រាជធានីភ្នំពេញ ៖ សេចក្តីរាយការណ៍ឲ្យដឹងថា កាលពីព្រឹកថ្ងៃទី១៥ សីហា កម្លាំងសមត្ថកិច្ចនាយកដ្ឋានប្រឆាំងបទល្មើសបច្ចេកវិទ្យាក្រសួងមហាផ្ទៃ បានបញ្ជូនជនសង្ស័យម្នាក់ ទៅកាន់សាលាដំបូងរាជធានីភ្នំពេញ ដែលជនសង្ស័យរូបនោះជាប់ពាក់ពន្ធបទល្មើសបង្កេីតគណនីហ្វេសប៊ុកក្លែងក្លាយ ដោយប្រេីរូបលោកមេធាវីចៅ ប៊ុន ហួន ជាមេធាវីស្ម័គ្រចិត្តរបស់សម្តេចតេជោ ហ៊ុន សែន នាយករដ្ឋមន្ត្រី ដេីម្បីឆបោកប្រាក់អ្នកដទៃ ។
ជនសង្ស័យខាងលើ ឈ្មោះ នួន វ៉ា ភេទប្រុស អាយុ៣២ឆ្នាំ ស្នាក់នៅក្នុងសង្កាត់ទឹកថ្លា ខណ្ឌសែនសុខ រាជធានីភ្នំពេញ ។ ដើមចមបណ្តាលឲ្យសមត្តកិច្ចឃាត់ខ្លួនជនសង្ស័យ មុនកើតហេតុជនសង្ស័យបានឆាតទៅឆបោកប្រាក់លើគណនីហ្វេសប៊ុកឈ្មោះ Chumteav kolsokhom Tevi ដែលជាអ្នកមានស្តុកស្តម្ភម្នាក់ ។
ដោយមានជនក្លែងបន្លំឆបោកប្រាក់នោះហើយ ទើបជនរងគ្រោះបានដាក់ពាក្យបណ្តឹងទៅសមត្តកិច្ចនាយកដ្ឋានជំនាញ ដើម្បីឲ្យវែកមុខជនសង្ស័យនាំមកផ្តន្ទាទោសតាមផ្លូវច្បាប់ ។ ដូច្នោះ ជនសង្ស័យ ត្រូវបានសមត្ថកិច្ចនាយកដ្ឋានប្រឆាំងបទល្មើសបច្ចេកវិទ្យា រួមសហការជាមួយអធិការដ្ឋាននគរបាលខណ្ឌសែនសុខ ក្រោមការសម្របសម្រួលពីព្រះរាជរងអមសាលាដំបូងរាជធានីភ្នំពេញ បានធ្វើការឃាត់ខ្លួន កាលពីថ្ងៃទី១៣ ខែសីហា នៅត្រង់ចំណុចផ្លូវឌួងងៀប៣ សង្កាត់ទឹកថ្លា ខណ្ឌសែនសុខ រាជធានីភ្នំពេញ ។
ជនសង្ស័យត្រូវបានជាប់ចោទពីបទបង្កើតគណនីហ្វេសប៊ុកក្លែងក្លាយ ដើម្បីឆបោកជំរិតទារប្រាក់អ្នកដទៃ និងប្រើឈ្មោះថ្នាក់ដឹកនាំជាន់ខ្ពស់ ដើម្បីទៅគំរាមកំហែងយកផលប្រយោជន៍ផ្ទាល់ខ្លួន និងធ្វើឲ្យប៉ះពាល់ដល់កិត្តិយសរបស់ថ្នាក់ដឹកនាំប្រទសថែមទៀតផង ។ សមត្ថកិច្ចឲ្យដឹងថា ក្រោយឃាត់ខ្លួនជនសង្ស័យបានសារភាពនូវទោសកំហុសដែលខ្លួនបានប្រព្រឹត្ត ទើបសមត្តកិច្ចបានរៀបចំសំណុំរឿងបញ្ជូនទៅកាន់សាលាដំបូងរាជធានីភ្នំពេញ ។
លោកឧត្តមសេនីយ៍ឯក ជា ពៅ ប្រធាននាយកដ្ឋានប្រឆាំងបទល្មើសបច្ចេកវិទ្យាតែងតែថ្លែងដាស់តឿនក្រើនរំលឹកដល់ប្រជាពលរដ្ឋទាំងអស់ ដែលប្រើប្រាស់បណ្តាញសង្គមឲ្យមានការប្រុងប្រយ័ត្នក្នុងការទំនាក់ទំនង សន្ទនាជាមួយអ្នកដទៃ ឬមិត្តភក្តិ អ្នកដែលស្គាល់គ្នា ត្រូវបញ្ជាក់ឲ្យច្បាស់មុន និងផ្តល់ព័ត៌មានផ្ទាល់ខ្លួនដូច ជារូបភាពបុគ្គល ដោយការលួងលោមមនោសញ្ចេតនាណាមួយ ឬផ្តល់លុយកាក់ជាថ្នូរ នឹងអ្វីមួយ ចៀសវាងការចាញ់បោក ជនទុច្ចរិតនាំឲ្យបាត់បង់កិត្តិយស សេចក្តីថ្លៃថ្នូរ និងទ្រព្យសម្បត្តិផ្ទាល់ខ្លួនផងដែរ ។ (សម្រួលដោយ៖ស្រីណា)
ចែករំលែកព័តមាននេះ