លោក Jeff Bezos ប្រាប់ពីកត្តាដែលនាំឱ្យជោគជ័យក្នុងអាជីវកម្ម
លោក Jeff Bezos បានចាប់ផ្តើមក្រុមហ៊ុនតម្លៃរាប់ពាន់លានដុល្លារ Amazon ជាកន្លែងលក់សៀវភៅលើអ៊ីនធើណេតមួយនៅឆ្នាំ១៩៩៤ ។ បច្ចុប្បន្ននេះ Amazon មានតម្លៃប្រមាណដល់ទៅ…
លោក Jeff Bezos បានចាប់ផ្តើមក្រុមហ៊ុនតម្លៃរាប់ពាន់លានដុល្លារ Amazon ជាកន្លែងលក់សៀវភៅលើអ៊ីនធើណេតមួយនៅឆ្នាំ១៩៩៤ ។ បច្ចុប្បន្ននេះ Amazon មានតម្លៃប្រមាណដល់ទៅ ៩០០ ពាន់លានដុល្លារលើទីផ្សារ ហើយលោក Bezos ក៏បានក្លាយជាមហាសេដ្ឋីដែលមានទ្រព្យសម្បត្តិច្រើនជាងគេលើពិភពលោកដែរដែលសរុបស្មើ១១៦ពាន់លានដុល្លារ ។
ក្នុងដំណើរជីវិតរបស់លោក លោក Bezos បានរៀនសូត្រពីកត្តាដែលជួយឲ្យមនុស្សជោគជ័យក្នុងអាជីវកម្មដែលមានដូចខាងក្រោមនេះ៖១. ការចូលចិត្ត និងស្រលាញ់អ្វីដែលខ្លួនធ្វើ ៖ មហាសេដ្ឋីជាច្រើនបានខ្វែងគំនិតគ្នាទៅលើការប្រកបអាជីវកម្ម និងការធ្វើអ្វីដែលខ្លួនចូលចិត្ត និងស្រលាញ់ ។ តើការធ្វើអ្វីដែលខ្លួនស្រលាញ់អាចជួយឲ្យអាជីវកម្មអ្នកមានឱកាសជោគជ័យជាងអ្នកដទៃទេ ? លោក Bezos ជឿជាក់ថា វាពិតជាអាចសម្រាប់សហគ្រិន ។
លោកបាននិយាយកាលពីថ្ងៃទី៦ ខែមិថុនា កន្លងមកថា «អ្នកត្រូវតែមានចំណូលចិត្តខ្លះៗលើអ្វីដែលអ្នកចង់អភិវឌ្ឍន៍ និងធ្វើការព្រោះ បើមិនដូច្នេះទេអ្នកនឹងប្រកួតប្រជែងជាមួយអ្នកដែលមានចំណូលចិត្តច្រើនជាងអ្នក ហើយពួកគេនឹងអាចចេញផលិតផល និងសេវាកម្មដែលល្អជាងអ្នក» ។ លោកបានបន្ថែមថា សហគ្រិនគួរតែធ្វើអ្វីដែលមានការជំរុញពីគោលដៅច្បាស់លាស់ មិនមែនពីលុយតែមួយទេ ។
២. ទទួលយកហានិភ័យ និងការបរាជ័យ ៖ លោក Bezos បាននិយាយថា ប្រសិនបើអ្នករកឃើញគំនិតអាជីវកម្មមួយហើយវាមិនមានហានិភ័យទេ… នោះវាប្រហែលជាមានន័យថាមានអ្នកធ្វើវាហើយ… ដូច្នេះអ្នកត្រូវតែមានអ្វីដែលមានហានិភ័យខ្ពស់ ហើយអ្នកត្រូវតែទទួលស្គាល់ថា មានផ្លូវជាច្រើនដែលអាជីវកម្មរបស់អ្នកអាចនឹងបរាជ័យ» ។ លោកបានបន្ថែមថា ទំហំនៃហានិភ័យ និងការបរាជ័យត្រូវតែកើនឡើងតាមទំហំក្រុមហ៊ុន ។
៣. ងាយផ្លាស់ប្តូរគំនិត៖ លោក Bezos បានរៀនសូត្រច្រើនពីការប្រាស្រ័យទាក់ទងជាមួយនឹងមនុស្សដែលមានឥទ្ធិពលធំៗជុំវិញពិភពលោកថា មនុស្សដែលជោគជ័យ គឺជាមនុស្សដែលពូកែស្តាប់ និងពូកែផ្លាស់ប្តូរគំនិត ។ សម្រាប់លោកមនុស្សដែលតែងតែឈ្នះ គឺជាមនុស្សដែលព្យាយាមស្វែងរកជំនឿរបស់ពួកគេ ហើយព្យាយាមស្វែងរកភស្តុតាង ដើម្បីរុញច្រានគំនិតនោះចោល ៕ កែសម្រួលដោយ ៖ សុឃាក់
ចែករំលែកព័តមាននេះ