រាជធានីភ្នំពេញ ៖ ក្រសួងពាណិជ្ជកម្មកម្ពុជាបានឲ្យដឹងតាមរយៈអគ្គរដ្ឋទូតម៉ាឡេស៊ីប្រចាំប្រទេសកម្ពុជា ក្នុងជំនួបជាមួយរដ្ឋមន្ត្រីក្រសួងពាណិជ្ជកម្មកម្ពុជា លោកបានបង្ហាញពីការចាប់អារម្មណ៍វិនិយោគរោងចក្រផលិតលីបកង់ និងគ្រឿងបង្គុំនានា ដើម្បីផ្គត់ផ្គង់ដល់ដំណើរការខ្សែចង្វាក់ផលិតកម្មកង់នៅកម្ពុជា សម្រាប់នាំចេញទៅកាន់ទីផ្សារអន្តរជាតិ ។
លោក ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្មកម្ពុជា បានមានប្រសាសន៍ថា ការជួបជាមួយលោកអែលឌីន ហូសៃនី បីន ម៉ូហាម៉េត ហាសស៊ីម (Eldeen Husaini Bin Mohd Hashim)ជាពេលវេលាមួយដ៏សមស្រប គាប់ជួននឹងដំណើរទស្សនកិច្ចរបស់ លោក មូហាធា មូហាម៉ែត នាយករដ្ឋមន្ត្រីម៉ាឡេស៊ី មកប្រទេសកម្ពុជានៅពេលខាងមុខដ៏ខ្លី ។ ម្យ៉ាងវិញទៀត កិច្ចជំនួបនេះបានផ្ដល់ឱកាសសម្រាប់ពិភាក្សា លើការងារសហការក្នុងការបង្កើតរោងចក្រផលិតលីបកង់ និងគ្រឿងបង្គុំដទៃទៀត សម្រាប់ផ្គត់ផ្គង់ ក្នុងវិស័យផលិតទោចក្រយាននៅកម្ពុជា ជាកិច្ចសម្រួលដល់ខ្សែចង្វាក់ផលិតកម្ម ក៏ដូចជាបង្កើតជាលិតផលសរុបក្នុងតំបន់ ក្រោមវិធានប្រភពកំណើតទំនិញ ។
លោក ប៉ាន សូរស័ក្តិ បានចង្អុលបង្ហាញវិស័យទេសចរណ៍ជាវិស័យមានសក្ដានុពលមួយ ព្រមទាំងស្នើសុំឲ្យសហគមន៍ធុរកិច្ចកម្ពុជា និងម៉ាឡេស៊ី ពិនិត្យលទ្ធភាពក្នុងការចុះអនុស្សរណៈយោគយល់គ្នា ដើម្បីពង្រឹងទំនាក់ទំនងធុរកិច្ចរវាងប្រទេសទាំងពីរ ។
ឯកអគ្គរដ្ឋទូតម៉ាឡេស៊ី ប្រចាំប្រទេសកម្ពុជា បានមានប្រសាសន៍ថា ការពង្រីកទំហំពាណិជ្ជកម្មក្នុងតំបន់អាស៊ានពិតជាមានសារៈសំខាន់សម្រាប់សមាជិកអាស៊ានទាំងអស់ ។ ដោយឡែកសម្រាប់កិច្ចសហប្រតិបត្តិការរវាងកម្ពុជា និងម៉ាឡេស៊ី នៅក្នុងដំណើរទស្សនកិច្ចរបស់ ឯកឧត្តមនាយករដ្ឋមន្ត្រីម៉ាឡេស៊ី នាពេលខាងមុខ ភាគីម៉ាឡេស៊ីមានបំណងលើកប្រធានបទនេះ និងប្រធានបទមួយចំនួនទៀត រួមមាន ការពង្រីកទំហំពាណិជ្ជកម្មទ្វេភាគី កិច្ចសហការក្នុងវិស័យហិរញ្ញវត្ថុ និងវិស័យធុរកិច្ចជាដើម ដើម្បីពិភាក្សា ។
លោកបន្តថា កម្ពុជាមានសក្ដានុពលច្រើនណាស់ សម្រាប់ឱ្យវិនិយោគិនម៉ាឡេស៊ី ដាក់ទុនវិនយោគ ហើយម៉ាឡេស៊ី ក៏ធ្លាប់ក្លាយជាអ្នកដាក់ទុនវិនិយោគច្រើនជាងគេនៅកម្ពុជាផងដែរ ។ លោកថា៖« កម្ពុជាមានអ្វីដែលយើងចង់វិនិយោគច្រើន ហើយយើងនឹងពាំនាំនូវឱកាសវិនិយោគល្អ ៗ ដល់វិនិយោគិនម៉ាឡេស៊ី ដើម្បីមកបណ្ដាក់ទុនវិនិយោគ នៅកម្ពុជា ដើម្បីរឹតចំណងមិត្តភាព ការទូត និងពាណិជ្ជកម្ម » ។ លោកបន្តថា ក្នុងអាណត្តិរបស់លោក ជាអគ្គរដ្ឋទូតនៅកម្ពុជា លោកប្ដេជ្ញានឹងធ្វើឱ្យម៉ាឡេស៊ីក្លាយជាអ្នកវិនិយោគលំដាប់កំពូលឡើងវិញនៅពេលឆ្នាំខាងមុខនេះ ។ ហើយអ្វីដែលម៉ាឡេស៊ី ត្រូវធ្វើមុនគេនោះ គឺសិក្សាពីសក្ដានុពលវិនិយោគនៅកម្ពុជា តើថាមានអ្វីដែលអ្នកវិនិយោគម៉ាឡេស៊ី អាចដាក់ទុនវិនិយោគបាន និងបន្ទាប់មកទៀត ត្រូវសិក្សាពីគ្នា ឱ្យយល់ពីគ្នាសិន ។ ក្នុងនោះដែរលោកទូតបានមើលឃើញថាពីឱកាសវិនិយោគច្រើនដែលត្រូវផ្សព្វផ្សាយដល់វិនិយោគិនម៉ាឡេស៊ី មកបណ្ដាក់ទុននៅកម្ពុជានៅពេលឆាប់ៗនេះ ខណៈការតភ្ជាប់រវាងប្រទេសទាំងពីរក៏មានគ្រប់គ្រាន់ហើយ ។
គួរបញ្ជាក់ថា ដោយសារតែទំនាស់ពាណិជ្ជកម្មរវាងអាមេរិក និងចិន បណ្ដាក្រុមហ៊ុនផលិតកង់នៅចិន បាននិងកំពុងងាកទៅរកប្រទេសដែលទទួលការអនុគ្រោះនាំចូលសហរដ្ឋអាមេរិក និងចិន ។ យោងតាមគេ ហទំព័រ Bike-eu ចេញផ្សាយកាលពីចុងខែមិថុនា ថារោងចក្រផលិតកង់នៅចិនប្រមាណពី៥០ទៅ៦០ភាគរយ នឹងអាចផ្លាស់មកកម្ពុជា នៅរយៈពេល៣ឬ៤ឆ្នាំខាងមុខ ។ ហើយបើតាមគេទំព័រដដែលនេះ បានអោយដឹងថា រោងចក្រក្នុងតំបន់សេដ្ឋកិច្ចពិសេសនៅកម្ពុជា ផលិតកង់បានប្រមាណ១,៤លានគ្រឿង ក្នុងឆ្នាំ ២០១៨ ដែលមានទំហំទឹកប្រាក់ប្រមាណ២៨៧លានដុល្លារ ។
ទីផ្សារសំខាន់សម្រាប់ផលិតផលកង់កម្ពុជា គឺមានតែសហភាពអឺរ៉ុបមួយប៉ុណ្ណោះ ដោយឡែកទីផ្សារសហរដ្ឋអាមេរិកវិញ គឺមានទំហំតូចមួយប៉ុណ្ណោះ ។ ម្យ៉ាងទៀត ជាមួយនឹងការមកដល់នៃក្រុមហ៊ុនផលិតកង់ថ្មីៗរបស់ចិន នៅកម្ពុជា សន្ទុះនៃការផលិតនិងនាំចេញរបស់កម្ពុជានឹងមានការផ្លាស់ប្តូរនៅពេលខាងមុខនេះ ៕ កែសម្រួលដោយ ៖សុឃាក់
ចែករំលែកព័តមាននេះ