រាជធានីភ្នំពេញ ៖ ហិបវិញ្ញាសាសម្រាប់ដំណើរការសំណេរនៃការប្រឡងសញ្ញាបត្រមធ្យមសិក្សាទុតិយភូមិចំណេះទូទៅ និងបំពេញវិជ្ជាសម័យប្រឡង ថ្ងៃទី១៩ ខែសីហានេះ ត្រូវបានដឹកជញ្ជូនទៅដល់គោលដៅ ដោយសុវត្ថិភាពហើយ ។ នេះបើតាមគេហទំព័រហ្វេសប៊ុក…
រាជធានីភ្នំពេញ ៖ ហិបវិញ្ញាសាសម្រាប់ដំណើរការសំណេរនៃការប្រឡងសញ្ញាបត្រមធ្យមសិក្សាទុតិយភូមិចំណេះទូទៅ និងបំពេញវិជ្ជាសម័យប្រឡង ថ្ងៃទី១៩ ខែសីហានេះ ត្រូវបានដឹកជញ្ជូនទៅដល់គោលដៅ ដោយសុវត្ថិភាពហើយ ។ នេះបើតាមគេហទំព័រហ្វេសប៊ុក របស់ក្រសួងអប់រំ យុវជន និងកីឡា ចេញផ្សាយនៅថ្ងៃទី១៦ សីហានេះ ។
ក្រសួងបានឲ្យដឹងថា ហិបវិញ្ញាសាទាំងនេះនឹងត្រូវបានរក្សាទុកប្រកបដោយសុវត្ថិភាព ក្រោមការពិនិត្យយ៉ាងហ្មត់ចត់ ដោយស្មារតីទទួលខុសត្រូវខ្ពស់ពីសំណាក់គណៈមេប្រយោគ គណៈកម្មការអប្បមាទទូទាំងប្រទេស ព្រមទាំងអាជ្ញាធរដែនដីដែលពាក់ព័ន្ធ ដើម្បីរក្សាបាននូវស្តង់ដានៃការប្រឡងប្រកបដោយប្រសិទ្ធភាពខ្ពស់ ។
សូមបញ្ជាក់ថា សម្រាប់ការប្រឡងសញ្ញាបត្រមធ្យមសិក្សាទុតិយភូមិឆ្នាំ២០១៩នេះ មានមណ្ឌលប្រឡងសរុបចំនួន២០២ មណ្ឌល ក្នុងនោះថ្នាក់វិទ្យាសាស្ត្រមាន៧៥មណ្ឌល និងថ្នាក់វិទ្យាសាស្ត្រសង្គមមាន១២៧មណ្ឌល មាន៤៧២៥បន្ទប់ ។
ដោយមានបេក្ខជនប្រឡងសរុបចំនួន១១៧០២៤នាក់ ក្នុងនោះមានស្រីចំនួន៦០៤២១នាក់ ហើយថ្នាក់វិទ្យាសាស្ត្រមានចំនួន៤៤៦៨៣នាក់ ស្រី២៥២៨៥នាក់ មាន១៨១០បន្ទប់ និងថ្នាក់វិទ្យាសាស្ត្រសង្គមមានចំនួន៧២៣៤១នាក់ ស្រី៣៥១៣៦នាក់ មាន២៩១៥បន្ទប់ ៕ កែសម្រួលដោយ ៖ សុឃាក់
ចែករំលែកព័តមាននេះ