ខេត្តប៉ៃលិន ៖ សេចក្តីរាយការណ៍បឋមបានឲ្យដឹងថា ក្រុមនគរបាលដឹកនាំកម្លាំងជំនាញនៃអធិការដ្ឋាននគរបាលស្រុកសាលាក្រៅជាមួយកម្លាំងប៉ុស្ដិ៍នគរបាលរដ្ឋបាលអូរអណ្តូងចុះបង្ក្រាបករណីជួញដូរ និងប្រើប្រាស់នូវសារធាតុញៀនខុសច្បាប់មួយករណី ចាប់ឃាត់ខ្លួនមនុស្សជាច្រើននាក់ ខណៈប្រជាពលរដ្ឋរស់នៅក្នុងភូមិមានការព្រួយបារម្ភយ៉ាងខ្លាំងពីភូមិឃុំមានសុវត្ថិភាព ព្រោះករណីគ្រឿងញៀននៅតែកើតមានគួរឱ្យកត់សម្គាល់ ។
ហេតុការណ៍នេះបានកើតឡើង កាលពីវេលាម៉ោង៤និង០០នាទីរសៀល ថ្ងៃទី១២ ខែសីហានេះនៅចំណុចភូមិកូនភ្នំ ឃុំអូរអណ្តូង ស្រុកសាលាក្រៅ ខេត្តប៉ៃលិន ។ ប្រភពព័ត៌មានបានឱ្យដឹងថា នគរបាលឃាត់ខ្លួនជនសង្ស័យចំនួន០៣នាក់ រួមមានទី១- ឈ្មោះ ឈុន សុភាព ភេទប្រុស អាយុ៤១ឆ្នាំ មុខរបរកសិករ បច្ចុប្បន្នរស់នៅភូមិកូនភ្នំ ឃុំអូរអណ្តូង ស្រុកសាលាក្រៅ ខេត្តប៉ៃលិន (ជួញដូរ និងប្រើប្រាស់) ទី២-ឈ្មោះ ឈូ ណាល់ ភេទប្រុស អាយុ២៧ឆ្នាំ មុខរបរ កសិករ បច្ចុប្បន្នរស់នៅភូមិអូរអិល ឃុំស្ទឹងកាច់ ស្រុកសាលាក្រៅ ខេត្តប៉ៃលិន (ប្រើប្រាស់) ទី៣-ឈ្មោះ ហៀង ហោ ភេទប្រុស អាយុ២៤ឆ្នាំ មុខរបរកសិករ បច្ចុប្បន្នរស់នៅភូមិបឹងព្រលិត ឃុំស្ទឹងកាច់ ស្រុកសាលាក្រៅ ខេត្តប៉ៃលិន (ប្រើប្រាស់) ។
ប្រភពបន្តទៀតថា វត្ថុតាងដែលចាប់យកបានរួមមាន ទី១- ម្សៅក្រាមសថ្លា ដែលសង្ស័យថា ជាសារធាតុញៀនចំនួន០៨កញ្ចប់ (ធំចំនួន០៣កញ្ចប់តូច ចំនួន០៥កញ្ចាប់) ទី២ -ឧបករណ៍ជក់ថ្នាំចំនួន០១ដើម ទី៣-ដែកកេះចំនួន០៥ដើម ទី៤-ជញ្ជីងសម្រាប់ថ្លឹងចំនួន០២គ្រឿង ទី៥- ម៉ូតូចំនួន០២គ្រឿង ។
ពាក់ព័ន្ធនឹងបញ្ហានេះបច្ចុប្បន្នជនសង្ស័យទាំង០៣នាក់ខាងលើត្រូវបាននគរបាលឃាត់ខ្លួននៅអធិការដ្ឋាននគរបាលស្រុកសាលាក្រៅ ដើម្បីរៀបចំកសាងសំណុំរឿងបញ្ជូនទៅតុលាការឱ្យចាត់ការតាមនីតិវិធី ៕ កែសម្រួលដោយ ៖ សុឃាក់
ចែករំលែកព័តមាននេះ