លៀង ចាន់ឡា រំភើបរលីងរលោងទឹកភ្នែកចំពោះក្ដីអាណិត
- ភ្នំពេញ
រាជធានីភ្នំពេញ៖ ដោយអាណិតអាសូរចំពោះលៀង ចាន់ឡា ដែលក្រលំបាក កញ្ញាម៉ូលីកា អតីតតារាចម្រៀងផលិតកម្ម Rock បានជួយឧបត្ថម្ភដល់នាង ។ លាង…
រាជធានីភ្នំពេញ៖ ដោយអាណិតអាសូរចំពោះលៀង ចាន់ឡា ដែលក្រលំបាក កញ្ញាម៉ូលីកា អតីតតារាចម្រៀងផលិតកម្ម Rock បានជួយឧបត្ថម្ភដល់នាង ។ លាង ចាន់ឡា ជាបេក្ខនារីក្នុងកម្មវិធី X Factor Cambodia រដូវកាលទី១ ។
កញ្ញាលៀង ចាន់ឡា ទទួលប្រាក់ឧបត្ថម្ភចំនួន៥០០ដុល្លារ កាលពីរសៀលថ្ងៃទី៨ ខែសីហា ២០១៩ នៅហាងរក្សាសម្រស់របស់កញ្ញាម៉ូលីកា ក្នុងសង្កាត់បឹងរាំង ខណ្ឌដូនពេញ រាជធានីភ្នំពេញ ។ គ្រានោះកញ្ញាចាន់ឡា រំភើបស្ទើរស្រក់ទឹកភ្នែក ។
កញ្ញាម៉ូលីកា និយាយថា «ពីដំបូងនាងខ្ញុំគ្រោងជូនតែប្រាក់៥០០ដុល្លារប៉ុណ្ណោះដល់កញ្ញាលៀង ចាន់ឡា តែដោយសារឃើញសភាពគួរឲ្យអាណិតខ្លាំងពេក ទើបថែមអង្ករ២ការុង មី៥កេស និងទឹកផ្លែឈើ៥កេសទៀត ដើម្បីឲ្យគាត់ទុកឲ្យម្ដាយរបស់គាត់ហូប ព្រោះថាពេលនេះឮថា ម្ដាយរបស់ចាន់ឡា ឈឺដាក់សេរ៉ូមនៅផ្ទះ»។
តាមរយៈវីដេអូ Live របស់កញ្ញាម៉ូលីកា ពេលប្រគល់ប្រាក់ ព្រមទាំងអង្ករ មី និងទឹកផ្លែឈើនោះ កញ្ញាលៀង ចាន់ឡា មានអារម្មណ៍រំភើបរហូតចង់រលីងរលោងទឹកភ្នែកព្រោះការឧបត្ថម្ភនេះជាការលើកទឹកចិត្តដល់នាងឲ្យតស៊ូក្នុងឆាកជីវិតថែមទៀត ។
ប្រិយមិត្តជាច្រើនបានសម្ដែងការគាំទ្រតារាចម្រៀងម៉ូលីកា ចំពោះទឹកចិត្តសប្បុរសរបស់នាងដែលជួយដល់កញ្ញាលៀង ចាន់ឡា នៅពេលដែលនាងកំពុងតែជួបការលំបាកផ្នែកជីវភាព ហើយពេលឡើងប្រលងចម្រៀងស្លៀកពាក់ហាក់ពុំបានសមរម្យ ។
អតីតតារាចម្រៀងផលិតកម្ម Rock កញ្ញាម៉ូលីកា បានប្រកាស ភ្លាមៗថា នាងនឹងផ្ដល់ប្រាក់ចំនួន៥០០ដុល្លារដល់កញ្ញាលៀង ចាន់ឡា នៅពេលដែលផ្ទុះឡើងនូវការអាណិតអាសូរពីមហាជនតាមហ្វេសប៊ុក ព្រោះតែនាងក្រ និងគ្មានសម្លៀកបំពាក់តុបតែងខ្លួនសមរម្យដូចគេ ។
លាង ចាន់ឡា ជាក្មេងស្រីវ័យ១៧ឆ្នាំជីវិតហែលឆ្លងដោយការលំបាក ។ ដើម្បីជីវភាពនាងត្រូវរ៉ាប់រងការងារច្រើនតាំងពីស៊ីឈ្នួលបោកខោអាវឲ្យគេ លាងចានគុយទាវ ធ្វើស្រែ លក់នំ ព្រមទាំងធ្លាប់ទៅធ្វើការនៅម៉ាឡេស៊ី ទៀតផង ។ នាងលំបាក តែមិនចុះចាញ់ទេ គឺខំពុះពារជាមួយម្តាយមេម៉ាយ បន្ទាប់ពីឳពុកស្លាប់ទៅ ៕ (កែសម្រួលដោយ ៖ បុប្ផា)
ចែករំលែកព័តមាននេះ