រាជធានីភ្នំពេញ ៖ លោក សម រង្ស៊ី អតីតប្រធានគណបក្សសង្គ្រោះជាតិបានប្រកាសជាថ្មីថា នឹងចូលមកស្រុកវិញនៅថ្ងៃទី៩ ខែវិច្ឆិកា ឆ្នាំ២០១៩ ខាងមុខនេះ ។ នេះបើតាមសេចក្តីប្រកាសព័ត៌មានរបស់គណៈកម្មាធិការអចិន្ត្រៃយ៍របស់បក្សប្រឆាំងពីក្រៅប្រទេស ។
សេចក្តីប្រកាសព័ត៌មានបានចេញផ្សាយនៅយប់ថ្ងៃទី១៦ សីហា បានសរសេយ៉ាងដូច្នេះថា «គណបក្សសង្គ្រោះជាតិ សូមជម្រាបជូនសាធារណមតិជាតិ និងអន្តរជាតិឲ្យបានជ្រាបថា នៅវេលាម៉ោង១០ព្រឹក ថ្ងៃទី១៦ ខែសីហា ឆ្នាំ២០១៩ នេះគណៈកម្មាធិការអចិន្ត្រៃយ៍គណបក្សសង្គ្រោះជាតិបានបើកកិច្ចប្រជុំរបស់ខ្លួន ក្រោមអធិបតីភាពលោក សម រង្ស៊ី ប្រធានស្តីទីគណបក្សសង្គ្រោះជាតិ» ។
ប្រភពបានបញ្ជាក់ថា «នៅក្នុងកិច្ចប្រជុំនេះ គណៈកម្មាធិការអចិន្ត្រៃយ៍បានកំណត់យកថ្ងៃទី០៩ ខែវិច្ឆិកា ឆ្នាំ២០១៩ ជាថ្ងៃធ្វើមាតុភូមិនិវត្តន៍ទៅកាន់ប្រទេសកម្ពុជាវិញរបស់ថ្នាក់ដឹកនាំគណបក្សសង្គ្រោះជាតិ ដែលដឹកនាំដោយលោក សម រង្ស៊ី ប្រធានស្តីទីគណបក្សសង្គ្រោះជាតិ»។
សេចក្តីប្រកាសព័ត៌មានដដែលបានបន្ថែមថា ថ្ងៃទី០៩ ខែវិច្ឆិកា ឆ្នាំ២០១៩ ខាងមុខនេះ គឺជាខួបទី៦៦ នៃទិវាឯករាជ្យជាតិ ដែលកម្ពុជាដណ្តើមបានពីអាណានិគមនិយមបារាំង នាថ្ងៃទី០៩ ខែវិច្ឆិកា ឆ្នាំ១៩៥៣ ក្រោមការដឹកនាំរបស់សម្តេចព្រះនរោត្តមសីហនុ ។
យ៉ាងណាក្តីការប្រកាសកំណត់ថ្ងៃចូលស្រុកជាថ្មីត្រូវបានក្រុមលោក កឹម សុខា រិះគន់ថា ជាយុទ្ធសាស្ត្រ ចាក់ប្រេងលើភ្លើងតែប៉ុណ្ណោះ ។
លោក ឈុំ ឈឿន អតីតមន្ត្រីគណបក្សសង្គ្រោះជាតិ ដែលមាននយោបាយគាំទ្រលោក កឹម សុខាបាន លើកឡើងយ៉ាងដូច្នេះថា «យុទ្ធសាស្ត្រ ចាក់សាំងលើភ្លើង ដើម្បីអនុញ្ញាតអោយរដ្ឋាភិបាល បន្ដឃុំខ្លួន លោកប្រធាន កឹម សុខា បន្ដទៀត» ។ លោកបន្តថា កាលពីកំឡុងខែកុម្ភៈ លោក សម រង្ស៊ី បានយកសេរីភាព លោក កឹម សុខា មកភ្នាល់ជាមួយសម្តេចនាយករដ្ឋមន្ត្រីម្ដងរួចមកហើយ ។
លោកបញ្ជាក់ថា «ជាទស្សនៈរបស់ខ្ញុំ លោក សម រង្ស៊ី គ្មានចេតនាវិលចូលស្រុកឡើយបើគ្មានការសម្របសម្រួល ឬបើកភ្លើងខៀវពីបក្សកាន់អំណាច ។ មួយវិញទៀតបើនិយាយតាមន័យសឹក វិញគេមិនដែលប្រកាសការសម្ងាត់ជាសាធារណៈបែបនេះឡើយ មិនដឹងថាគាត់ និងក្រុមគាត់ទៅរៀនយុទ្ធសាស្ត្រមកពីណាទេ ស្រែកថាការងារនេះសម្ងាត់ តែប្រកាសជាសាធារណៈ» ។
ចំណែកលោក អន្ទ ដាយ៉ាត មន្ត្រីជាន់ខ្ពស់គណបក្សប្រជាជនកម្ពុជាបានសរសេលើកបណ្តាយសង្គមយ៉ាងដូច្នេះថា «ទណ្ឌិត សម រង្ស៊ី មិនល្ងង់ចំណាយពេលជិះយន្តហោះចម្ងាយ ៩៩៣៤ គីឡូម៉ែត្រគ្រាន់តែដើម្បីមកចូលលគុកនោះទេ ។ ជាងនោះទៅទៀត អតីតបក្សសង្គ្រោះជាតិត្រូវបានរំលាយដោយអំណាចសាលដីកាតុលាការកំពូល ដូច្នេះមិនត្រូវមានគណកម្មការអចិន្ត្រៃយ៍ខ្មោចយ៎អីទៀតទេ តែបើមានគណកម្មាធិការអចិន្ត្រៃយ៍មែន សេចក្តីប្រកាសព័ត៌មាននេះពិតជាបានរំលោភបំពានសាលដីកាតុលាការកំពូលហើយ វាត្រូវមានទោស» ៕
កែសម្រួលដោយ ៖ សំណាង
ចែករំលែកព័តមាននេះ