ខេត្តបាត់ដំបង ៖ សេចក្ដីរាយការណ៍បានឱ្យដឹងថា លំនៅឋានមួយខ្នងត្រូវអគ្គិភ័យលេបត្របាក់អស់គ្មានសល់ កាលពីនៅវេលាម៉ោង៩ព្រឹកថ្ងៃទី១៥ សីហា ស្ថិតនៅចំណុចភូមិបឹងចែង ឃុំស្នឹង ស្រុកបាណន់ ដែលគេសង្ស័យបណ្ដាលមកពីភ្លើងធូប…
ខេត្តបាត់ដំបង ៖ សេចក្ដីរាយការណ៍បានឱ្យដឹងថា លំនៅឋានមួយខ្នងត្រូវអគ្គិភ័យលេបត្របាក់អស់គ្មានសល់ កាលពីនៅវេលាម៉ោង៩ព្រឹកថ្ងៃទី១៥ សីហា ស្ថិតនៅចំណុចភូមិបឹងចែង ឃុំស្នឹង ស្រុកបាណន់ ដែលគេសង្ស័យបណ្ដាលមកពីភ្លើងធូប ដែលម្ចាស់ដុតនៅលើហឹង ។ យោងតាមរបាយការណ៍សមត្ថកិច្ចបានឲ្យដឹងថា លំនៅឋានដែលត្រូវភ្លើងឆេះគ្មានសល់នោះធ្វើពីឈើប្រក់ស័ង្កសីទំហំ៥x៦ម៉ ដែលមានម្ចាស់ឈ្មោះសន នី ភេទប្រុស អាយុ៦២ឆ្នាំ ។ លំនៅឋាននេះ ត្រូវបានភ្លើងឆាបឆេះអស់ទាំងស្រុងតែម្ដង ដែលគេសង្ស័យជាបឋមថា អាចបណ្ដាលមកពីភ្លើងធូប ដែលម្ចាស់ដុតសែននៅក្នុងផ្ទះ ព្រោះជាថ្ងៃសីល ។
សេចក្ដីរាយការណ៍បានបញ្ជាក់ថា មិនត្រឹមតែលេបត្របាក់ផ្ទះសម្បែងទេ សូម្បីទ្រព្យសម្បត្តិនៅក្នុងផ្ទះ ក៏ម្ចាស់ផ្ទះមិនរំដោះបានដែរ ។ បើតាមការបំភ្លឺបឋមពីម្ចាស់ផ្ទះបានប្រាប់ថា គាត់បានដុតធូបចោលនៅលើ
ហឹងខាងក្នុងផ្ទះ ហើយទំនងបណ្ដាលមកពីភ្លើងធូបនោះហើយ ទើបបង្កជាអគ្គិភ័យឆេះផ្ទះគាត់អស់គ្មានសល់នែបនេះ ។
គាត់បានឱ្យដឹងពីទ្រព្យសម្បត្តិដែលខូចខាតរួមមាន គោយន្តកន្ត្រៃ១គ្រឿង, ប្រាក់ខ្មែរ៣.៨លានរៀល រួមទាំងសម្ភារនៅក្នុងផ្ទះជាច្រើនទៀត ដែលគាត់មិនអាចរំដោះបានឡើយ។ សមត្ថកិច្ចបានប្រាប់ថា លំនៅឋាននេះ ត្រូវភ្លើងឆេះអស់ទាំងស្រុង ដែលគ្មានរថយន្តពន្លត់អគ្គិភ័យ ឬអ្នកភូមិជួយបាញ់ទឹក ពន្លត់បានឡើយ ។ (សម្រួលដោយ៖ ស្រីណា)
ចែករំលែកព័តមាននេះ