ប្រទេសមីយ៉ាន់ម៉ា ៖ មនុស្សយ៉ាងតិច១៤នាក់បានត្រូវស្លាប់កាលពីថ្ងៃទី១៥សីហា នៅភាគខាងកើតមីយ៉ាន់ម៉ា ក្នុងការប្រយុទ្ធគ្នា នានារវាងកងទ័ពនិងបណ្ដាក្រុមឧទ្ទាម ដែលជាលើកដំបូងវាយប្រហារប្រឆាំងសាលាយោធាមួយកន្លែង។
មានការវាយប្រហារ៥របស់ពួកឧទ្ទាមជនជាតិភាគតិច នាព្រឹកថ្ងៃទី១៥សីហានៅPYIN OO LWINជាទីក្រុងទេសចរណ៍មួយស្ថិតនៅជិតក្រុងម៉ាន់ដាឡៃ ដែលមានបន្ទាយទាហានជាច្រើន។ សាលាយោធាមួយរងការវាយប្រហារជាពិសេសដោយការបាញ់គ្រាប់រ៉ុក្កែត។ កងទ័ពបានតបតវិញ ដោយបើកប្រតិបតិ្តការមួយប្រឆាំងក្រុមឧទ្ទាមទាំងនេះ។
សាកសពទាហាន៥នាក់និងសាកសពប៉ូលិស៤នាក់ ត្រូវបានរាប់ឃើញក្នុងប៉ុស្តិ៍ប៉ូលិសមួយ ដែលជាគោលដៅនៃការវាយប្រហាររបស់ពួកឧទ្ទាម។ នៅទីតាំងមួយទៀតមនុស្ស៣នាក់ ក្នុងនោះមានទាហាន២នាក់និងជនសីុវិលម្នាក់បានត្រូវស្លាប់ ហើយការប្រយុទ្ធគ្នានៅបន្តទៀត។ នេះជាការអះអាងរបស់អ្នកនាំពាក្យយោធាម្នាក់ឧត្ដមសេនីយZAW MIN TUN។
ក្រុមឧទ្ទាមកងទ័ពរំដោះជាតិTAAUNGជាក្រុមឧទ្ទាមសំខាន់មួយ នៅភាគឦសានប្រទេសបានប្រកាសទទួលខុសត្រូវ ចំពោះការវាយប្រហារទាំងនេះដែលថា ដោយរួមសហការជាមួយក្រុមឧទ្ទាមដទៃៗទៀត មានក្រុមកងទ័ពសម្ព័ន្ធភាពប្រជាធិបតេយ្យជាតិមីយ៉ាន់ម៉ានិងក្រុមកងទ័ពអារ៉ាកានជាដើម។ អ្នកនាំពាក្យម្នាក់របស់ក្រុមឧទ្ទាមនោះនិយាយថា កងទ័ពបានធ្វើការវាយលុកនានាក្នុងតំបន់របស់យើងហើយយើងបានប្រយុទ្ធដើម្បីការពារខ្លួន។
កងទ័ពមីយ៉ាន់ម៉ាកាលពីខែកក្កដាបានធ្វើការវាយឆ្មក់សំខាន់ៗ ប្រឆាំងបណ្ដាមន្ទីរពិសោធន៍គ្រឿងញៀនក្នុងរដ្ឋសានជិតខាង ដែលអាចចាប់រឹបអូសយកបានគ្រឿងញៀន មេតំហ្វេតាមីនជាច្រើនរយគីឡូក្រាម។ ពួកឧទ្ទាមទាំងនោះដែលធ្វើការវាយប្រហារនានាក្នុងពេលនេះ ប្រហែលជាការសងសឹងចំពោះការវាយលុកនោះរបស់កងទ័ពបំផ្លាញផលប្រយោជន៍របស់ពួកគេ៕ (កែសម្រួលដោយ ៖ បុប្ផា)
ចែករំលែកព័តមាននេះ