក់រស់នៅជាមួយ ប៉ុន្តែមុនពេលកើតហេតុ បុរសជាម្ចាស់ផ្ទះមិនបាននៅផ្ទះនោះទេ ស្រាប់តែឮសំលេងផ្ទុះបង្កជាអណ្តាតភ្លើងឆាបឆេះតែម្ដង ។
ក្នុងហេតុការណ៍ខាងលើនេះដែរ ក៏មានរថយន្តពន្លត់អគ្គីភ័យរបស់បុរីប៉េងហួត, រថយន្តពន្លត់អគ្គិភ័យរបស់ស្នងការខេត្តកណ្ដាល, រថយន្តពន្លត់អគ្គិភ័យរបស់សាលាខណ្ឌច្បារអំពៅ, រថយន្តពន្លត់អគ្គិភ័យរបស់ក្រសួងមហាផ្ទៃ និងរថយន្តពន្លត់អគ្គិភ័យរបស់ការិយាល័យបង្ការពន្លត់អគ្គីភ័យស្នងការរាជធានីភ្នំពេញ សរុប១៥គ្រឿង ដោយបានប្រើប្រាស់បាញ់ពន្លត់អស់ចំនួន៤គ្រឿង ហើយភ្លើងបានរលត់ទៅវិញនៅម៉ោង៩និង៣០នាទីយប់ថ្ងៃដដែល ។
តាមការសន្និដ្ឋានរបស់សមត្ថកិច្ចជាបឋមបានឱ្យដឹងថា មូលហេតុបណ្តាលមកពីទុស្សេខ្សែភ្លើង បណ្តាលឲ្យឆាបឆេះផ្ទះអស់ទាំងស្រុង តែមិនមានមនុស្សណាម្នាក់រងរបួសនោះទេ ៕ (កែសម្រួលដោយ ៖ ធីតា)
ចែករំលែកព័តមាននេះ