ផ្ទះរបស់មនុស្សម្នាក់ៗគឺជាទ្រព្យសម្បត្តិដ៏មានតម្លៃ និងជាការវិនិយោគដ៏សំខាន់មួយផងដែរ ។ ដូច្នេះការសម្រេចចិត្តក្នុងការលក់ផ្ទះ គឺជាការសម្រេចចិត្តដែលយើងគួរតែឲ្យមានការប្រុងប្រយ័ត្ន ។ តើធ្វើដូចម្តេច ដើម្បីដឹងថា វាជាពេលដែលអ្នកគួរតែលក់ផ្ទះអ្នកចេញ? ខាងក្រោមនេះ គឺជាមុខសញ្ញាធំៗដែលអ្នកគួរតែមើល ៖
១. ទីផ្សារអចលនទ្រព្យ៖ មុខសញ្ញាសំខាន់ជាងគេ ដែលប្រាប់ឲ្យអ្នកលក់ផ្ទះចេញ គឺពេលដែលកំពុងមានតម្រូវការខ្ពស់លើទីផ្សារអចលនទ្រព្យ ខណៈដែលមានការផ្គត់ផ្គង់ទាប ។ ទីផ្សារអចលនទ្រព្យកម្ពុជាកំពុងតែពុះកញ្ច្រោល ប៉ុន្តែអ្នកត្រូវអត់ធ្មត់ និងចាំមើលនិន្នាការទីផ្សារឲ្យបានច្បាស់លាស់ ដូច្នេះអ្នកត្រូវតែស្រាវជ្រាវឲ្យបានច្បាស់លាស់ ។ អ្នកគួរតែស៊ើបសួរអ្នកដែលលក់ផ្ទះចេញនៅទីតាំងអ្នក ដើម្បីដឹងពីតម្លៃ និងសង្កេតមើលផ្ទះថ្មីៗដែលកំពុងដាក់លក់លើទីផ្សារផងដែរ ។
២. ពេលដែលសមាជិកគ្រួសាររបស់អ្នកកើនឡើង ៖ ផ្ទះគួរជាទីតាំងដែលផ្តល់កន្លែងគ្រប់គ្រាន់សម្រាប់សមាជិកគ្រប់រូបក្នុងគ្រួសារ ។ ប្រសិនបើអ្នកត្រូវប្រជ្រៀតគ្នារស់នៅក្នុងផ្ទះតូចមួយនោះវាប្រហែលជាមុខសញ្ញាបង្ហាញថា វាដល់ពេលក្នុងការប្តូរផ្ទះហើយ ។ ប៉ុន្តែអ្នកក៏ត្រូវតែគិតពីការចំណាយដែលនឹងមានការផ្លាស់ប្តូរបន្ទាប់ពីអ្នកសម្រេចចិត្តប្តូរផ្ទះផងដែរដូចជា ថ្លៃពន្ធ ថ្លៃធ្វើដំណើរ និងថ្លៃទឹកភ្លើងជាដើម ។
៣. ពេលដែលអ្នកមានគម្រោងច្បាស់លាស់សម្រាប់ជំហានបន្ទាប់ ៖ ប្រសិនបើអ្នកសម្រេចចិត្តលក់ អ្នកក៏ត្រូវត្រៀមខ្លួនសម្រាប់ការទិញលំនៅដ្ឋានថ្មីរបស់អ្នកដែរ ។ តើអ្នកមានថវិកាសន្សំគ្រប់គ្រាន់ក្នុងការវិនិយោគលើលំនៅដ្ឋានថ្មី ឬទេ ? តើអ្នកបានរកឃើញផ្ទះដែលស័ក្កិសមសម្រាប់អ្នក និងគ្រួសារហើយ ឬនៅ ?
អ្នកគួរតែមានគម្រោងការឲ្យបានច្បាស់លាស់ជាមុនសិន មុននឹងធ្វើការសម្រេចចិត្តលក់ផ្ទះព្រោះវាអាចប៉ះពាល់ដល់ជីវភាពរស់នៅរបស់អ្នក ការងារ និងការរៀនសូត្ររបស់សមាជិកក្នុងគ្រួសារផងដែរ ៕ កែសម្រួលដោយ ៖ សុឃាក់
ចែករំលែកព័តមាននេះ