រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា បុរសម្នាក់ត្រូវគេដេញវាយកាប់សម្លាប់ បណ្តាលឱ្យស្លាប់យ៉ាងអាណោចអាធ័មបង្កឱ្យមានការភ្ញាក់ផ្អើលកាលពីម៉ោង១និង៣០នាទីរំលងអធ្រាត្រឈានចូលថ្ងៃទី១៤ ខែសីហា ឆ្នាំ២០១៩ នៅតាមបណ្ដោយមហាវិថីឈ្នះ ឈ្នះ ហៅផ្លូវទំនុបកប់ស្រូវ ស្ថិតនៅភូមិប្លូរផ្អែម សង្កាត់គោករកា ខណ្ឌព្រែកព្នៅ ។
សេចក្តីរាយការណ៍បន្តថា ជនរងគ្រោះខាងលើនៅមិនទាន់ស្គាល់អត្តសញ្ញាណនៅឡើយ ដោយជិះម៉ូតូម៉ាកហុងដាឌ្រីម ពណ៌ខ្មៅ ឡើងស៊េរី២០១៦ ពាក់ស្លាកលេខភ្នំពេញ 1AE- 5317។
តាមប្រភពពីបុរស និងស្ត្រីលក់ប្រេងនៅតាមផ្លូវជិតកន្លែងកើតហេតុនិយាយថា នៅមុនកើតហេតុ ពួកគាត់លឺសំឡេងស្រែកឱ្យជួយ ហើយឃើញជនសង្ស័យជិះ ម៉ូតូប្រមាណ៤ទៅ៥គ្រឿង ដោយ១គ្រឿងជិះគ្នា២នាក់ៗចេញពីកន្លែងកើតហេតុបន្តគ្នា បើករត់គេចខ្លួនបាត់ ទើបគាត់រត់ទៅប្តឹងសមត្ថកិច្ចឱ្យជួយអន្តរាគមន៍ភ្លាមៗផងដែរ ។
បើតាមប្រភពពីនគរបាលប៉ុស្តិ៍សំរោងក្រោមម្នាក់បញ្ជាក់ប្រាប់ថា នៅមុនកើតហេតុនោះដែរ នៅតាមបណ្ដោយផ្លូវមហាវិថីឈ្នះ ឈ្នះ ហៅផ្លូវទំនុបកប់ស្រូវ ដោយឃើញយុវជនជាច្រើននាក់ម៉ូតូ៤ទៅ៥គ្រឿងជិះដេញគ្នា បន្ទាប់មកយុវជនម្នាក់ខាងលើត្រូវយុវជនមួយក្រុមវាយកាប់សម្លាប់ស្លាប់យ៉ាងអាណោចអាធ័មផងដែរ ។ ខណៈពេលភ្លាមៗនោះដែរ សមត្ថកិច្ចបានរកឃើញម៉ូតូជនរងគ្រោះនៅក្នុងព្រៃដែលមានចម្ងាយពីសពប្រមាណជាង២០ម៉ែត្រ ។
សមត្ថកិច្ចបង្ហើបឲ្យដឹងថា ជនរងគ្រោះបានទៅទិញសាំងនៅក្បែរកន្លែងកើតហេតុ១លីត្រកន្លះយកទៅចាក់ម៉ូតូអស់១លីត្រ ហើយជិះម៉ូតូចេញទៅដោយប្រាប់ថា យកសាំងកន្លះលីត្រនេះទៅឲ្យមិត្តភក្តិដែលជិះម៉ូតូអស់សាំងនៅខាងមុខ ខណៈពេលជិះម៉ូតូចេញទៅដល់កន្លែងកើតហេតុ មិនទាន់បានជួបមិត្តភក្តិផងក៏ត្រូវជនដៃដល់មួយក្រុមព្រួតវាយ កាប់រហូតដេកដួលស្លាប់នៅនឹងកន្លែងកើតហេតុតែម្តង ។
ក្រោយពេលកើតហេតុ សមត្ថកិច្ចនគរបាលប៉ុស្តិ៍គោករកា បានយាមសពរង់ចាំផ្នែកជំនាញ កោសល្យវិច័យពិនិត្យ និងស្រាវជ្រាវរកសាច់ញាតិជនរងគ្រោះផងដែរ។ (កែសម្រួលដោយ ៖ បុប្ផា)
ចែករំលែកព័តមាននេះ