ប្រទេសរុស្ស៊ី ៖ រុស្ស៊ីបានសម្ដែងក្ដីត្រេកអរយ៉ាងខ្លាំង ក្រោយពីយន្តហោះដឹកអ្នកដំណើរមួយគ្រឿងជួបគ្រោះថ្នាក់ហ្វូងបក្សីបុកប៉ះនិងចូលក្នុងម៉ាស៊ីនរេអាក់ទ័រ បានអ្នកបើកដែលមានបទពិសោធន៍ខ្ពស់ សម្រេចចុះបន្ទាន់ក្នុងចម្ការពោតមួយ ជួយសង្គ្រោះអាយុជីវិតមនុស្សទាំងអស់ក្នុងយន្តហោះនេះ។ អ្នកបើកយន្តហោះនោះត្រូវបានគេចាត់ទុកជាវីរបុរស។
យន្តហោះធុនAIRBUS A321នោះរបស់ក្រុមហ៊ុនអាកាសចរណ៍រុស្ស៊ី URAL AIRLINES កាលពីថ្ងៃទី១៥សីហាបានចុះចតបន្ទាន់ដ៏អស្ចារ្យ ក្នុងចម្ការពោតមួយជាមួយអ្នកដំណើរ២៣៣នាក់និងបណ្ដាសមាជិកក្រុមយានិក ក្រោយពីបុកហ្វូងសត្វរំពេរមួយហ្វូង ដែលខ្លះចូលក្នុងម៉ាស៊ីននាំឲ្យម៉ាស៊ីនគាំងលែងដើរ។ យន្តហោះនោះដែលមានមុស្សជិះ២២៦នាក់ ក្នុងនោះមានសមាជិកក្រុមយានិក៧នាក់ នាព្រឹកព្រលឹមបានហោះចេញពីព្រលានយន្តហោះJOUKOVSKYនាជាយក្រុងមូស្គូទៅកាន់ទីក្រុងស៊ីមហ្វេរ៉ូប៉ូលទីប្រជុំជនតំបន់គ្រីមេ ហើយបុកប៉ះហ្វូងសត្វរំពេរក្រោយហោះឡើង។
យោងតាមទីភ្នាក់ងារសហព័ន្ធអាកាសចរណ៍រុស្ស៊ី ROSAVIATSIAថា ក្រុមយានិកពេលយន្តហោះគាំងម៉ាសីុនអស់ បានសម្រេចចុះបន្ទាន់ក្នុងចម្ការពោតមួយស្ថិតនៅចម្ងាយជាងមួយគីឡូម៉ែត្រពីព្រលានដោយពុំមានដាក់កង់។ ពេលចុះពុំមានភ្លើងឆាបឆេះណាមួយឡើយ។ គ្រោះថ្នាក់នោះតាមព័ត៌មានពិស្ដារថា បណ្ដាលឲ្យមនុស្ស៧៤នាក់រងរបួសក្នុងនោះមានកុមារ១៩នាក់។ អ្នករបួសភាគច្រើនក្រោយទទួលការព្យាបាល ត្រូវបានបញ្ជូនទៅផ្ទះពួកគេវិញ តែនារីម្នាក់អាយុ៦៩ឆ្នាំស្ថិតក្នុងមន្ទីរពេទ្យនៅឡើយ។
អ្នកនាំពាក្យវិមានក្រឹមឡាំងលោកឌីមីឌ្រីប៉េស្កូវថ្លែងទៅកាន់សារព័ត៌មានថា យើងសូមសរសើរបណ្ដាអ្នកបើកយន្តហោះដែលជាវីរបុរសអាចជួយសង្គ្រោះអាយុជីវិតមនុស្ស ដោយធ្វើការសម្រេចចុះយន្តហោះក្នុងចម្ការពោត។ ចំណែកនាយករដ្ឋមន្ត្រីរុស្ស៊ីលោកឌីមីទ្រីម៉េដវេដេវបានស្នើបំពាក់មេដាយវីរបុរសជូនបណ្ដាអ្នកបើកយន្តហោះនោះ។ ក្រុមហ៊ុនអាកាសចរណ៍៍URAL AIRLINESបានសម្ដែងការសាទរថា ដោយសារមានវិជ្ជាជីវៈខ្ពស់ក្រុមយានិក បានសហការគ្នាសម្រេចចុះបន្ទាន់ដោយធ្វើយ៉ាងណាចៀសវាងបណ្ដាផលវិបាកប្រកបដោយសោកនាដកម្មបាន។
បណ្ដាអ្នកបើកយន្តហោះនោះក៏បានទទួលសារសម្ដែងការអរគុណជាច្រើនតាមបណ្ដាញសង្គមពីសំណាក់បណ្ដាអ្នកដំណើរ។
គួររំលឹកថា ៖ ទើបហោះចេញពីព្រលានបន្តិច ស្រាប់តែយន្តហោះចុះបន្ទាន់ក្នុងចំការពោត… (វីដេអូ) ៕ (កែសម្រួលដោយ ៖ បុប្ផា)
ចែករំលែកព័តមាននេះ