ខេត្តមណ្ឌលគិរី ៖ ប្រជាពលរដ្ឋរងគ្រោះដោយជំនន់ទឹកភ្លៀង ៥២៥គ្រួសារ នៅភូមិចំនួនបី ក្នុងឃុំណងឃិលឹក ស្រុកកោះញែក ខេត្តមណ្ឌលគិរី បានទទួលអំណោយមនុស្សធម៌ពីអភិបាលខេត្តមណ្ឌលគិរី កាលពីថ្ងៃទី១៥-១៦…
ខេត្តមណ្ឌលគិរី ៖ ប្រជាពលរដ្ឋរងគ្រោះដោយជំនន់ទឹកភ្លៀង ៥២៥គ្រួសារ នៅភូមិចំនួនបី ក្នុងឃុំណងឃិលឹក ស្រុកកោះញែក ខេត្តមណ្ឌលគិរី បានទទួលអំណោយមនុស្សធម៌ពីអភិបាលខេត្តមណ្ឌលគិរី កាលពីថ្ងៃទី១៥-១៦ ខែសីហានេះ ។
ឯកឧត្តមស្វាយ សំអ៊ាង មានប្រសាសន៍ថា ផ្តាំផ្ញើដល់បងប្អូនប្រជាពលរដ្ឋទាំងអស់ សូមយកចិត្តទុកដាក់ទៅលើសុខុមាលភាពគ្រួសារ និងសង្គមដោយក្នុងនោះត្រូវយកចិត្តទុកដាក់ថែទាំសុខភាព ពិសាទឹកដាំពុះ មានអនាម័យក្នុងការរស់នៅ សម្អាតបរិស្ថានជុំវិញផ្ទះ លុបបំបាត់ជម្រកសត្វមូស ដែលជាប្រភពជំងឺគ្រុនចាញ់ គ្រុនឈាម គេងក្នុងមុងជានិច្ច និងត្រូវទៅមន្ទីរពេទ្យជាបន្ទាន់ នៅពេលមានរោគសញ្ញានៃជំងឺឆ្លងណាមួយ ដើម្បីសង្គ្រោះជីវិតឱ្យបានទាន់ពេលវេលា ។ ម្យ៉ាងទៀត សូមឱ្យអាណាព្យាបាលទាំងអស់ត្រូវមើលថែកូនក្មួយ ឫចៅឱ្យបានល្អប្រយ័ត្នលង់ទឹក ឫជួបឧបទ្ទវហេតុផ្សេងៗ ដែលនាំឱ្យវិប្បដិសារីអស់មួយជីវិត ហើយសូមបង្កើនការប្រុងប្រយ័ត្ន ចំពោះបាតុភូទផ្គររន្ទះ និងគ្រោះធម្មជាតិនានាដែលបង្កឡើងដោយបម្រែបម្រួលអាកាសធាតុ និងត្រូវចៀសឱ្យឆ្ងាយពីគ្រឿងញៀន និងគ្រឿងឧបាយមុខផ្សេងៗ ។
ឯកឧត្តមបានណែនាំដល់មន្ត្រីជំនាញ និងអាជ្ញាធរមូលដ្ឋានទាំងអស់ត្រូវសហការគ្នាយកចិត្តទុកដាក់លើការងារបង្កបង្កើនផលដំណាំរបស់ប្រជាកសិករ និងត្រូវជួសជុលលើបញ្ហាហេដ្ឋារចនាសម្ព័ន្ធនានា ដែលរងនូវការខូចខាតដោយជំនន់ទឹកភ្លៀង ដើម្បីធ្វើយ៉ាងណាជួយសម្រួលការធ្វើដំណើររបស់ប្រជាពលរដ្ឋ មានលក្ខណៈងាយស្រួល ។
នាឱកាសនោះដែរឯកឧត្តមស្វាយ សំអ៊ាង បាននាំយកអំណោយកាកបាទក្រហមកម្ពុជាចែកជូនដល់ប្រជាពលរដ្ឋរងគ្រោះដោយជំនន់ទឹកភ្លៀងចំនួនបីភូមិ ស្មើនឹងចំនួន៥២៥គ្រួសារក្នុងនោះមានភូមិណងបួរ ភូមិកោះម្យើលលើ និងកោះម្យើលក្រោម ក្នុងឃុំណងឃិលឹក ស្រុកកោះញែក ក្នុងមួយគ្រួសារទទួលបានគ្រឿងឧបភោគបរិភោគ និងថវិកាមួយចំនួនផងដែរ ។
បន្ទាប់មកថ្នាក់ដឹកនាំខេត្ត និងគណៈប្រតិភូអមដំណើរបានចុះពិនិត្យស្ថានភាពផ្លូវ លូ និងស្ពាន ដែលរងនូវការខូចខាត់ដោយគ្រោះជំនន់ទឹកភ្លៀង ហើយក៏បានណែនាំដល់មន្ទីរអង្គភាពជំនាញ ត្រូវពិនិត្យ និងធ្វើការជួសជុលឡើងវិញ ដើម្បីបង្កលក្ខណៈងាយស្រួលដល់បងប្អូនប្រជាពលរដ្ឋធ្វើដំណើរទៅមកផងដែរ ៕ កែសម្រួលដោយ ៖ សុឃាក់
ចែករំលែកព័តមាននេះ