ខេត្តកំពត ៖ ទំនប់ទឹកប្រឡាក់ក្រឡាដ៏ធំ ដែលជាកន្លែងស្តុកទឹក និងជារមណីយដ្ឋានទេសចរណ៍ ស្ថិតនៅភូមិកូនសត្វ ឃុំកូនសត្វ ស្រុកទឹកឈូ បានបាក់កាលពីវេលាម៉ោង៨ព្រឹកថ្ងៃទី១១ ខែសីហា ។ ក្រោយពីការបាក់ទំនប់ទឹកនេះភ្លាម ទឹកបានហូរបាចសាចធ្វើឱ្យលំនៅឋានប្រជាពលរដ្ឋនិងផ្លូវលំមួយចំនួនត្រូវជន់លិច។
លោករដ្ឋមន្ត្រី លឹម គានហោ ក៏បានទៅពិនិត្យជាក់ស្ដែងនៅកន្លែងកើតហេតុ ។
លោក នាក់ សុវណ្ណារី អភិបាលស្រុកទឹកឈូបានឱ្យដឹងកាលពីព្រឹកថ្ងៃទី១១ ខែសីហាថា បន្ទាប់ពីទំនប់បាន
បាក់ លោកបានប្រកាសប្រាប់ដល់ពលរដ្ឋដែលមានលំនៅឋានកៀកនឹងទំនប់ឱ្យមានការប្រុងប្រយ័ត្ន បង្ការក្រែងមានគ្រោះថ្នាក់ជាយថាហេតុ។ លោកបានឱ្យដឹងថា ទំនប់ដែលចាក់បេតុងនោះមានប្រវែងប្រមាណ១០០ម៉ែត្រ និងបាក់៧ទៅ៨ម៉ែត្រ ប៉ុន្តែអាចនឹងបាក់បន្ថែមទៀត ។
លោក ជឹង ផល្លា ប្រធានក្រុមប្រឹក្សាខេត្តដែលបានចុះពិនិត្យដែរនោះ បានប្រាប់អ្នកយកព័ត៌មានថា ការបាក់ទំនប់នេះក៏ត្រូវបានលោករដ្ឋមន្ត្រីមកពិនិត្យផលប៉ះពាល់ច្រើនដូចជា ផ្ទះសម្បែង និងផ្លូវនានាត្រូវរងការខូចខាត ។ ឥឡូវនេះ ក្រុមការងារមានខាងមន្ទីរធនធានទឹក និងមន្ទីរសាធារណការខេត្ត បាននាំយកគ្រឿងចក្រមកកាន់ទីនេះដើម្បីទប់ទំនប់ដែលបាក់នោះវិញ ។
ស្ថានភាពជំនន់ទឹកភ្លៀងនិងការបើកទ្វារទឹកពីវារីអគ្គិសនីកំចាយបន្ទាប់ពីមានភ្លៀងធ្លាក់ជាបន្តបន្ទាប់អស់
រយៈពេលជាច្រើនថ្ងៃនាដើមខែសីហានេះ ធ្វើឱ្យមានជំនន់ទឹកភ្លៀងលិចលង់ប៉ះពាល់ដល់ផលដំណាំលំនៅឋាន ផ្ទះសម្បែង និងជីវភាពរស់នៅរបស់ប្រជាពលរដ្ឋក្នុងតំបន់ខ្លះៗក្នុងស្រុកទឹកឈូនិងក្រុងកំពត ។ ផ្ដើមចេញកង្វល់ និងការយកចិត្តទុកដាក់ខ្ពស់ចំពោះសុខទុក្ខរបស់បងប្អូនប្រជាពលរដ្ឋនោះ រយៈពេលពេញមួយថ្ងៃទី១០ ខែសីហា លោក ជាវ តាយ អភិបាលខេត្ត និងលោក ជឹង ផល្លា ប្រធានក្រុមប្រឹក្សាខេត្ត រួមជាមួយនឹងមន្ត្រីមូលដ្ឋាន និងថ្នាក់ដឹកនាំមន្ទីរ អង្គភាពមួយចំនួនក្នុងខេត្ត បានចុះជួបផ្ទាល់ជាមួយប្រជាពលរដ្ឋ និងពិនិត្យស្ថានភាពទឹក ក្នុងនោះមាននៅភូមិអណ្ដូងជីម៉ឺន ភូមិកំពង់គ្រែង ឃុំកំពងគ្រែង ព្រមទាំងតាមភូមិសាស្ត្រដងព្រែកកំចាយនៃស្រុកទឹកឈូនិងភូមិស្វាយធំ ភូមិក្រាំងនៃ សង្កាត់ក្រាំងអំពិលក្រុងកំពត ។
លោក ជាវ តាយ មានប្រសាសន៍សំណេះសំណាលថា ដោយផ្ដើមចេញពីកង្វល់និងមានការជំរុញយកចិត្តទុកដាក់ខ្ពស់ពីថ្នាក់ដឹកនាំ ពិសេសសម្ដេចតេជោនាយករដ្ឋមន្ត្រី ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ចំពោះសុខទុក្ខរបស់បងប្អូនប្រជាពលរដ្ឋ នៅពេលជួបគ្រោះមហន្តរាយ ក៏ដូចបញ្ហាផ្សេងៗ ក្នុងនាមលោក ប៉ែន សុីម៉ន ប្រធានក្រុមការងារចុះជួយខេត្តកំពត និងក្នុងនាមគណៈអភិបាល និងក្រុមប្រឹក្សានៃរដ្ឋបាលខេត្តកំពត លោកបានសម្តែងការចូលរួមនូវក្ដីទុក្ខលំបាកជាមួយបងប្អូនប្រជាពលរដ្ឋដែលទទួលរងនូវផលប៉ះពាល់ដោយជំនន់ទឹកភ្លៀងនាពេលនេះ ។
លោក ជាវ តាយ ថ្លែងថា បញ្ហាគ្រោះមហន្ត រាយគឺយើងមិនអាចកំណត់បានឡើយ ប៉ុន្តែបញ្ហាសំខាន់គឺរាជរដ្ឋាភិបាល ក៏ដូចអាជ្ញាធរមានសមត្ថកិច្ចគ្រប់លំដាប់ថ្នាក់ និងប្រជាពលរដ្ឋទាំងអស់ត្រូវតែចូលរួមតាមរយៈយន្តការ ឬវិធានការនានា ដើម្បីបង្ការទប់ស្កាត់និងដោះស្រាយសង្គ្រោះអាយុជីវិតមនុស្ស ឱ្យបានទាន់ពេលវេលានិងមានប្រសិទ្ធភាពជាការចាំបាច់ ។ នាឱកាសនោះ លោកអភិបាលខេត្តក៏បាននាំយកនូវអំណោយមាន មី និងអង្ករ ព្រមទាំងថវិកាមួយចំនួនដើម្បីជួយប្រជាពលរដ្ឋក្នុងដំណាក់កាលបន្ទាន់ផង
ដែរ ។
តាមការឱ្យដឹងពីអាជ្ញាធរ គិតត្រឹមថ្ងៃទី១០ ខែសីហា នៅស្រុកទឹកឈូមានឃុំ៣ ដែលកំពុងប្រឈមប៉ះពាល់ដោយជំនន់ទឹកភ្លៀងគឺ ឃុំកំពង់គ្រែង ឃុំស្ទឹងកែវ និងឃុំព្រៃឃ្មុំ ។ ឯក្រុងកំពតក៏មានផលប៉ះពាល់តិចឬច្រើននៅសង្កាត់ទាំង៥ផងដែរ ។ ស្ថានភាពជំនន់ទឹកភ្លៀងនៅភូមិសាស្ត្រក្រុងកំពត និងស្រុកទឹកឈូ ក្រោយពីមានភ្លៀងធ្លាក់ពេញមួយយប់ថ្ងៃទី៩ ខែសីហា លាយឡំនឹងខ្យល់កន្ត្រាក់ តាមការពិនិត្យស្ថានភាពទឹកជាក់ស្តែង គឺផ្លូវជាច្រើនខ្សែក្នុងក្រុងកំពតរងការជន់លិច ជាពិសេសផ្លូវជុំវិញផ្សារសាមគ្គីទីរួមខេត្ត ។ ឯលំនៅឋាននៅតាមដងព្រែកកំពត ក្នុងភូមិម៉ាក់ប្រាង្គ ឃុំកំពង់គ្រែង ស្រុកទឹកឈូ កាលពីល្ងាចថ្ងៃទី៩
ខែសីហា ក៏រងការលិចលង់មួយចំនួនដែរ ។
លុះមកដល់ម៉ោង៧និង៣០នាទីព្រឹកថ្ងទី១១ ខែសីហា ទឹកបានស្រក់អស់វិញហើយ ប៉ុន្តែនៅកន្លែងលក់ដូរក្នុងផ្សារនៅមានទឹកដក់កន្លែងខ្លះៗជាអន្លើ តែក៏មិនរំខានដល់បងប្អូនប្រជាជននិងអាជីវករលក់ដូរដែរ គឺនៅលក់ដូរបានជាធម្មតា ។ ចំណែកទឹកព្រែកកំពង់បាយវិញ ទោះបីក្រុមហ៊ុនស៊ីណូហាយដ្រូ បើកទ្វារទំនប់ដើម្បីបន្ថយកំណើនទឹកស្តុកក្នុងទំនប់វារីអគ្គិសនី ដែលហូរធ្លាក់ពីជួរភ្នំកំចាយដោយសារភ្លៀងខ្លាំងកាលពីយប់ក៏ដោយ ក៏ស្ថានភាពទឹកព្រែកមិនបានឡើងខ្លាំងគួរឲ្យព្រួយបារម្ភដែរ ។ តាមប្រភពព័ត៌មានថា ក្រុមហ៊ុនចិនដែលបើកទ្វារទំនប់នេះបានបន្ថយពី៥មកនៅត្រឹម៤វិញ ធ្វើឱ្យទឹកមិនមានការជន់លិចខ្លាំងនោះទេ ។
មានកត្តាពីរយ៉ាងដែលនាំឲ្យលំនៅឋានជាច្រើនខ្នងត្រូវទឹកជន់លិចស្ទើរតែទាំងស្រុង គឺ៖ ទី១-ចិនបើកទ្វារទំនប់វារីអគ្គិសនី ទឹកអាចហូរតាមដងព្រែកមិនទាន់ក៏ចាល់ឡើងមកទីទំនាបសងខាងដៃព្រែក បណ្តាលឲ្យមានការលិច លំនៅឋានដែលនៅក្បែរដៃព្រែកនិងវាលទំនាបដែលនៅខាងក្រោមទំនប់វារីអគ្គិសនី ។ ទី២-ភ្លៀងហូរពីភ្នំធ្លាក់ខ្លាំងពីឃុំស្ទឹងកែវ តាមបណ្តោយដៃព្រែកកំពត ដែលបំបែកពីស្ទឹងកែវ មកប្រសព្វគ្នានឹងព្រែកកំពតដែរ ទើបអាចហូរតាមព្រែកមិនទាន់ ធ្វើឲ្យទឹកចាល់ឡើងទីទួលនិងវាលទំនាបក្នុងភូមិមួយចំនួនដូចជាភូមិម៉ាក់ប្រាង្គ ភូមិអណ្តូងជីម៉ឺន ភូមិមាត់ពាម ក្នុងឃុំកំពង់គ្រែង ស្រុកទឹកឈូ និងភូមិមួយចំនួន ទៀតដូចជាភូមិបឹងតារោង ក្នុងឃុំព្រៃឃ្មុំ ស្រុកទឹកឈូ ដែលមានព្រំប្រទល់ជាប់នឹងឃុំកំពង់គ្រែងដែរ ៕ (សម្រួលដោយ៖ ស្រីណា)
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ