ដាំត្នោត៣០០០០គ្រាប់តាមបណ្តោយសងខាងផ្លូវខ្សែក្រវ៉ាត់ព្រំដែនកម្ពុជា-ឡាវ
- ស្ទឹងត្រែង
ខេត្តស្ទឹងត្រែង ៖ កាលពីថ្ងៃទី១១ ខែសីហានេះ លោកម៉ុម សារឿន អភិបាលនៃគណៈអភិបាល ខេត្តស្ទឹងត្រែង និងប្រធានក្រុមប្រឹក្សាខេត្តលោក ឈាងឡាក់…
ខេត្តស្ទឹងត្រែង ៖ កាលពីថ្ងៃទី១១ ខែសីហានេះ លោកម៉ុម សារឿន អភិបាលនៃគណៈអភិបាល ខេត្តស្ទឹងត្រែង និងប្រធានក្រុមប្រឹក្សាខេត្តលោក ឈាងឡាក់ បានដឹកនាំមន្ត្រីរាជការកងកម្លាំងប្រដាប់អាវុធ សរុបប្រមាណ៥០០នាក់ ដើម្បីចូលរួមដាំដើមត្នោតចំនួន៣០០០០គ្រាប់នៅតាមបណ្តោយសងខាងផ្លូវខ្សែក្រវ៉ាត់ព្រំដែនកម្ពុជា-ឡាវ នៅចាប់ពីបង្គោលព្រំដែនលេខ០៤០ រហូតដល់បង្គោលព្រំដែនលេខ០៤២ ។
បើតាមការឲ្យដឹងលោក ព្រំ ចាន់ថា ប្រធានមន្ទីរអភិវឌ្ឍន៍ជនបទខេត្តស្ទឹងត្រែងបានបញ្ជាក់ថាពិធីដាំដើមត្នោតនេះជាលើកទី២ ហើយដែលមន្ទីរអភិវឌ្ឍន៍ជនបទបានសហការជាមួយរដ្ឋបាលខេត្ត និងមន្ទីរជាច្រើនទៀតរួមគ្នារៀបចំពិធីនេះឡើងដោយបានប្រើប្រាស់គ្រាប់ត្នោតចំនួន ៣០០០០គ្រាប់យកមកដាំនៅតាមបណ្តោយសង់ខាងផ្លូវខ្សែក្រវ៉ាតព្រំដែនកម្ពុជា- ឡាវ ត្រង់ចំណុចបង្គោលព្រំដែនលេខ០៤២ ស្ថិតនៅភូមិសាស្ត្រ ស្រុកបូរីអូរស្វាយសែនជ័យ និងស្រុកសៀមប៉ាង ខេត្តស្ទឹងត្រែង ។
លោក ម៉ុម សារឿន អភិបាលនៃគណៈអភិបាលខេត្តស្ទឹងត្រែងបានលើកឡើងថា ដើមត្នោតជារុក្ខជាតិដែលផ្តល់នូវគុណសម្បត្តិច្រើនយ៉ាងដល់ប្រជាជាតិខ្មែរតាំងពីសម័យបុរាណកាលនិងជានិមិត្តសញ្ញាតំណាងអត្តសញ្ញាណជាតិដួងប្រលឹងជាតិ ដែលប្រជាជនខ្មែរសម្គាល់នូវទេសភាពទឹកដីរបស់ខ្លួនពីបុរាណកាលរហូតមកដល់បច្ចុប្បន្ន ។
លោកអភិបាលខេត្តបានបន្តទៀតថា សកម្មភាពដាំដើមត្នោតនាថ្ងៃនេះ គឺជាសកម្មភាពប្រវត្តិសាស្ត្ររបស់ខេត្តក្នុងការបង្ហាញពីវប្បធម៌ដ៏ផូផង់របស់ជាតិការថែរក្សាអត្តសញ្ញាណជាតិ ដួងប្រលឹងជាតិ ការពារអធិបតេយ្យភាពជាតិ និងបំផុសផ្នត់គំនិតដល់អ្នកជំនាន់ក្រោយឲ្យស្រលាញ់នូវអ្វីដែលជាអត្តសញ្ញាណជាតិ និងដួងព្រលឹងជាតិរបស់ខ្លួន ៕ កែសម្រួលដោយ ៖ សុឃាក់
ចែករំលែកព័តមាននេះ