សម័យបច្ចុប្បន្នគ្មានទេព្រះអរហន្ត គ្មានទេព្រះអរិយបុគ្គល ទាំងអ្នកបួសនិងគ្រហស្ថសុទ្ធតែជាបុថុជ្ជនដូចគ្នា ជាអ្នកជាប់ជំពាក់នូវកិលេសលាភ យស សុខ សរសើរដូចគ្នា គ្រាន់ថាព្រះសង្ឃលោកជាប់ជំពាក់ស្រាលជាងគ្រហស្ថតែប៉ុណ្ណោះ បើទោះជាទាំងពីរភេទនេះមានកិច្ចប្រតិបត្តិផ្សេងគ្នាក៏ដោយ ។
រឿងសុខ សរសើរ និងភាពថ្លៃថ្នូររបស់គ្រហស្ថតាំងនៅបានលុះណាតែបុគ្គលនោះជាអ្នកប្រកបការងារត្រឹមត្រូវ ចិញ្ចឹមជីវិតដោយសម្មាអាជីវោ បណ្តុះចិត្តក្នុងការបរិច្ចាគទាន អប់រំកាយវាចាចិត្តឱ្យប្រព្រឹត្តតែក្នុងអំពើល្អ និងវៀរចាកអំពើអាក្រក់ចោលទាំងអស់ ទើបបាននាមថាជាអ្នករស់នៅដោយកិត្តិយស ជីវិតមានសេចក្តីសុខ ចម្រើនដោយលាភសក្ការៈ ។
ចំណែកបព្វជិតវិញដើម្បីធ្វើឱ្យជីវិតថ្លៃថ្នូរគួរដល់ការខិតខំប្រឹងប្រែងរៀនសូត្រផ្លូវលោក ផ្លូវធម៌ឱ្យច្បាស់លាស់ ប្រតិបត្តិតាមកិច្ចធម៌វិន័យត្រឹមត្រូវ រក្សាសីលបួនឱ្យបរិសុទ្ធ គោរពឱ្យហ្មត់ចត់ ចៀសឱ្យឆ្ងាយពីអនេសនៈ២១ និងបាបធម៌៥ យកវិន័យជាធំក្នុងការប្រតិបត្តិ ធ្វើចិត្តឱ្យផូរផង់ប្រាសចាកអំពើជាអកុសល កាន់ត្រៃសិក្ខាឱ្យបានខ្ជាប់ខ្ជួន សង្រួមនូវឥន្ទ្រិយទាំង៦មានចក្ខុន្ទ្រិយ(សង្រួមភ្នែក)ជាដើម កុំឱ្យលោតកញ្ជ្រោលទៅតាមបច្ចេកវិទ្យាទំនើបបែបបច្ចុប្បន្ន នោះជីវិតរបស់អ្នកបួសនឹងបាននាមថារស់នៅដោយសេចក្តីបរិសុទ្ធ ទាំងបរិបូណ៌ដោយសេចក្តីសុខ ។
នេះជាចំណុចស្នូលដែលនាំឱ្យបានសុខចម្រើននៅក្នុងជីវិតបច្ចុប្បន្ន រស់នៅដោយសេចក្តីថ្លៃថ្នូរនៃជីវិតគ្រួសារ ព្រោះមិនមានកម្មពៀរដល់អ្នកទាំងពួងទាំងឡាយ ។ (ដោយសាន សារិន)
ចែករំលែកព័តមាននេះ