រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា ជនសង្ស័យម្នាក់ដើរទិញអេតចាយ ត្រូវបានសមត្ថកិច្ចឃាត់ខ្លួនកាលពីម៉ោង៥ល្ងាច ថ្ងៃទី១៤ ខែសីហា ឆ្នាំ២០១៩ នៅតាមផ្លូវបណ្ដោយផ្លូវបេតុងភូមិព្រៃស្ពឺ សង្កាត់ចោមចៅទី២ ខណ្ឌពោធិ៍សែនជ័យ ។
សេចក្តីរាយការណ៍បន្តថា ជនសង្ស័យឈ្មោះ ប៉ុល ពៅ ភេទប្រុស អាយុ៤០ឆ្នាំ មុខរបរដើរទិញអេតចាយ ស្នាក់នៅម្ចាស់ផ្ទះថៅកែអេតចាយ ភូមិ១ សង្កាត់ចោមចៅ២ ខណ្ឌពោធិ៍សែនជ័យ មានស្រុកកំណើតនៅភូមិព្រៃពោធិ៍ ឃុំដូនស ស្រុកស្វាយជ្រំ ខេត្តស្វាយរៀង ។ ចំណែកជនរងគ្រោះឈ្មោះ គន ហីម ភេទប្រុស អាយុ៥៩ឆ្នាំ មុខរបររើសអេតចាយ ស្នាក់នៅភូមិទួលពង្រ សង្កាត់ចោមចៅទី១ ខណ្ឌពោធិ៍សែនជ័យ មានស្រុកកំណើតនៅភូមិព្រៃទឹង ឃុំព្រៃទឹង ស្រុកស៊ីធរកណ្តាល ខេត្តព្រៃវែង ។
តាមប្រភពពីជនរងគ្រោះនិយាយប្រាប់ថា នៅមុនពេលកើតហេតុនៅអាទិត្យមុន គាត់បានយកម៉ូតូរ៉ឺម៉ក់ទៅជួសជុលដោយទុកម៉ូតូរ៉ឺម៉ក់នោះនៅកន្លែងជាង ស្រាប់តែត្រូវចោរលួចបាត់ គាត់ក៏បានទៅដាក់ពាក្យបណ្តឹងនៅសង្កាត់ដង្កោរួចមកហើយ តែជាងដែលជួសជុលម៉ូតូរ៉ឺម៉ក់គាត់នោះបានជួយចេញលុយចំនួន៥០ម៉ឺនរៀលជាថ្លៃបង់ខាតខ្លះ។
ប្រភពដដែលបន្តទៀតថា លុះនៅម៉ោងកើតហេតុខាងលើ ស្រាប់តែឃើញជនសង្ស័យម្នាក់បើកម៉ូតូរ៉ឺម៉ក់របស់គាត់កំពុងដើរទិញអេតចាយតែម្តង គាត់ក៏ប្តឹងសមត្ថកិច្ចឃាត់ភ្លាមៗផងដែរ ។
ក្រោយពេលឃាត់ខ្លួន ជនសង្ស័យបានសារភាពថា ម៉ូតូរ៉ឺម៉ក់សណ្តោងខាងលើនេះ ថៅកែរបស់គាត់បានទិញពីបុរសម្នាក់ដោយមិនស្គាល់អត្តសញ្ញាណនោះទេ ហើយថៅកែបានយកម៉ូតូរ៉ីម៉ក់នោះមកឲ្យគាត់ដើរទិញអេតចាយ ។
ក្រោយពេលកើតហេតុ កម្លាំងនគរបាលប៉ុស្តិ៍ចោមចៅទី២ បាននាំជនសង្ស័យ ព្រមទាំងភស្តុតាងម៉ូតូរ៉ឺម៉ក់សណ្តោងខាងលើបញ្ជូនទៅខណ្ឌដង្កោ ដើម្បីឱ្យសមត្ថកិច្ចចាត់ការតាមនីតិវិធី ៕ (កែសម្រួលដោយ ៖ បុប្ផា
ចែករំលែកព័តមាននេះ