រាជធានីភ្នំពេញ ៖ កញ្ញា ចន សុទីម៉ា នឹងតំណាងប្រទេសកម្ពុជា ដើម្បីចូលរួមក្នុងការប្រកួតប្រជែងកម្មវិធីបវរកញ្ញាទេសចរណ៍អន្តរជាតិ (Miss Tourism International)…
រាជធានីភ្នំពេញ ៖ កញ្ញា ចន សុទីម៉ា នឹងតំណាងប្រទេសកម្ពុជា ដើម្បីចូលរួមក្នុងការប្រកួតប្រជែងកម្មវិធីបវរកញ្ញាទេសចរណ៍អន្តរជាតិ (Miss Tourism International) ឆ្នាំ ២០១៩ ។ នេះបើយោងតាមការប្រកាសជាផ្លូវការរបស់ស្ថាប័នបវកញ្ញាកម្ពុជា ។
កញ្ញា ចន សុទីម៉ា មានអាយុ២០ឆ្នាំ កម្ពស់១,៧៨ ម៉ែត្រ នឹងតំណាងកម្ពុជាចេញទៅប្រកួតនៅលើឆាកអន្តរជាតិ ហើយគេរំពឹងថា កញ្ញានឹងខិតខំឲ្យអស់ពីសមត្ថភាព បង្ហាញ និងផ្សព្វផ្សាយវប្បធម៌ និងអរិយធម៌ខ្មែរ ហើយអាចដណ្តើមជ័យជំនះជូនកម្ពុជាផងដែរ ។
ការប្រកួតបវរកញ្ញាទេសចរណ៍អន្តរជាតិឆ្នាំ ២០១៩ (The Miss Tourism International 2019) នឹងប្រព្រឹត្តទៅចាប់ពីថ្ងៃទី២២ ខែតុលា ដល់ថ្ងៃទី ១០ ខែវិច្ឆិកា ឆ្នាំ២ ០១៩ ហើយរាត្រីគ្រងមកុដនឹងប្រព្រឹត្តទៅនៅថ្ងៃទី ៨ ខែវិច្ឆិកា ឆ្នាំ២០១៩ នៅសណ្ឋាគារសាន់វ៉េរីសតនិងស្ប៉ាហ្គោលលែនឌឺ ទីក្រុងកូឡាឡាំពួរ ប្រទេសម៉ាឡេស៊ី ដែលមានបេក្ខនារីតំណាងប្រទេសចូលរួមចំនួន ៥០ ប្រទេស ។
ការប្រកួតបវរកញ្ញាទេសចរណ៍អន្តរជាតិនេះ ក៏ជាវេទិកាមួយ ដើម្បីឲ្យបវកញ្ញាប្រចាំប្រទេសនីមួយៗ ស្វែងយល់រៀនសូត្រពីវិស័យទេសចរណ៍ និងវប្បធម៌ពីគ្នាទៅវិញទៅមក ។
កញ្ញា ចន សុទីម៉ា គឺជាបវរកញ្ញាខ្មែរជ័យលាភីទី ៣ ក្នុងកម្មវិធី Miss Universe Cambodia 2019 ដែលបានគ្រងមកុដរងកាលពីថ្មីៗកន្លងទៅនេះ ។
ក្រោយពីបានជាប់ជ័យលាភី កញ្ញា ចន សុទីម៉ា បានអះអាងថា នាងសប្បាយចិត្តជាមួយនឹងលទ្ធផលរបស់ខ្លួន ព្រោះមិននឹកស្មានថាបានជាប់ដល់ចំណាត់ថ្នាក់លេខ៣ បែបនេះនោះទេ ។
បន្ទាប់ពីគ្រងមកុដនេះរួចមក បវរកញ្ញា ចន សុទីម៉ា បានទទួលការចាប់អារម្មណ៍លើរូបសម្រស់ដ៏ស្រស់ស្អាត និងសមត្ថភាពរបស់កញ្ញាយ៉ាងខ្លាំង ។
គួររំឭកថា កម្មវិធីប្រកួតបវកញ្ញាចក្រវាលកម្ពុជា ឆ្នាំ ២០១៩ (Miss Universe Cambodia 2019) ម្ចាស់គ្រងមកុដ គឺបានទៅលើកញ្ញា សំណាង អេលីណា អាយុ១៨ឆ្នាំ មកពីរាជធានីភ្នំពេញ និងចំណាត់ថ្នាក់លេខ២ បានទៅលើកញ្ញា ថោង ម៉ាឡា និងចំណាត់ថ្នាក់លេខ ៣ កញ្ញា ចន សុទីម៉ា ៕ (កែសម្រួលដោយ ៖ បុប្ផា)
ចែករំលែកព័តមាននេះ