ប្រទេសយេម៉ែន ៖ អារ៉ាប៊ីសាអូឌីតកាលពីថ្ងៃទី១១សីហាបានវាយប្រហារក្នុងទីក្រុងអាដេនភាគខាងត្បូងយេម៉ែន ប្រឆាំងពួកបំបែកខ្លួននិយម ដែលធ្លាប់តែជាសម្ព័ន្ធមិត្តក្រោយការប្រយុទ្ធគ្នានានាដែលបណ្ដាលឲ្យមនុស្សស្លាប់៤០នាក់រួចហើយ និងញ៉ាំងឲ្យប្រទេសនោះធ្លាក់ក្នុងសង្គ្រាមកាន់តែច្របូកច្របល់ថែមទៀត។
អ.ស.បដែលសម្ដែងការព្រួយបារម្ភចំពោះភាពធ្ងន់ធ្ងរនៃវិបត្តិមនុស្សធម៌នៅយេម៉ែន ប្រកាសពីតុល្យការនៃមនុស្សស្លាប់ថា មាន៤០នាក់និងរបួស២៦០នាក់ ក្នុងនោះមានជនស៊ីវិលច្រើននាក់។ ការប្រយុទ្ធគ្នារវាងពួកបំបែកខ្លួននិយមដែលទាមទារឯករាជ្យភាពនៅយេម៉ែនខាងត្បូងនិងកងកម្លាំងរបស់រដ្ឋាភិបាលគាំទ្រដោយអារ៉ាប៊ីសាអូឌីត បានផ្ទុះឡើងពីថ្ងៃទី៧សីហាមក ក្នុងទីក្រុងអាដេនជាអតីតរដ្ឋធានីយេម៉ែនខាងត្បូង។ ក្រៅពីការប្រយុទ្ធរវាងគ្នាឯងសង្ក្រាមនៅប្រទេសនេះ បន្ថែមសង្គ្រាមសំខាន់ចាប់តាំងពី៥ឆ្នាំមកហើយរវាងពួកឧទ្ទាមស៊ីអុីតហ៊ូធីគាំទ្រដោយអុីរ៉ង់ និងរដ្ឋាភិបាលគាំទ្រដោយក្រុមចម្រុះយោធាមួយនាំមុខដោយអារ៉ាប៊ីសាអូឌីត។
នាថ្ងៃទី១១សីហាក្រុមចម្រុះនោះបានធ្វើការវាយប្រហារប្រឆាំងពួកបំបែកខ្លួន ដែលដណ្ដើមកាន់កាប់វិមានប្រធានាធិបតីក្រុងអាដេននិងបន្ទាយ៣ទៀត។ រដ្ឋាភិបាលយេម៉ែនចាត់ទុកសកម្មភាពនោះរបស់ពួកបំបែកខ្លួនថា ជារដ្ឋប្រហារមួយ។ ទោះបីយ៉ាងណាប្រធានាធិបតីយេម៉ែន លោកABD RABBO MANSOUR HADIរស់នៅឯអារ៉ាប៊ីសាអូឌីត ហើយការដណ្ដើមយកវិមានប្រធានាធិបតីគ្រាន់តែជានិមិត្តរូប។ ក្រុងអាដេនជារដ្ឋធានីបណ្ដោះអាសន្ន ចាប់តាំងពីពួកហ៊ូធី ដណ្ដើមកាន់កាប់ដែនដីដ៏ធំ ក្នុងនោះមានទាំងរដ្ឋធានីសាណាចាប់តាំងពីជិត៥ឆ្នាំមកហើយ។
សភាពការណ៍នៅយេម៉ែនជាចំណុចសំខាន់នៃការពិភាក្សាគ្នាកាលពីថ្ងៃទី១១សីហា នៅទីក្រុងឡាម៉ិករវាងព្រះមហាក្សត្រអារាំប៊ីសាអ៊ូឌីតSALMANE និងប្រធានាធិបតីយេម៉ែនលោកHADI ៕ (កែសម្រួលដោយ ៖ បុប្ផា)
ចែករំលែកព័តមាននេះ