ខេត្តឧត្តរមានជ័យ ៖ បុរសម្នាក់បានត្រូវនគរបាលឃាត់ខ្លួន ខណៈតាំងខ្លួនជាគ្រូពេទ្យដើរព្យាបាលជំងឺអ្នកភូមិ និងបណ្តាលឱ្យស្ត្រីម្នាក់ស្លាប់កាលពីវេលាម៉ោង៧និង៤៥នាទីយប់ថ្ងៃទី ១០ ខែសីហា ដែលហេតុការណ៍នេះកើតឡើងនៅភូមិជ្រឹងខាងលិច សង្កាត់កូនគ្រៀល ក្រុងសំរោង ។ ស្ត្រីរងគ្រោះឈ្មោះ ឈូក ម៉ៅ អាយុ២៤ឆ្នាំ ចំណែកគ្រូពេទ្យត្បាញអាយនេះឈ្មោះ ស្រឿង ប៊ុនរិទ្ធ អាយុ៦១ឆ្នាំ ទាំងអស់គ្នារស់នៅក្នុង ភូមិសង្កាត់ខាងលើជាមួយគ្នា ។
ឪពុកម្តាយស្ត្រីរងគ្រោះបានឱ្យដឹងថា មុនពេលកើតហេតុ កូនស្រីរបស់គាត់សង្ស័យមានជំងឺទាស់សរសៃ ហើយពួកគាត់ឪពុកម្តាយក៏ហៅពេទ្យមកមើល ។ ពេលពេទ្យមកដល់បានដាក់សេរ៉ូមឱ្យ រហូតដល់វេលាម៉ោងប្រមាណ៤ល្ងាចទើបអស់សេរ៉ូម ។ លុះដល់វេលាម៉ោង៦ល្ងាចថ្ងៃដដែល ពេទ្យរូបនេះបានឱ្យថ្នាំគ្រាប់លេបបន្តគឺថ្នាំGlugoseនិងថ្នាំVitamin Becomplex ។ ក្រោយពីបានលេបរួចមក នៅវេលាម៉ោង៧និង៤៥នាទីយប់ ស្រាប់តែកូនស្រីគាត់ប្រកាច់ស្លាប់តែម្តង ។
ទាក់ទិននឹងព័តមាននេះ លោកប្រធានមន្ទីរសុខាភិបាលខេត្ត បានឱ្យដឹងថា ក្រោយពីបានទទួលព័តមានថា មានពេទ្យព្យាបាលអ្នកជំងឺស្លាប់នោះ លោកបានបញ្ជូនក្រុមគ្រូពេទ្យដោយសហការជាមួយកងកម្លាំងនគរបាលចុះទៅដល់កន្លែងកើតហេតុតាមដានពិនិត្យជនរងគ្រោះ និងការប្រើប្រាសថ្នាំគឺខុសបច្ចេកទេសរបស់គ្រូពេទ្យបណ្តាលឱ្យអ្នកជំងឺស្លាប់ ព្រោះមិនអាចប្រើប្រាស់ថ្នាំGlugose និងVitamin Becomplex ដែលមានសារធាតុបេអងលើសចំណុះបណ្តាលឱ្យប្រតិកម្ម និងធ្វើឱ្យជាតិស្ករឡើងខ្លាំង ។
លោកប្រធានមន្ទីរបញ្ជាក់ថា ពេទ្យត្បាញអាយដែលតាំងខ្លួនប្រកបរបរចាក់ថ្នាំតាមភូមិរូបនេះ ពុំមានសញ្ញាបត្របញ្ជាក់ថាមានវិជ្ជាជីវ: ជាពេទ្យនោះទេ និងក៏ពុំមានអាជ្ញាប័ណ្ណពីក្រសួង ឬពីមន្ទីរសុខាភិបាលដែរ ។ មន្ត្រីនគរបាលខេត្តបានឱ្យដឹងថា យោងតាមពាក្យបណ្តឹងរបស់ឪពុកម្តាយស្ត្រីរងគ្រោះដោយមាការសម្របសម្រួលពីលោក កូយ កាន់យ៉ា ព្រះរាជអាជ្ញាអមសាលាដំបូងខេត្ត សមត្ថកិច្ចបានទៅឃាត់ខ្លួនជនសង្ស័យឈ្មោះ ស្រឿង ប៊ុនរិទ្ធ នាវេលាម៉ោង១២និង៣០នាទីរំលងអធ្រាត្រឈានចូលថ្ងៃទី១១ ខែសីហា នាំមកស្នងការដ្ឋាននគបាលខេត្ត ធ្វើការសាកសួរនិងកសាងសំណុំរឿងបញ្ជូនទៅសាលាដំបូងចាត់ការតាមនីតិវិធី ។
ស្ថានភាពបែបនេះតែងកើតមាននៅតាមតំបន់ជនបទ ហើយក៏លំបាកនឹងទប់ស្កាត់ដែរព្រោះប្រជាពលរដ្ឋយើងនៅតែយកសេវាព្យាបាលជំងឺបែបនេះតទៅទៀត ដោយសារតែមិនចង់ទៅមន្ទីរពេទ្យព្រោះត្រូវចំណាយអស់ប្រាក់ច្រើន ដូចជាករណីនេះជាដើមតើកំហុសអ្នកណា? កំហុសពេទ្យអត់សញ្ញាបត្រឬកំហុសគ្រួសារអ្នកជំងឺ ? យើងគិតថា បើនាំគ្នាឈប់រកសេវាព្យាបាលបែបនេះតទៅទៀត ប្រហែលជាគ្មានបញ្ហាបែបនេះកើតឡើងទេ ៕
ចែករំលែកព័តមាននេះ