រាជធានីភ្នំពេញ ៖ ព្រឹកថ្ងៃទី១២ ខែសីហាសមត្ថកិច្ចបានយកដីការបស់សាលាដំបូងរាជធានីភ្នំពេញ ទៅបិទនៅរបងផ្ទះលោក សម រង្ស៊ី អតីតប្រធានគណបក្សសង្គ្រោះជាតិ ដែលជាអតីតស្នាក់ការគណបក្សសង្គ្រោះជាតិ ដើម្បីឲ្យលោក…
រាជធានីភ្នំពេញ ៖ ព្រឹកថ្ងៃទី១២ ខែសីហាសមត្ថកិច្ចបានយកដីការបស់សាលាដំបូងរាជធានីភ្នំពេញ ទៅបិទនៅរបងផ្ទះលោក សម រង្ស៊ី អតីតប្រធានគណបក្សសង្គ្រោះជាតិ ដែលជាអតីតស្នាក់ការគណបក្សសង្គ្រោះជាតិ ដើម្បីឲ្យលោក សម រង្សុី ទៅបំភ្លឺជាលើកទី២ នៅថ្ងៃទី២៨ ខែសីហាខាងមុខ តាមបណ្តឹងរបស់ក្រុមមេធាវីសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ។
លោក សេង គឹមឡាក់ តំណាងអយ្យការអមសាលាដំបូងរាជធានីភ្នំពេញ បានចេញដីកាកោះហៅលោក សម រង្ស៊ី ជាលើកទី២ ដើម្បីសាកសួរតាមបណ្តឹងក្រុមមេធាវីសម្តេចក្រឡាហោម ស ខេង នៅថ្ងៃទី២៨ ខែសីហា ឆ្នាំ២០១៩ ។ នេះបើតាមដីកាកោះជាលើកទី២របស់លោកចុះថ្ងៃទី៥ ខែសីហា ដែលបានធ្វើឡើងតាមបណ្តឹងរបស់លោកមេធាវី ពេជ្រ សូរិយា និងលោកមេធាវីចៅ ប៊ុនហួន ហើយត្រូវបានសមត្ថកិច្ចយកទៅបិទនៅមុខអតីតទីស្នាក់ការគណបក្សសង្គ្រោះជាតិ នាព្រឹកថ្ងៃទី១២ ខែសីហា ។
កាលពីថ្ងៃទី១០ ខែកក្កដាកន្លងទៅ សមត្ថកិច្ចនគរបាលក៏បានយកដីកាទៅបិទនៅមុខអតីតទីស្នាក់ការគណបក្សសង្គ្រោះជាតិដែរ ដើម្បីកោះហៅលោក សម រង្ស៊ី ឲ្យចូលខ្លួនទៅឆ្លើយបំភ្លឺនៅថ្ងៃទី៣១ ខែកក្កដា តាមបណ្ដឹងរបស់សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ។
សូមរំឭកថា សម្តេចក្រឡាហោម ស ខេង បានប្តឹងលោក សម រង្ស៊ី ដែលកំពុងនិរទេសខ្លួននៅក្រៅប្រទេស ដែលលោក សម រង្សុី បានចោទថា សម្តេចមានបំណងគាំទ្រលោក ឌី វិជ្ជា កូនប្រសាសម្តេចតេជោនាយករដ្ឋមន្ត្រី ហ៊ុន សែន ដើម្បីសងសឹកសម្តេចតេជោ ពាក់ព័ន្ធនឹងការស្លាប់របស់លោក ហុក ឡុងឌី អតីតអគ្គ
ស្នងការនគរបាលជាតិដែលត្រូវជាឪពុកបង្កើត។
សូមបញ្ជាក់ថា ក្រុមមេធាវីសម្តេចក្រឡាហោម ស ខេង កាលពីថ្ងៃទី២ ខែកក្កដា ឆ្នាំ២០១៩ បានដាក់ពាក្យ បណ្តឹងមួយទៅកាន់សាលាដំបូងរាជធានីភ្នំពេញ ដើម្បីប្តឹងទណ្ឌិត សម រង្ស៊ី មេក្រុមប្រឆាំងនៅក្រៅ ប្រទេសពីបទញុះញង់ឱ្យប្រព្រឹត្តបទឧក្រិដ្ឋជាអាទិ៍ ។ ក្នុងពាក្យបណ្តឹងនេះ សម្តេចក្រឡាហោម ស ខេង បានទាមទារឱ្យតុលាការចាត់ការលោក សម រង្ស៊ី ទៅតាមផ្លូវច្បាប់ឱ្យបានធ្ងន់ធ្ងរបំផុត និងទាមទារសំណងជំងឺចិត្តចំនួន៤ពាន់លានរៀល ប្រហាក់ប្រហែលនឹង១លានដុល្លារអាមេរិក ចំពោះការញុះញង់របស់លោក សម រង្ស៊ី ។
ពាក្យបណ្តឹងរបស់ក្រុមធាវីសម្តេចក្រឡាហោម ស ខេង ធ្វើឡើងបន្ទាប់ពីទណ្ឌិត សម រង្ស៊ីបានបង្ហោះសារលាបពណ៌បំភ្លៃការពិត អំពីរឿងមរណភាពរបស់ លោក ហុក ឡងឌី ។ លោកសម រង្ស៊ី បានមួលបង្កាច់ថា សម្តេចតេជោ ហ៊ុន សែន ជាអ្នកសម្លាប់លោក ហុក ឡងឌី ហើយប្រឌិតទៀតថា ពេលនេះ លោក ឌី វិជ្ជា ដែលជាកូនប្រុសរបស់លោក ហុក ឡងឌី កំពុងរៀបចំផែនការសងសឹក ដោយមានការគាំទ្រពីសម្តេចក្រឡាហោម ស ខេង ។
សម្រាប់បណ្តឹងនេះដែរ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ នៅថ្ងៃទី៨ ខែកក្កដា ឆ្នាំ២០១៩កន្លងមកបានបញ្ជាក់ថា ការដាក់ពាក្យប្តឹងលោក សម រង្ស៊ី មេក្រុមប្រឆាំងជ្រុលនិយមទៅតុលាការនាថ្មីៗនេះ គឺជាបណ្តឹងលើកដំបូងរបស់សម្តេចក្នុង១ឆាកជីវិតនេះ ។
សម្តេចក្រឡាហោមបានបញ្ជាក់ថា ការដាក់ពាក្យប្តឹងទណ្ឌិត សម រង្ស៊ីនេះ គឺជាការដាស់តឿនស្មារតីដល់អ្នកនយោបាយមួយចំនួនឲ្យប្រ កាន់ខ្ជាប់នូវសេចក្តីថ្លៃថ្នូរ សីលធម៌ និងគុណធម៌ ក្នុងវិជ្ជាជីវៈ ចៀសវាងការប្រឌិតព័ត៌មានដើម្បីញុះញង់បំផុសបំផុល ក្នុងចេតនាទុច្ចរិតមួលបង្កាច់ និងបំបែកបំបាក់ ដើម្បីបំពេញគោលបំណងនិងមហិច្ឆតាអគតិរបស់ខ្លួន និងក្រុមខ្លួន ។
រហូតមកដល់ថ្ងៃទី១២ ខែសីហា គេមិនទាន់ឃើញលោក សម រង្ស៊ី បញ្ចេញប្រតិកម្មយ៉ាងណានោះទេ ។ ប៉ុន្តែកន្លងមក អតីតមេបក្សប្រឆាំងរូបនេះបានចោទតុលាការនៅកម្ពុជាថាស្ថិតក្រោមបញ្ជារបស់សម្តេចតេជោ ហ៊ុន សែនទៅវិញ ។កាលពីថ្ងៃទី៣១ ខែកក្កដា លោក សម រង្ស៊ីបានអះអាងថា លោកនឹងវិលត្រឡប់មកកម្ពុជាវិញក្នុងពេលឆាប់ៗនេះ ។ ប៉ុន្តែការលើកឡើងរបស់អតីតមបក្សប្រឆាំងរូបនេះគឺជាច្រើនលើក
មកហើយ រហូតធ្វើឲ្យអ្នកគាំទ្រខ្លួនមួយចំនួននៅក្នុងស្រុកអស់ជំនឿទៅហើយ ៕
ចែករំលែកព័តមាននេះ