ខេត្តបន្ទាយមានជ័យ៖ កាលពីថ្ងៃអាទិត្យទី១១ ខែសីហា ឆ្នាំ២០១៩ អ្នកភូមិជាច្រើននាក់ បានចូលរួមជាមួយអ្នកជំនាញ នាំគ្នាសម្អាតព្រៃនៅក្នុងបរិវេណប្រាសាទកំពែងព្រាវ ។
ផេកហ្វេសប៊ុកក្រសួងវប្បធម៌ និងវិចិត្រសិល្បៈផ្សាយថាលោកយង់ តាំងកួយ ប្រធានមន្ទីរវប្បធម៌ និងវិចិត្រសិល្បៈខេត្តបន្ទាយមានជ័យ បានដឹកនាំឆ្មាំប្រចាំតំបន់ប្រាសាទបន្ទាយឆ្មារ សហការជាមួយលោក ដា ទឹង ប្រធានក្រុមប្រឹក្សាស្រុកស្វាយចេក, លោកស៊ុត ង៉ុយ អភិបាលរងស្រុកស្វាយចេកនិងលោកស្រីជ្រូក សុកផល មេឃុំស្វាយចេក ព្រមទាំងអាជ្ញាធរមូលដ្ឋាន និងប្រជាពលរដ្ឋភូមិថ្មី, ភូមិស្លែង សម្អាតព្រៃប្រាសាទកំពែងព្រាវនោះដែលស្ថិតនៅភូមិថ្មី ឃុំស្វាយចេក ស្រុកស្វាយចេក។
ទន្ទឹមនោះបានរៀបចំតង្វាយសែនព្រេន ដល់អ្នកមានបារមីនៅថែរក្សាទីនោះ និងជាការគោរពដឹងគុណ ដល់បុព្វបុរសខ្មែរយើងបានសាងប្រាសាទទុកឲ្យមនុស្សជំនាន់ក្រោយ ។
ក្នុងឱកាសនោះលោកប្រធានមន្ទីរវប្បធម៌ និងវិចិត្រសិល្បៈ សុំឲ្យអ្នកភូមិចូលរួមគោរពស្រឡាញ់ និងថែរក្សាប្រាសាទបុរាណ ៕ (កែសម្រួលដោយ ៖ បុប្ផា)
ចែករំលែកព័តមាននេះ