ខេត្តបាត់ដំបង ៖ យោងតាមព័ត៌មានបឋមបានឱ្យដឹងថា កម្លាំងផ្នែកប្រឆាំងគ្រឿងញៀន នៃអធិការក្រុងបាត់ដំបងបានឃាត់ខ្លួនបុរសម្នាក់ នៅម៉ោង១រសៀលថ្ងៃទី១៣ សីហា នេះ ស្ថិតក្នុងភូមិច្រាបក្រសាំង សង្កាត់វត្តគរ ក្រុងបាត់ដំបង ដែលសង្ស័យមានជាប់ពាក់ព័ន្ធនឹងអំពើជួញដូរគ្រឿងញៀនបំពានច្បាប់
អធិការក្រុងបាត់ដំបង លោកឆាង វណ្ណឆៃ បានឲ្យដឹងថា ជនសង្ស័យឈ្មោះ ជី សាវឿត ភេទប្រុស អាយុ២៥ឆ្នាំ រស់នៅភូមិចែងក្តា ឃុំភ្នំសំពៅ ស្រុកបាណន់ ។ ជននេះ ត្រូវកម្លាំងជំនាញផ្នែកប្រឆាំងគ្រឿងញៀនធ្វើការស្រាវជ្រាវរហូតឈានដល់ការឃាត់ខ្លួនបាន ពេលជននេះកំពុងប្រព្រឹត្តបទលកមើសជាក់ស្ដែង
(កំពុងជួញដូរថ្នាំញៀន) នៅចំណុចខាងលើ។
លោកអធិការបានបញ្ជាក់ថា ជាមួយនឹងការឃាត់ខ្លួននេះ កម្លាំងជំនាញរឹបអូសបានថ្នាំញៀនដែលជាវត្ថុតាងមួយចំនួនផង។ បើយោងតាមរបាយការណ៍បឋមបានឲ្យដឹងថា វត្ថុតាងដែលមន្ត្រីជំនាញដកហូតបានពីជនសង្ស័យមានថ្នាំញៀនដែលសង្ស័យប្រភេទ ICE (ម៉ាទឹកកក) ចំនួន៣ថង់, ម៉ូតូ១គ្រឿង ដែលជាមធ្យោបាយសម្រាប់ប្រព្រឹត្តបទល្មើស និងសម្ភារពាក់ព័ន្ធមួយចំនួនទៀត ។
លោកឆាង វណ្ណឆៃ បានប្រាប់ដែរថា បើតាមចម្លើយបឋម ជននេះបានសារភាពទទួលស្គាល់វត្ថុតាងដែលសមត្ថកិច្ចបានដកហូតនោះហើយ។ ពេលនេះ មន្ត្រីជំនាញកំពុងសួរនាំ ដើម្បីកសាងសំណុំរឿងចាត់ការតាមនីតិវិធី ។ (សម្រួលដោយ៖ស្រីណា)
ចែករំលែកព័តមាននេះ