ឧកញ៉ា គង់ ក្រឹង និងមនុស្ស៦នាក់ មាន កូននិងមេការ…ចូលខ្លួនបំភ្លឺ

ថ្ងៃទី ១៥ ខែ សីហា ឆ្នាំ ២០១៩
ម៉ោង ១៧:៤២
ប៊ុន លីនណា

ខេត្តក្រចេះ ៖ អ្នករកស៊ីឈើប្រចាំស្រុកស្នួលខេត្តក្រចេះដ៏ល្បីល្បាញ គឺឧកញ៉ា គង់ ក្រឹង ព្រមទាំងមនុស្ស៦នាក់ផ្សេងទៀត ក្នុងនោះរួមមានកូនប្រុស១នាក់ និងមេកា៥នាក់ ត្រូវបានចូលខ្លួនឆ្លើយបំភ្លឺនៅទីបញ្ជាការអាវុធហត្ថខេត្តក្រចេះ នៅថ្ងៃទី១៥ សីហា នេះ ពាក់ព័ន្ធជំនួញបទល្មើសព្រៃឈើ ។ នេះជាការចូលខ្លួនមកបំភ្លឺរបស់លោកឧកញ៉ា គង់ ក្រឹង ដែលកន្លងមកត្រូវបានគេដឹងថា មានជាប់ពាក់ព័ន្ឋនិងជំនួញឈើខុសច្បាប់ទ្រង់ទ្រាយធំ និងមានទីតាំងសិប្បកម្មកែច្នៃឈើដ៏ធំ នៅជាប់ព្រំដែនត្រពាំងស្រែ ក្នុងស្រុកស្នួល ទៅតាមលិខិតរបស់លោកឧត្តមសេនីយ៍ ឯក ហុង វិណុល មេបញ្ជាការរងកងរាជអាវុធហត្ថលើផ្ទៃប្រទេស និងជាប្រធានក្រុមការងារ ទប់ស្កាត់ និងបង្ក្រាបបទល្មើសធនធានធម្មជាតិ ដែលបានចេញលិខិតកាលពីដើមខែសីហា។

ការចេញលិខិតហៅរបស់លោកឧត្តមសេនីយ៍ឯក ហុង វីណុល លើឧកញ៉ាគង់ ក្រឹង ឲ្យចូលខ្លួនបំភ្លឺលើករណីបទល្មើសព្រៃឈើ បានធ្វើឡើងក្នុងយុទ្ឋនាការបង្ក្រាបបទល្មើស ព្រៃឈើទ្រង់ទ្រាយធំពីក្រុមគណៈកម្មាធិការថ្នាក់ជាតិ ដែលបានចុះអនុវត្តយ៉ាងក្តៅគគុក នៅតាមខេត្តតំបន់ភូមិភាគឥសាន្តតាំងពីដើមខែកក្កដា មកលើសកម្មភាពស្រាវជ្រាវបង្ក្រាបបទល្មើសព្រៃឈើ ហើយសម្រាប់ខេត្តក្រចេះ ក៏បានបើកយុទ្ធនាការចុះប្រតិបត្តការស្រាវជ្រាវរុករក ដើមខែសីហានេះ។

ក្នុងយុទ្ធនាការបង្ក្រាបបទល្មើសព្រៃឈើដែលបានអនុវត្ត ឡើងក្នុងក្របខណ្ឌទូទាំងប្រទេសនារយៈពេល
កន្លងមកនេះ កាលពីថ្ងៃទី៥ សីហា កន្លងទៅ នាយឧត្តមសេនីយ៍សៅ សុខា មេបញ្ជារងកងយុទ្ឋពលខេមរភូមិន្ទ និងជាមេបញ្ជាការកងរជអាវុធហត្ថលើផ្ទៃប្រទេស និងជាប្រធានគណៈកម្មការជាតិបង្ក្រាបបទល្មើសធនធានធម្មជាតិ បានដឹកនាំក្រុមគណៈ កម្មាធិការចុះពិនិត្យទីតាំងនានា នៅតំបន់ទាំងក្នុងនិងក្រៅបរិវេណសិប្បកម្មកែច្នៃឈើរបស់ លោកឧកញ៉ាគង់ ក្រឹង ដែលស្ថិតនៅជាព្រំដែន និងជាតំបន់ធ្លាប់មានការដឹកជញ្ជូនឈើឆ្លងកាត់ផងដែរ។

ការចុះត្រួតពិនិត្យកាលណោះ ការរកឃើញបទល្មើសយ៉ាងណានោះ នៅមិនទាន់មានប្រភពព័ត៌មានណាមួយបញ្ជាក់ឲ្យច្បាស់នៅឡើយទេ។លោកឧកញ៉ា គង់ ក្រឹង ព្រមទាំងមនុស្ស៦នាក់ទៀតក្នុងនោះមានទាំងមេកា និងកូន ប្រុសម្នាក់ទៀតផងនោះ ត្រូវបានចូលខ្លួនមកបំភ្លឺតាមលិខិតកោះហៅ បានធ្វើឡើងមានរយះ ពេលពេញ១ថ្ងៃទី១៥ ខែសីហា ។ (សម្រួលដោយ៖ ស្រីណា)