ខេត្តស្ទឹងត្រែង ៖ សហគមន៍កសិកម្មឃុំអូរម្រះចំនួន៣ក្រុម បានបង្កើនការដាំដុះក្រូចពោធិ៍សាត់ផ្អែម ដើម្បីនាំចេញទៅកាន់ទីផ្សារប្រកួតប្រជែង ។ ដោយបង្កើនការដាំដុះនោះសហគមន៍បានបង្កើតជាភូមិមួយ ផលិតផលមួយ ហើយរៀបចំឱ្យមានកម្មសិទ្ធបញ្ជាទទួលស្គាល់ពីមន្ទីរពាណិជ្ជកម្ម ដើម្បីចៀសវាងការក្លែងបន្លំពីផលិតផលក្រូចនាំចូល ។
ក្នុងសកម្មភាពបង្ហាញបច្ចេកទេសថែទាំក្រូចពោធិ៍សាត់ នៅភូមិត្បូងខ្លា ឃុំអូរម្រះ ស្រុកសៀមបូក ខេត្តស្ទឹងត្រែងនាថ្មីៗនេះលោកសំ សុខុម ទំទប់ទីមួយឃុំនេះបានបញ្ជាក់ថា ក្រោយពីការគណៈកម្មាធិការស្តាអភិវឌ្ឍន៍វិស័យកសិកម្មជំរុញឱ្យមានភូមិមានផលិតផលមួយ អាជ្ញាធរឃុំ ស្រុកបានបំផុសឱ្យប្រជាពលរដ្ឋរួមគ្នាបង្កើនលារ ដាំដុះក្រូចពោធិ៍សាត់ឱ្យបានច្រើននៅក្នុងសហគមន៍ និងតាមគ្រួសារ ព្រោះដំណាំឈើហូបផ្លែប្រភេទមួយនេះ នៅឃុំអូម្រះ មានកេរ្ត៍ឈ្មោះល្បីស្រាប់ហើយ លោកបានបន្តការផ្សព្វផ្សាយដល់អ្នកដែលមានដីតិចក្តី ច្រើនក្ដី មួយដើមពីរដើមក្ដី យើងដាំជាលក្ខណៈគ្រួសារក្តី ជាចំការក្តី ធ្វើយ៉ាងណាទទួលបានលទ្ធផលទៅតាមលក្ខណៈធម្មជាតិ ។
ស្រី្ត អ៊ុំ វណ្ណ ជាប្រជាកសិករម្នាក់ដាំក្រូចពោធិ៍សាត់ នៅភូមិត្បូងខ្លា ឃុំអូរម្រះ បានគាំទ្រចំពោះគំនិតផ្តួចផ្តើមនេះព្រោះតាំងពីដើមមកអ្នកភូមិនៅក្នុងឃុំនេះដាំគ្រាន់តែបរិភោគប្រចាំគ្រួសារតែប៉ុណ្ណោះ មិនដែលចេះលក់ដូរអ្វីទេ ។ ស្រី្តដដែលនេះបន្តថា ឆ្នាំនេះបានមន្ត្រីកសិកម្ម និងអាជ្ញាធរផ្តល់ពូជជូនដល់ពួកគាត់បន្ថែម ពួកគាត់ពិតជាសប្បាយចិត្ត ហើយនាំគ្នាដាំដុះឱ្យបានច្រើន ព្រោះពេលបានផលសល់ពីបរិភោគអាចលក់ដូរបន្ថែមផង ។ ស្ត្រីរូបនេះបានសម្តែងចេញពីចិត្តថា ខ្ញុំសប្បាយចិត្តពេលឃើញអ្នកភូមិសស្រាក់ស្រស្រាំ ដាំដុះអញ្ចឹង ខ្ញុំមានការត្រេកអរព្រោះការបង្កើនផលដំណាំទាំងនេះបានច្រើនវាអាចទប់ស្កាត់ការនាំផលិតផលពីបរទេស ដែលមិនស្គាល់ប្រភពច្បាស់លាស់ ។
លោកសុង រ៉ាម៉ន មន្ត្រីភ្នាក់ងារកសិកម្មប្រចាំឃុំអូរម្រះ បានយល់ថា នេះជាសកម្មភាពចូលរួមជួយលើកកម្ពស់ផលិតផលក្នុងស្រុកដែលខំដាំដុះម្យ៉ាងទៀតភូមិឃុំយើងក៏មានផលិតផលមួយសម្រាប់បម្រើឱ្យទីផ្សារក្នុងពេលដែលមន្ទីរកសិកម្មកំពុងជំរុញឱ្យមានការដាំដុះដំណាំឈើមូបផ្លែ ។ លោកបន្តថា ពេលដែលប្រជាជនគាត់ដាំក្រូចបានផលយើងខ្ញុំស្រម៉ៃឃើញថា និងមានការបង្ហាញពីផលិតផលដែលមាននៅក្នុងភូមិ អញ្ចឹងក្នុងភូមិមួយ ខ្ញុំគិតថា មានផលិតមួយ គឺមានក្រូចពោធិ៍សាត់ផ្អែមឆ្ងាញ់ ។
សូមបញ្ជាក់ថា ក្រូចពោធិ៍សាត់ឃុំអូរម្រះមានការទទួលស្គាល់ពីមន្ទីរកសិកម្មរុក្ខាប្រមាញ់ និងនេសាទខេត្តបានបង្កើតឡើងជាសហគមន៍នៅឆ្នាំ២០១៧ មានចំនួន៣ក្រុម ក្នុងនោះមានសមាជិកដាំដុះជាង១០០គ្រួសារ នៅភូមិត្បូងខ្លា និងភូមិអូរម្រះ ឃុំអូរម្រះ ស្រុកសៀមបូក ខេត្តស្ទឹងត្រែង៕ កែសម្រួលដោយ ៖ សុឃាក់
ចែករំលែកព័តមាននេះ