ក្រុងហុងកុង ៖ ព្រលានយន្តហោះក្រុងហុងកុងបានដំណើរការឡើងវិញហើយកាលពីថ្ងៃទី១៣ សីហា ដោយនៅទីនោះមុននេះជើងហោះហើរទាំងអស់ត្រូវលុបចោល ក្រោយពីបាតុករស្និទ្ធលទ្ធិប្រជាធិបតេយ្យច្រើនពាន់នាក់ លើកគ្នាទៅប្រមូលផ្ដុំ នៅមុខកន្លែងភ្ញៀវមកដល់។ ចំណែកក្រុងប៉េកាំងក្នុងសុន្ទរកថាមួយ បានបន្តឹងសំឡេង ដោយនិយាយថាបានឃើញបណ្ដាសញ្ញានៃភេរវកម្ម។
អ្នកនាំពាក្យម្នាក់របស់ព្រលានយន្តហោះប្រកាសនាថ្ងៃទី១៣សីហាថា សកម្មភាពហោះចេញនិងចូលរបស់បណ្ដាយន្តហោះ ដំណើរការឡើងវិញជាបន្តបន្ទាប់។ ទោះបីយ៉ាងណាយោងតាមប៉ូលិសថា បាតុករប្រមាណជា៥០០០នាក់នាថ្ងៃទី១២សីហាបានបន្តចូលដល់ថ្ងៃទី៤ នៃការអង្គុយធ្វើបាតុកម្មដោយសន្តិវិធីក្នុងព្រលានយន្តហោះ ដើម្បីបង្ហាញពីបុព្វហេតុនៃចលនារបស់ពួកគេ។ បាតុករមួយចំនួនបានលើកប៉ង់កាតដែលសរសេរថា ហុងកុងពុំស្ងប់សុខឡើយឬពាក្យថាអាម៉ាស់ទង្វើរបស់ប៉ូលិស។ ពួកគេចោទប្រកាន់ប៉ូលិសថាប្រើអំពើហិង្សាមិនសមស្រប ក្នុងគោលបំណងបង្ក្រាបពួកបាតុករ។
បាតុករបាននាំគ្នាចាកចេញបន្តិចម្ដងៗនាពេលយប់ ដោយគ្មានអន្តរាគមន៍របស់ប៉ូលិស។ នៅសល់តែបាតុករមួយក្ដាប់តូច នៅមានវត្តមានក្នុងព្រលានយន្តហោះ ដែលគេបោសសម្អាតយកចេញបណ្ដាបដានិងប៉ង់កាត តែនៅសល់ការគូសឬសរសេរក្រវេមក្រវ៉ាមនៅលើជញ្ជាំង។ ពួកបាតុករបានប្រកាសពីចេតនារបស់ពួកគេវិលមកកាន់ព្រលានយន្តហោះជាថ្មីនាថ្ងៃទី១៣សីហាទៀត ដើម្បីបន្តចលនាតវ៉ារបស់ពួកគេ។
ការបិទព្រលានយន្តអន្តរជាតិដ៏មមាញឹកទី៨នោះនៃពិភពលោក ដែលមានអ្នកដំណើរដល់ទៅ៧៤លាននាក់ក្នុងឆ្នាំ២០១៨ ជារឿងដ៏កម្របំផុតមួយ។ គេបានសម្រេចបែបនេះកាលពីថ្ងៃទី១២សីហា ពេលដែលរដ្ឋាភិបាលកណ្ដាលចិននិយាយថា បានឃើញសញ្ញានានានៃភេរវកម្ម ក្នុងការតវ៉ាដែលកកូរតំបន់ពាក់កណ្ដាលស្វយ័តនោះ។ សេចក្ដីថ្លែងការណ៍បែបនេះរបស់ចិន កំណត់ពីការកើនឡើងថ្មីនៃវិបត្តិនយោបាយ ដែលកើតមានចាប់ពីដើមខែមិថុនាមក ជាវិបត្តិធ្ងន់ធ្ងរបំផុតមួយពុំធ្លាប់មាន ចាប់តាំងពីការប្រគល់ដែនដីហុងកុងមកឲ្យចិនវិញពីឆ្នាំ១៩៩៧មក៕ (កែសម្រួលដោយ ៖ បុប្ផា)
ចែករំលែកព័តមាននេះ