មន្ត្រីជាន់ខ្ពស់ CPP ៖ លទ្ធិប្រជាធិបតេយ្យមិនស្លាប់ទេនៅកម្ពុជា ស្លាប់តែអតីតបក្សប្រឆាំងប៉ុណ្ណោះ

ថ្ងៃទី ១៦ ខែ សីហា ឆ្នាំ ២០១៩
ម៉ោង ១៦:១៣
អ៊ាង ប៊ុនរិទ្ធ

រាជធានីភ្នំពេញ ៖ មន្ត្រីជាន់ខ្ពស់ និងជាអ្នកនាំពាក្យគណបក្សប្រជាជនកម្ពុជា លោក សុខ ឥសាន បានអះអាងថា លទ្ធិប្រជាធិបតេយ្យនៅក្នុងប្រទេសកម្ពុជាមិនស្លាប់នោះទេ ផ្ទុយទៅវិញអតីតគណបក្សប្រឆាំង គឺជាអ្នកស្លាប់នៅកម្ពុជា ។ ការអះអាងរបស់មន្ត្រីជាន់ខ្ពស់បក្សកាន់អំណាចនេះ បន្ទាប់ក្រុមប្រឆាំង ពិសេសអតីតមេបក្សប្រឆាំងលោក សម រង្ស៊ី បានអះអាងថា លិទ្ធប្រជាធិបតេយ្យនៅកម្ពុជាកំពុងតែជាប់គាំង ដោយសារគ្មានបក្សប្រឆាំង ។ ជាងនេះកំពុងតែដើរថយក្រោយថែមទៀតផង ។

យ៉ាងណាក្តីលោក សុខ ឥសាន បានឲ្យដឹងនៅថ្ងៃទី១៦ សីហាថា រាជរដ្ឋាភិបាលបានកំពុងខិតខំកសាង និងអភិវឌ្ឍន៍ប្រទេសមិនដូចការលើកឡើងរបស់ក្រុមប្រឆាំងនោះទេ ។ លោកដាក់សំណួរថា តើការខិតខំកសាង និងអភិវឌ្ឈន៍ប្រទេសឲ្យរីកចម្រើនដូចសព្វថ្ងៃជាការបម្រើចិនយួនដូចពួកប្រឆាំងថា ប្ញទេ ? មិនមែនទេ គឺពិតជាបម្រើផលប្រយោជន៍ ខ្មែរយ៉ាងច្បាស់ដែលប្រជាជនកម្ពុជាគ្រប់រូបរួមទាំងអ្នកគាំទ្រអតីតបក្សប្រឆាំងផងក៏បានទទួលផលប្រយោជន៍គ្រប់គ្នា ។

លោកបន្តថា មេឧទ្ទាមក្រៅច្បាប់សម រង្ស៊ី ថា ចូលទៅក្នុងស្រុកដើម្បីស្តាលទ្ធិប្រជាធិបតេយ្យឡើងវិញនោះមិនអាចនោះទេ ព្រោះថា ប្រជាធិបតេយ្យនៅកម្ពុជាមានដែលបាត់បង់ពីកាលណាបានជាទៅស្តានោះ ។ លោកបានបញ្ជាក់ថា ៖«ប្រជាធិបតេយ្យនៅកម្ពុជាមិនស្លាប់ទេ គឺអតីតបក្សប្រឆាំងទេ ដែលបានងាប់បាត់ពីសង្គមកម្ពុជា តាំងពីឆ្នាំ២០១៧មកម្លេះ ។ ការបោះឆ្នោតមានកំណត់ជាក់លាក់ក្នុងរដ្ឋធម្មនុញ្ញរួចហើយ ទោះបីមាន ឬគ្មានការយល់ព្រមពីគណបក្សណាក៏ការបោះឆ្នោតនៅតែប្រព្រឹត្តទៅតាមកាលកំណត់ដដែល» ។ លោកបន្ថែមថា រាជ រដ្ឋាភិបាលកម្ពុជាមានជំហរកភាព និងស៊ីសង្វាក់គ្នាជាប្រព័ន្ធ ឯមជ្ឈដ្ឋានប្រឆាំងក៏មានជំហរមួលបង្កាច់សភាពការណ៍ស៊ីសង្វាក់គ្នាជាប្រព័ន្ធដែរ ដែលចំណុចនេះផ្ទុយគ្នា ។

លោកបន្ថែមថា ប្រទេសកម្ពុជាត្រូវការសង្គ្រោះនៅឆ្នាំ១៩៧៩ នៅពេលនេះដែលកម្ពុជាមានសន្តិភាព កម្ពុជាមិនត្រូវការសង្គ្រោះអីទេ គឺត្រូវការកសាង និងអភិវឌ្ឈន៍ ។ ក្រោយការបោះឆ្នោតចប់សព្វគ្រប់ហើយគណបក្សឈ្នះឆ្នោតគ្មានអ្វីត្រូវនិយាយជាមួយគណបក្សដែលត្រូវច្បាប់រំលាយចោលរួចហើយទេ ។ ជាមួយគ្នានោះដែរ លោកក៏បានចំអកទៅកាន់ក្រុមប្រឆាំងពិសេសនោះ គឺលោកសម រង្ស៊ី ថា យ៉ាងដូច្នេះថា អ្នកណាដែលរាជរដ្ឋាភិបាលកំពុងទឹកដល់ច្រមុះនោះមិនពិតទេ គឺក្រុមឧទ្ទាមខ្មែរក្រៅច្បាប់និរទ្ទេសខ្លួននៅក្រៅស្រុកទេ ឬដែលកំពុងទឹកដល់ច្រមុះនោះ ។សូមជម្រាបថា ការលើកឡើងរបស់អ្នកនាំពាក្យគណបក្សកាន់អំណាចនេះ ខណៈដែល លោកសម រង្ស៊ី បានកំពុងតែបង្ហាញវត្តមាននៅប្រទេសម៉ាឡេស៊ី ដើម្បីជួបជាមួយអ្នកគាំទ្រខ្លួន ៕ កែសម្រួលដោយ ៖ សុឃាក់