ខេត្តបាត់ដំបង ៖ សម្តេចក្រឡា ហោម ស ខេងឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃបានអះអាងថា ប្រសិនបើមានការផ្តួលរំលំរាជរដ្ឋាភិបាលស្របច្បាប់ នាពេលបច្ចុប្បន្នចោលនោះ ប្រៀបដូចជា…
ខេត្តបាត់ដំបង ៖ សម្តេចក្រឡា ហោម ស ខេងឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃបានអះអាងថា ប្រសិនបើមានការផ្តួលរំលំរាជរដ្ឋាភិបាលស្របច្បាប់ នាពេលបច្ចុប្បន្នចោលនោះ ប្រៀបដូចជា ប្រទេសកម្ពុជាត្រូវរុះរើសាជាថ្មីអីញ្ចឹង ។ ការបញ្ជាក់របស់សម្តេច ស ខេង ខណៈដែលក្រុមប្រឆាំងនៅក្រៅប្រទេសបានកំពុងតែញុះញង់ និងកៀរគរគាំទ្រខ្លួន និងប្រជាពលរដ្ឋ ដើម្បីប្រឆាំងរាជរដ្ឋាភិបាលបច្ចប្បន្ន ។
ជាក់ស្តែងនោះ កាលពីថ្ងៃទី១២ សីហាក្រុមប្រឆាំងនៅប្រទេសជប៉ុនបានធ្វើបាតុកម្ម ដើម្បីប្រកាសមិនទទួលរាជរដ្ឋាភិបាលដែលកំពុងដឹកនាំដោយសម្តេចតេជោ ហ៊ុន សែននោះទេ ។ យ៉ាងណាក្តីសម្តេចក្រឡាហោមស ខេង ថ្លែងក្នុងពិធីសម្ភោធឲ្យប្រើប្រាស់ជាផ្លូវការស្ពាន ច្រាំងចោត ស្ថិតនៅភូមិរូង ឃុំត្បែងមានជ័យ ស្រុកបាណន់ ខេត្តបាត់ដំបង នាព្រឹកថ្ងៃទី១៤ ខែសីហាថា ៖«ស្រុកយើងកំពុងមានសន្តិភាពពេញលេញ អត់មានទ័ពក្រៅច្បាប់ ឬហៅ ថាឧន្ទាមដើម្បីមកធ្វើសង្គ្រាមជាមួយរាជរដ្ឋាភិបាល ដោយកៀរគរកម្លាំងកងទ័ព ឬរើសពីទ័ពពីប្រជាជនទៅច្បាំងទេ ។ នេះជាការជោគជ័យទាំងអស់គ្នា» ។
សម្តេចបានបន្តថា ប្រសិនមកដល់ពេលនេះមិនទាន់មានសុខសន្តិភាព គឺយើងមិនអាចធ្វើអ្វីបាននោះទេ ។ ពិតនៅតំបន់នេះ (បាត់ដំបង) ប៉ុន្តែក្នុងនាមជាអ្នករួមចំណែកដឹកនាំមួយ ខ្ញុំ បានឆ្លងកាត់តំបន់នេះជាច្រើនលើកច្រើនសារ ដើម្បីមកសួរសុខទុក្ខកងទ័ពដែលឈរជើងនៅកន្លែងនេះ ។ ពេលនេះអត់មានសន្តិភាពទេ គឺមានអារម្មណ៍មួយភ័យ ហើយត្រូវប្រយ័ត្ន ប្រយែង ព្រោះខ្លាចគេបាញ់តាមផ្លូវ ប៉ុន្តែមកដល់ពេលនេះយើងមានសន្តិភាពមិនបារម្ភនោះទេ ។ ជាមួយគ្នានោះដែរ សម្តេចស ខេង ក៏បានគូសបញ្ជាក់ថា ៖អីញ្ចឹងទេ យើងនាំគ្នា គិតមើលថា ក្នុងពេលយើងមានសុខសន្តិភាពបែបនេះ យើងគួរនាំគ្នាគិតដើម្បីកសាងជីវភាពរបស់យើងឲ្យសម្បូរសប្បាយ ។ យើងបានសុខហើយ យើងត្រូវនាំគ្នាគិតពីជីវភាព បើមិនដូច្នេះមិនត្រឹមត្រូវទេ អីញ្ចឹងត្រូវខិតខំប្រឹងប្រែងដើម្បីលើកស្ទូយជីវភាពរបស់យើង» ។
សម្តេចស ខេង ក៏អំពាវនាវដល់ប្រជាពលរដ្ឋកុំជឿការឃោសនាអូសទាញពីមជ្ឈដ្ឋានអ្នកនយោបាយខ្លះ (នយោបាយប្រឆាំង) ដែលមានបំណងដើម្បីកៀរគរប្រមែប្រមូលប្រជាពលរដ្ឋដែលគាំទ្រទៅប្រឆាំងរាជរដ្ឋាភិបាលឲ្យសោះ តាមរយៈបាតុកម្ម ឬមហាបាតុកម្មជាដើម ។ សម្តេចបញ្ជាក់ថា ៖«ការធ្វើបាតុកម្មនេះប្រវត្តិសាស្ត្របានព្រមានយើងរួចហើយ គឺរដ្ឋាភិបាលសព្វថ្ងៃ គឺជារដ្ឋាភិបាលកើតចេញពីការបោះឆ្នោតដោយប្រជាពលរដ្ឋជាង៨០% ដោយ គ្មានអំពើហិង្សារបួសស្នាម ឬស្លាប់នោះទេ ។ ហើយមានការទទួលស្គាល់ពីលក្ខណៈអន្តរជាតិ បើទោះបីជាប្រទេសមួយចំនួនមិនបានទទួលស្គាល់ តែប្រទេសច្រើនគេទទួលស្គាល់ ។ ជាក់ស្តែងនោះមកដល់ពេលនេះ កម្ពុជាកំពុងធ្វើទំនាក់ទំនងជាមួយបណ្តាប្រទេសទាំងអស់លើសកលលោក ហើយមិនបានចាត់ទុកប្រទេសណាជាសត្រូវនោះទេ »។
ជាមួយគ្នានោះដែរ សម្តេច សខេង ក៏បានបញ្ជាក់យ៉ាងម៉ឹងម៉ាត់ថា ជំហរនយោបាយរបស់កម្ពុជា គឺស្វាគមន៍មិត្តភក្តិបណ្តាប្រទេសទាំងអស់ នៅលើសកលលោក ដោយមិនប្រកាន់និន្នាការនយោបាយនោះទេ ។ សម្តេចថា ៖«ចង់និយាយថា ប្រទេសនោះប្រកាន់របបនយោបាយលទ្ធិប្រជាធិបតេយ្យសេរីពហុបក្ស ដូចកម្ពុជាក៏យើងស្វាគមន៍ ប្រទេសប្រកាន់របបកុំម្មុយនីសក៏យើងស្វាគមន៍ ។ ព្រោះថា ពេលនេះទំនាក់ទំនងអន្តរជាតិចង់ដូរហើយ ដោយពីមុនប្រទេសមហាអំណាច គឺនយោបាយទំនាក់ទំនងការបរទេសគេពឹងផ្អែកលើមនោគមន៍វិជ្ជារបស់គេ ឯរឿងផ្សេងទៀតគេដូរហើយ ។ គេឥឡូវគេគិតគូររឿងរកស៊ីជាមួយគ្នា ប្រទេសសេរីមកធ្វើសម្ព័ន្ធមិត្តជាមួយប្រទេសកុម្មុយនីសក៏មានដែរ ហើយប្រទេសប្រទេសកុម្មុយនីសយ៉ាងជិតស្និទជាមួយសេរីក៏មាន ដើម្បីផ្លាស់ប្តូរសេដ្ឋកិច្ចក៏មានដែរ» ។ សម្តេចក៏បានអះអាងថា សព្វថ្ងៃនេះរាជរដ្ឋាភិបាលបានកំពុងខិតខំពង្រឹងសន្តិសុខ និងស្ថេរភាព ទំនាក់ទំនងឲ្យកាន់តែរឹងមាំបន្ថែម ៕ កែសម្រួលដោយ ៖ សុឃាក់
បញ្ជាក់ ៖ ស្ពានចំនួន៥ក្នុងខេត្តបាត់ដំបង…បើកឱ្យប្រើប្រាស់ពីថ្ងៃនេះទៅ
ចែករំលែកព័តមាននេះ