មនុស្សជាច្រើនគិតថា ការរកលុយបានច្រើន គឺជាដំណោះស្រាយសម្រាប់បញ្ហាគ្រប់យ៉ាងដែលកើតមានក្នុងជីវិត ប៉ុន្តែលោក David Bach ដែលជាអ្នកនិពន្ធសៀវភៅ The Latte Factor…
មនុស្សជាច្រើនគិតថា ការរកលុយបានច្រើន គឺជាដំណោះស្រាយសម្រាប់បញ្ហាគ្រប់យ៉ាងដែលកើតមានក្នុងជីវិត ប៉ុន្តែលោក David Bach ដែលជាអ្នកនិពន្ធសៀវភៅ The Latte Factor មិនយល់ស្របនឹងគំនិតនេះទេ ។ ផ្ទុយមកវិញលោកបាននិយាយថា ដំណោះស្រាយបញ្ហាដែលមនុស្សគ្រប់រូបគួរតែជឿជាក់លើ គឺការបង្កើតទម្លាប់ថ្មី ។
លោក Batch បានផ្តល់យោបល់ដល់អ្នកដែលជួបនឹងបញ្ហាហិរញ្ញវត្ថុឲ្យពិចារណាឡើងវិញលើការចាយវាយរបស់អ្នក និងចាប់ផ្តើមផ្លាស់ប្តូរពីចំណុចតូចៗបន្តិចម្តងៗ ។ អ្នកគួរតែគិតពីការចាយវាយលើអ្វីដែលមិនសំខាន់សម្រាប់អ្នកដូចជា កាហ្វេដែលមានតម្លៃជិត៤ដុល្លារក្នុងមួយកែវជាដើម និងពិចារណាថា តើអ្នកគួរតែកាត់បន្ថយការចំណាយលើវាទេ ។ លើសពីនេះទៀត លោកប្រាប់ថា ប្រសិនបើអ្នកយកលុយដែលអ្នកសន្សំទៅវិនិយោគបន្តនោះអ្នកនឹងអាចរកប្រាក់ចំណូលបានបន្ថែមទៀត ។ លោក Chris Reining ដែលសន្សំថវិកាបាន ១លានដុល្លារនៅអាយុ៣៥ឆ្នាំ បានចែករំលែកថា «ខ្ញុំដឹងថា មនុស្សមួយចំនួនប្រាប់មកថា អ្នកមិនគួរព្រួយពីលុយដែលចំណាយលើថ្លៃកាហ្វេជារៀងរាល់ថ្ងៃទេ ប៉ុន្តែពេលដែលខ្ញុំគិតឡើងវិញ ទៅការកាត់បន្ថយថ្លៃកាហ្វេនេះ គឺជាចំណុចចាប់ផ្តើមល្អមួយ» ។
បន្ទាប់ពីកាត់បន្ថយការចាយវាយលើថ្លៃកាហ្វេពេលព្រឹកហើយ លោកបានកាត់បន្ថយការចាយវាយលើថ្លៃអាហារថ្ងៃត្រង់ដែលលោកទិញជារៀងរាល់ថ្ងៃ ហើយក៏កាត់បន្ថយការចាយវាយផ្សេងៗទៀតម្តងបន្តិចៗ ។ លោកបានបន្តថា «ការផ្លាស់ប្តូរតូចៗនឹងជំរុញឲ្យអ្នកមានសមត្ថភាពក្នុងការផ្លាស់ប្តូរទម្លាប់កាន់តែធំ» ។
ក្រៅពីទម្លាប់នេះហើយ អ្នកក៏គួរមានទម្លាប់ទុកដាក់លុយក្នុងគណនីសន្សំ ឬគណនីសម្រាប់វិនិយោគមួយដែរព្រោះ វាជួយឲ្យអ្នកចៀងវាងការចាយវាយខ្ជះខ្ជាយ ។ ក្រៅពីនេះហើយ អ្នកគួរតែនៅជិតមនុស្សដែលជោគជ័យ និងមានគោលដៅច្បាស់លាស់ដែលអាចជួយឲ្យអ្នកបង្កើនប្រាក់ចំណូល ។
លោក Randall Bell ដែលជាអ្នកនិពន្ធម្នាក់ទៀតបានឲ្យដឹងដែរថា អ្វីដែលអ្នកធ្វើជារៀងរាល់ថ្ងៃគឺពិតជាសំខាន់ណាស់ ។ មនុស្សដែលជោគជ័យភាគច្រើនបានទៅដល់កម្រិតដែលពួកគេឈរនេះគឺមកពីទម្លាប់អ្នកមានដែលតែងតែជួយឲ្យពួកគេដើរមុខអ្នកដទៃជានិច្ច ៕ កែសម្រួលដោយ ៖ សុឃាក់
ចែករំលែកព័តមាននេះ