អ្នករត់ម៉ារ៉ាតុងម្នាក់ដែលមានអាយុ ៧១ ឆ្នាំបានបំបែកឯតទគ្គកម្មពិភពលោកពាក់កណ្តាលម៉ារ៉ាតុងបន្ទាប់ពីការចូលរួមដ៏អស្ចារ្យនៅក្នុងកម្មវិធី Akron Half Marathon ថ្មីៗមកនេះ ។
លោកយាយឈ្មោះ ជេន្នី រាយស៍ (Jeannie Rice) មកពី Mentor រដ្ឋ Ohio ទីបំផុតបានបង្កើតកំណត់ត្រាពិភពលោកពាក់កណ្តាលម៉ារ៉ាតុងថ្មី កាលពីថ្ងៃទី ១០ ខែសីហានេះបន្ទាប់ពីមានការប៉ុនប៉ងជាច្រើនលើកកន្លងមក ។
សម្រាប់ចម្ងាយផ្លូវ ១៣,១ ម៉ាយល៍លោកយាយ រាយស៍ ប្រើរយៈពេលតែ ១:៣៧:០៧ ប៉ុណ្ណោះ ដោយបានបំបែកកំណត់ត្រាពិភពលោក ៣០ វិនាទីលឿនជាងលោកយាយជនជាតិអូស្ត្រាលីអាយុ ៧០ ឆ្នាំឈ្មោះ ឡាវីណា ប៉េទ្រី (Lavinia Petrie) ដែលប្រើរយៈពេលដល់ទៅ ១ម៉ោង៣៧នាទី៣៨វិនាទី កាលពីឆ្នាំ ២០១៤ ។
លោកយាយ រាយស៍ ត្រូវបានគេស្រង់សម្តីថា «ខ្ញុំមានអារម្មណ៍ល្អហើយខ្ញុំបានធ្វើវា ។ វាអស្ចារ្យណាស់ ! ខ្ញុំមានអារម្មណ៍រំភើបណាស់» ។ «ខ្ញុំមានកំណត់ត្រារត់ពាក់កណ្តាលម៉ារ៉ាតុង» ។
លោកយាយ រាយស៍ ដែលបានរត់ម៉ារ៉ាតុងអស់រយៈពេល ៣៥ ឆ្នាំមកហើយនោះក៏បានបង្កើតឯតទគ្គកម្មពិភពលោក Age-group សម្រាប់ការរត់ម៉ារ៉ាតុងពេញជាមួយនឹងពេលវេលា ៣:៧៧:៥០ កាលពីឆ្នាំមុន ។ លោកយាយបានប្រាប់ Fox8 ថា «កាលពីឆ្នាំមុនខ្ញុំបានបំបែកឯតទគ្គកម្មពិភពលោកនៅ Chicago Marathon ក្នុងពេលវេលា ៣:២៧ ម៉ោង ។
ទោះបីជាលោកយាយមានអាយុច្រើនយ៉ាងណាក៏ដោយក៏មិនដែលរងរបួសអ្វីដែរនៅក្នុងការប្រកួតម្តងៗរហូតដល់បញ្ចប់ ។ រាយស៍ ចាត់ទុកជោគជ័យនេះថាមានសំណាង និងប្រទានពរក្នុងការជៀសវាងពីការរងរបួស ។ ក្នុងការរៀបចំសម្រាប់ការរត់ម៉ារ៉ាតុង (Akron marathon) ពេញក្នុងខែកញ្ញាខាងមុខ លោកយាយកំពុងរត់ចម្ងាយ ៦០ ម៉ាយល៍ក្នុងមួយសប្តាហ៍ ។
ជាអ្នកប្រកបរបររកស៊ីដោយវិជ្ជាជីវម្នាក់ ដំបូងឡើយលោកយាយបានចាប់ផ្តើមរត់តាំងពីអាយុ ៣៥ ឆ្នាំក្នុងគោលបំណងសម្រកទម្ងន់ ។ ជាមួយនឹងកំណត់ត្រាពិភពលោកពីរក្រោមឈ្មោះរបស់លោកយាយ លោកយាយមានបំណងបន្តទៅមុខទៀតហើយព្យាយាមបំបែកកំណត់ត្រាថែមទៀត ។ លោកយាយ រ៉ាយស៍ នឹងធ្វើឱ្យការប៉ុនប៉ងលើកទី ១ របស់លោកយាយចុះកំណត់ត្រាពិភពលោកសម្រាប់ក្រុមអ្នកដែលមានអាយុក្រោមលោកយាយក្នុងព្រឹត្តិការណ៍រត់ម៉ារ៉ាតុង Berlin Marathon ដែលនឹងប្រព្រឹត្តទៅនៅថ្ងៃទី ២៩ ខែកញ្ញា ។
លោកយាយ រាយស៍ ឱ្យដឹងថា «ខ្ញុំនឹងទៅទីក្រុងប៊ែរឡាំងសម្រាប់ការរត់ម៉ារ៉ាតុង ។ ប្រសិនបើខ្ញុំអាចបំបែកឯតទគ្គកម្មពិភពលោករបស់ខ្ញុំ វាពិតជាអស្ចារ្យណាស់សូម្បីតែមួយនាទី ឬកន្លះនាទីក៏ដោយ ។ ខ្ញុំបានកំណត់គោលដៅ ដូច្នេះខ្ញុំមិនចុះចាញ់ទេ ខ្ញុំអាចបន្ដហ្វឹកហាត់យ៉ាងស្វិតស្វាញ»។ ជាងនេះទៅទៀតនោះ គឺលោកយាយក៏កំពុងផ្តោតលើការរត់ម៉ារ៉ាតុងនៅប្រទេសថៃសម្រាប់ចុងឆ្នាំនេះ ហើយបន្ទាប់មកទីក្រុងតូក្យូ និង Boston Marathons នៅឆ្នាំ ២០២០ ៕
ប្រភព៖ nextshark , កែសម្រួលដោយ ៖ សំណាង
ចែករំលែកព័តមាននេះ