ព្រះបរមសាស្តាទ្រង់ប្រារព្ធនូវព្រះអនុរុទ្ធត្ថេរ ថ្ងៃមួយព្រះថេរៈបានទៅស្វែងរកសំពត់បង្សុកូល ព្រោះលោកមានចីវរចាស់ដាច់ដាចទាំងអស់ លុះឃើញសំពត់ទិព្វដែលនាងទេពធីតា បានយកមកដាក់កប់នៅលើគំនរសំរាមត្រង់កន្លែងមួយ ទើបលោកទាញជាយសំពត់នោះមក ដោយបង្សុកូលសញ្ញា ហើយយកសំពត់នោះមកធ្វើចីវរប្រើប្រាស់ ។
គ្រានោះ ព្រះសាស្តាព្រមជាមួយព្រះមហាសាវកជាច្រើនទៀតបាននិមន្តទៅជួយធ្វើចីវរព្រះអនុរុទ្ធត្ថេរផងដែរ ។ នៅថ្ងៃនោះពួកមហាជនបាននាំគ្នាមកធ្វើចង្ហាន់ដើម្បីថ្វាយដល់ព្រះពុទ្ធជាម្ចាស់ព្រមទាំព្រះភិក្ខុសង្ឃ ដែលបាននិមន្តមកជួយធ្វើចីវរនោះ រហូតដល់មានភោជនាហារ នៅសេសសល់ជាច្រើន ។
ពួកភិក្ខុទាំងឡាយឃើញយ៉ាងនោះហើយក៏តិះដៀលថា ព្រះអនុរុទ្ធមានបំណងចង់អួតអាងឱ្យអ្នកផងគេដឹងថា ខ្លួនមានញាតិញោមរាប់អានច្រើន ហើយបានឱ្យអ្នកស្រុកយកចង្ហាន់បិណ្ឌបាតមកច្រើនហួសប្រមាណទៀតផង ។
ព្រះសាស្តាទ្រង់ដោះស្រាយនូវពាក្យចោទប្រកាន់របស់ពួកភិក្ខុទាំងនោះឱ្យស្ងប់រម្ងាប់ ដោយ ព្រះអង្កត្រាស់ថា ព្រះខីណាស្រពទាំងឡាយលោកមិនដែលនិយាយពាក្យដែលប្រកបដោយបច្ច័យ ឬលាភសក្ការៈឡើយ ។ (ដោយសាន សារិន)
ចែករំលែកព័តមាននេះ