ខេត្តបន្ទាយមានជ័យ ៖ បើតាមសេចក្តីរាយការណ៍បឋមបានឱ្យដឹងថា សពបុរសម្នាក់ដែលបង្កឱ្យមានការភ្ញាក់ផ្អើល ក្រោយពីត្រូវគេប្រទះឃើញស្លាប់ដោយចង.កនឹងរន្ទា ប៉ុន្តែជើងបែរជាឈរដល់ការ៉ូនៅក្នុងអគារការដ្ឋានសំណង់មួយនាទឹកដីកាស៊ីណូ នៅក្រុងប៉ោយប៉ែត កាលពីរសៀលម្សិលមិញថ្ងៃទី១៥ ខែសីហា ឆ្នាំ២០១៩នោះ ពេលនេះស្គាល់អត្តសញ្ញាណហើយ។
សេចក្តីរាយការណ៍បន្តថា ជនរងគ្រោះខាងលើឈ្មោះ ធី អាង អាយុ28ឆ្នាំ ។
ចំណែកស្ត្រីឈ្មោះស្រី ថិក អាយុ56ឆ្នាំ ជាម្តាយជនរងគ្រោះ មានទីលំនៅភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ បានប្រាប់ថា កូនរបស់គាត់ជាពលករធ្វើការសំណង់នៅក្រុងបាងកក ប្រទេសថៃ។គាត់បន្តថា ជនរងគ្រោះបានមកលេងគាត់ និងសាច់ញាតិកាលពីសប្តាហ៍មុន ហើយបានចាកចេញពីគាត់ដោយប្រាប់ថា គេទៅប្រទេសថៃវិញកាលពីថ្ងៃទី12ខែសីហា ដោយមានថវិកាជាប់ខ្លួនតែ1ម៉ឺនបាតប្រាក់ថៃប៉ុណ្ណោះ ប៉ុន្តែដឹងអីពេលទទួលដំណឹងបែរជារឿងអកុសលថា កូនគាត់បានចង.កសម្លាប់ខ្លួនទៅវិញ។
បើតាមសមត្ថកិច្ចជំនាញប្រាប់ថា យោងតាមការត្រួតពិនិត្យ និងធ្វើកោសល្យវិច័យយ៉ាងល្អិតល្អន់ពីគ្រូពេទ្យបញ្ជាក់ថា ជនរងគ្រោះខាងលើធ្វើអត្តឃាតចង.កសម្លាប់ខ្លួនពិតប្រាកដមែន។ ដោយពិនិត្យឃើញថា ជាប់នឹងខ្លួនសពជនរងគ្រោះបានបន្សល់ប្រាក់តែជាង100បាតទេ ដែលករណីនេះ ធ្វើឲ្យឱពុកម្តាយសពសង្ស័យថា កូនគាត់ប្រហែលជាអស់ប្រាក់ដោយសារតែអ្វីមួយ ទើបគិតខ្លីបញ្ចប់ជីវិតបែបនេះ។
ពួកគាត់ក៏ព្រលយសំដីថា សង្ស័យអស់ប្រាក់ដោយសារស្រីក៏ថាបាន ព្រោះកូនគាត់ពូកែណាស់ខាងញ៉ែស្រី ហើយធ្លាប់មានប្រពន្ធ3នាក់រួចទៅហើយដែរ នេះមិនគិតពីស្រីលេងសើចផង។ ប៉ុន្តែដោយសារជីវភាពក្រីក្រឱពុកម្តាយ និងសាច់ញាតិបង្ខំចិត្តបូជាសពខាងលើនៅវត្តបាលិលេយ្យ ក្នុងក្រុងប៉ោយប៉ែត ដោយយកធាតុជនរងគ្រោះត្រឡប់ទៅផ្ទះវិញ។
គួរបញ្ជាក់ថា ៖ អ្នកឃើញរឿងហេតុមានមន្ទិលថា មិនគួរសោះ ជើងដល់ការ៉ូ ហេតុអ្វី? ផ្អើលពេញការដ្ឋាន ។ (កែសម្រួលដោយ ៖ បុប្ផា)
ចែករំលែកព័តមាននេះ