រាជធានីភ្នំពេញ ៖ នៅទីបំផុតចំណងស្នេហ៍រវាងនាយ ព្រែក និងគូដណ្តឹង ទំនងជាត្រូវបានកាត់ផ្តាច់ហើយ បន្ទាប់អ្នកទាំងពីរបានភ្ជាប់ពាក្យបានប្រមាណជាជិត៣ឆ្នាំមកនេះ ។ ការបង្ហាញតម្រុយពីការបែបបាក់នាពេលនេះបានធ្វើឲ្យមហាជន ជាពិសេសប្រិយមិត្តគាំទ្របានសម្តែងនូវការភ្ញាក់ផ្អើល និងហួសចិត្តយ៉ាងខ្លាំង បន្ទាប់ពីបានឃើញនូវរូបភាពដ៏ផ្អែមល្ហែមរបស់អ្នកទាំងពីរបានបង្ហោះជាបន្តបន្ទាប់នៅតាមហ្វេសប៊ុក។
ជាការកត់សម្គាល់ បើតាមអ្វីដែលគូដណ្តឹងរបស់នាយ ព្រែក បានអះអាងតាមរយៈសារបង្ហោះតាមហ្វេសប៊ុកដែលមានន័យថា ចំណងស្នេហ៍របស់ពួកគេបានឈានដល់ផ្លូវបំបែកហើយ ។
គូដណ្តឹងនាយ ព្រែក ដែលមានឈ្មោះពិត ជា ស្រីតី បានបង្ហោះសារដែលមានខ្លឹមសារថា «កាលដែលត្រឡប់មកប្រើជីវិតម្នាក់ឯង ហើយដើរចេញពីកន្លែងដែលតែងតែធ្វើឱ្យយើងឈឺចាប់ កន្លែងដែលយើងធ្លាប់បានគេមិនផ្ដល់តម្លៃ ទើបយើងដឹងថា ជីវិតរបស់យើងមានន័យបំផុត… ទោះកន្លងមកធ្លាប់ល្ងង់ឆ្អែតឆ្អន់ ក៏មិនបានបន្ទោសខ្លួនឯងចាត់ទុកជាបទពិសោធន៍ ចាត់ទុកជាមេរៀនជីវិត…សំខាន់ពេលនេះមានអារម្មណ៍ធូរស្រាល Single life» ។
ដោយបញ្ជាក់បន្ថែមពីលើសារខាងលើនេះដែរ នាងក៏បានអះអាងប្រាប់មិត្តភក្តិដែលបានជជីកសួររឿងនេះថា «តាំងពីថ្ងៃដែលបងឈានជើងដើរចេញមកដល់ពេលនេះ បងបានប្រាប់ខ្លួនឯងឱ្យទទួលយកជីវិតថ្មី គឺជីវិតម្នាក់ឯងបែបមានក្ដីសុខគ្រប់គ្រាន់ ដូច្នេះវាហួសនឹងសម្រួល ឬលើកលែង ក៏មិនឱ្យខ្លួនឯងត្រលប់ទៅរកកន្លែងឈឺចាប់មួយនោះទៀតដែរអូន» ។
យ៉ាងណាក៏ដោយ ការសម្រេចផ្តាច់ពាក្យនាពេលនេះមិនត្រូវបានគូដណ្តឹងនាយ ព្រែក បញ្ជាក់ឲ្យដឹងពីមូលហេតុច្បាស់លាស់ឡើយ ប៉ុន្តែមានមិត្តភក្តិជាច្រើនបាននាំគ្នាលើកទឹកចិត្តឲ្យនាងមានភាពរឹងមាំជុំវិញរឿងរ៉ាវមួយនេះ ទោះបីជាមានការបង្ហោះជាសាធារណៈបែបនេះពីសំណាក់គូដណ្តឹងក៏ដោយ តែរហូតមកដល់ពេលនេះ កោះសន្តិភាពនៅមិនទាន់អាចស្វែងរកការបកស្រាយណាមួយពីតារាសម្តែងនាយ ព្រែក បាននៅឡើយទេ រហូតមកថ្ងៃទី១៥ ខែសីហា ឆ្នាំ២០១៩នេះ ។
គួររំលឹកថា តារាសម្តែងនាយព្រែក បានភ្ជាប់ពាក្យជាមួយស្រីស្អាតជាកូនអ្នកមានមុខមាត់ម្នាក់នៅឯខេត្តកំពង់ចាមឈ្មោះ ជា ស្រីតី កាលពីដើមខែកញ្ញា ២០១៦ កន្លងទៅ ហើយជារឿយៗអ្នកទាំងពីរតែងតែបង្ហាញរូបភាពផ្អែមល្ហែមជាច្រើននៅក្នុងដំណើរកម្សាន្តទាំងនៅក្នុងស្រុក និងក្រៅស្រុក ៕ (កែសម្រួលដោយ ៖ បុប្ផា)
ចែករំលែកព័តមាននេះ