មនុស្សខ្លះគេមានសន្តានចិត្តល្អ តែនៅពេលឃើញយើងប្រព្រឹត្តនូវអំពើឆ្គាំឆ្គងអ្វីមួយ គេមិនហ៊ានប្រាប់យើងទេ ព្រោះខ្លាចយើងយល់ខុសបែរជាទៅខឹងនាំឱ្យល្អក់កករនឹងគ្នា តែគេអាចធ្វើជាមិត្តល្អនឹងយើងបាន បើគេសរសើរយើងក្នុងផ្លូវល្អ ក្នុងគោលបំណងឲ្យយើងមាននូវស្មារតីវៀរចាកអំពើសៅហ្មងនោះដោយខ្លួនឯង និងប្រាប់ឱ្យយើងដឹងនូវកំហុសឆ្គងទាន់ពេលវេលា នាំឱ្យបានប្រយោជន៍ ។
តាមធម្មតានៅក្នុងសង្គម មានមនុស្សច្រើនប្រភេទណាស់ ប៉ុន្តែការជ្រើសរើសមិត្តមិនមែនជាការផ្សងព្រេងដូចចាក់ឆ្នោតទេ គឺត្រូវតែសិក្សាអំពីលក្ខណៈរបស់មនុស្សឲ្យបានច្បាស់លាស់ ។
ដូចព្រះពុទ្ធជាកល្យាណមិត្តមួយព្រះអង្គដ៏កំពូលជាមួយនឹងពុទ្ធបរិស័ទទូទៅ ការប្រព្រឹត្តព្រហ្មចរិយធម៌រហូតបានសម្រេចទាំងមូល ដោយអាស្រ័យព្រះអង្គជាកល្យាណមិត្ត តាមដានពិនិត្យការប្រព្រឹត្តរបស់យើងរាល់ថ្ងៃ ខុស ឬត្រូវយ៉ាងណាៗ ព្រះអង្គហ៊ានជួយថា ចាំជួយប្រាប់ និងជួយបង្ហាញផ្លូវត្រូវឱ្យដើរតាមគន្លងព្រះធម៌ទៀតផង ។
មនុស្សល្អកម្ររកបានណាស់ មនុស្សល្អធ្វើអាក្រក់បានដោយលំបាក ប៉ុន្តែមនុស្សអាក្រក់ធ្វើបាបបានដោយងាយ ថែមទាំងមិនចេះឆ្អែតក្នុងអំពើអបាយនោះទៀតផង ។ (ដោយសាន សារិន)
ចែករំលែកព័តមាននេះ