ខេត្តបាត់ដំបង៖ «ថ្ងៃនេះនិងថ្ងៃស្អែក សូមកុំឱ្យមានគ្រោះថ្នាក់ចរាចរណ៍» ។ នេះជាពាក្យស្លោក ឬជាប្រសាសន៍ដ៏ថ្លៃថ្លារបស់សម្ដេចតេជោ ហ៊ុន សែន ដែលសម្ដេចបានថ្លែងកាលពីប៉ុន្មានឆ្នាំមុន ឱ្យពលរដ្ឋ
ឬមន្ត្រីនានាស្ដាប់ តែត្រូវបានមន្ត្រីនានា និងពលរដ្ឋទូទៅភ្លេចស្ទើរបាត់អស់ទៅហើយ ។ ប៉ុន្តែពេលនេះ ត្រូវបានលោកស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណៈការ និងដឹកជញ្ជួន គាស់កកាយយកមកក្រើនរំលឹកឡើងវិញ ដើម្បីឲ្យពលរដ្ឋចងចាំនៅពាក្យស្លោកនេះ ហើយថែមទាំងដាក់ចេញនូវវិធានការសំខាន់ៗ៣ចំណុច ដើម្បីចៀសវាងនូវគ្រោះថ្នាក់ចរាចរណ៍ឲ្យពលរដ្ឋគោរព និងអនុវត្តទៀតផង ។
លោកស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណៈការ និងដឹកជញ្ជូន បានក្រើនរំលឹកប្រសាសន៍សម្ដេចហ៊ុន សែន ទៅកាន់ពលរដ្ឋរាប់ពាន់នាក់ កាលពីព្រឹកថ្ងៃទី១៤ សីហា ក្នុងពេលដែលលោកអញ្ជើញចូលរួមក្នុងពិធីសម្ភោធដាក់ឲ្យប្រើប្រាសជាផ្លូវការនូវស្ពានចំនួន៥ខ្សែ ដែលធ្វើឡើងនៅក្នុងឃុំចែងមានជ័យ ស្រុកបាណន់ ក្រោមការអញ្ជើញជាអធិបតីសម្ដេចក្រឡាហោម ស ខេង ។
នៅក្នុងពិធីនោះ លោកស៊ុន ចាន់ថុល បានថ្លែងសុន្ទរកថា ដោយបានស្រង់ប្រសាសន៍ដ៏ថ្លៃថ្លារបស់សម្ដេចហ៊ុន សែន ផង យ៉ាងដូច្នេះថា «ខ្ញុំព្រះករណាខ្ញុំ.. សូមសំណូមពរដល់បងប្អូនប្រជាពលរដ្ឋទាំងអស់ សូមឲ្យប្រុងប្រយ័ត្នជាជានិច្ច ក្នុងពេលធ្វើដំណើរតាមដងផ្លូវ ចៀសវាងនូវគ្រោះថ្នាក់ចរាចរណ៍ និងត្រូវចងចាំជាប់ជានិច្ចនូវប្រសាសន៍ដ៏ថ្លៃថ្លារបស់សម្ដេចតេជោ នាយករដ្ឋមន្ត្រី «ថ្ងៃនេះ និងថ្ងៃស្អែក សូមកុំឲ្យមានគ្រោះថ្នាក់ចរាចរណ៍»។
មិនតែប៉ុណ្ណោះ អមជាមួយនឹងការក្រើនរំលឹកឲ្យពលរដ្ឋចងចាំ ពាក្យស្លោក ឬប្រសាសន៍របស់សម្ដេចតេជោ ហ៊ុន សែន ដែលស្ទើរតែគេភ្លេចអស់បាត់ទៅហើយនោះ លោកស៊ុន ចាន់ថុល ក៏បានស្នើឲ្យពលរដ្ឋយកចិត្តទុកដាក់នូវវិធានការ៣ចំណុច ដើម្បីចៀសវាងគ្រោះថ្នាក់ដល់អាយុជីវិត ។ វិធានការទាំង៣ចំណុច ដែលលោកទេសរដ្ឋមន្ត្រី បានសរសេរនៅក្នុងសុន្ទរកថារបស់លោក ហើយបានជម្រុញឲ្យពលរដ្ឋត្រូវតែចងចាំនោះ មានខ្លឹមសារដូច្នេះថា៖
ទី១-អ្នកជិះម៉ូតូត្រូវពាក់មួកសុវត្ថិភាពជាប់ជានិច្ច ទាំងអ្នកបើកបរ និង អ្នករួមដំណើរ។ ទី២- អ្នកជិះយានយន្តត្រូវពាក់ខ្សែក្រវ៉ាត់សុវត្ថិភាព ទាំងអ្នកបើកបរនិងអ្នករួមដំណើរ ។ ចំពោះអ្នកបើកបរមិនត្រូវស្ថិតក្នុងស្ថានភាពស្រវឹង ងងុយដេក ឬបើកបរលើសល្បឿនកំណត់ក្នុងច្បាប់ឡើយ។ ដោយឡែក វិធានការទី៣ លោកស៊ុន ចាន់ថុល ហាក់បានដាក់បន្ទុកទៅលើអ្នកបើកបររថយន្តធុនធ្ងន់ ។ លោកបាននិយាយយ៉ាងដូច្នេះថា «អ្នកបើកបររថយន្តធ្ងន់ ត្រូវគោរពកំរិតទម្ងន់កំណត់ ដែលមានចែងក្នុងច្បាប់។ សូមកុំដឹកទំនិញសំពីងសំពោង និងសូមចងទំនិញឲ្យបានជាប់ល្អ ធានាកុំឲ្យជ្រុះធ្លាក់តាមផ្លូវ»។
លោករដ្ឋមន្ត្រីបានគូសបញ្ជាក់ថា បើយើងយកចិត្តទុកដាក់គោរពឲ្យបាន នូវវិធានការទាំង៣ចំណុចនេះ យើងក៏អាចចៀសផុតពីគ្រោះថ្នាក់ដល់អាយុជីវិតបានដែរ។ ប៉ុន្តែយ៉ាងណា លោកក៏បានថ្លែងក្រើនរំលឹក
ម្ដងជាពីរដង ទៅកាន់ពលរដ្ឋរាប់ពាន់នាក់ ដែលស្ថិតនៅចំពោះមុខលោក កុំឲ្យភ្លេចនូវពាក្យស្លោក ឬប្រសាសន៍របស់សម្ដេចហ៊ុន សែន «ថ្ងៃនេះ និង ថ្ងៃស្អែក សូមកុំឲ្យមានគ្រោះថ្នាក់ចរារចណ៍» ។ (សម្រួលដោយ៖ ស្រីណា)
ចែករំលែកព័តមាននេះ