ខេត្តបាត់ដំបង ៖ លោកប្រាស៊ិត សែនរុងរឿង អគ្គលេខាធិការសារព័ត៌មានអាស៊ានប្រចាំប្រទេសថៃ បានមកចូលរួមបុណ្យសពលោក នួន ជា អតីតមេដឹកនាំខ្មែរក្រហម ដែលត្រូវបានរៀបចំបូជានៅវេលាម៉ោង០៧យប់ថ្ងៃទី៩…
ខេត្តបាត់ដំបង ៖ លោកប្រាស៊ិត សែនរុងរឿង អគ្គលេខាធិការសារព័ត៌មានអាស៊ានប្រចាំប្រទេសថៃ បានមកចូលរួមបុណ្យសពលោក នួន ជា អតីតមេដឹកនាំខ្មែរក្រហម ដែលត្រូវបានរៀបចំបូជានៅវេលាម៉ោង០៧យប់ថ្ងៃទី៩ សីហា ក្នុងបរិវេណវត្តព្រំមរកត ស្ថិតនៅភូមិផ្សារព្រំជើង ឃុំស្ទឹងកាច់ ស្រុកសាលាក្រៅ ។
ក្នុងជំនួបជាមួយភរិយាលោកនួន ជា នោះ លោកប្រាស៊ិត សែនរុងរឿង បានសម្តែងការចូលរួមមរណទុក្ខ ក្នុងពេលនេះ ហើយការដែលមកចូលរួមនាពេលនេះ គឺក្នុងនាមមនោសញ្ចេតនាពីអតីតកាល ដែលធ្លាប់បានធ្វើបុណ្យរួមជាមួយគ្នាជាច្រើនលើកនៅក្នុងប្រទេសថៃ ហើយចំពោះរឿងផ្សេងៗទៀត គឺគ្មានអ្វីដែលជាប់ពាក់ព័ន្ធជាមួយគ្នាឡើយ ។
តាមសង្ឃដីកាពីព្រះសង្ឃនៅវត្តនេះបានឱ្យដឹងថា សពលោក នួន ជា ត្រូវបានរៀបចំធ្វើបុណ្យនៅក្នុងវត្តព្រំមរកត ស្ថិតនៅភូមិផ្សារព្រំជើង ឃុំស្ទឹងកាច់ ស្រុកសាលាក្រៅ ដោយកូនចៅនាំគ្នារៀបចំធ្វើបុណ្យសពក្នុងវត្តខាងលើនេះ តាមបណ្តាំរបស់លោកនួន ជា កាលពីនៅរស់ ដោយប្រាប់ថា ពេលគាត់អស់ជីវិតទៅត្រូវតែយកសពរបស់គាត់មកបូជានៅវត្តនេះ ព្រោះគាត់ធ្វើបុណ្យទាននៅវត្តនេះតាំងពីដើមមក ។
ចំពោះក្រុមគ្រួសារលោកនួន ជា មិនអាចសុំការមានមតិយោបល់ ឬបង្ហាញពីមនោសញ្ចេតនាជាមួយរឿងអ្វីដែលលើសពីបុណ្យសពឡើយ ហើយក៏បានថ្លែងអំណរគុណដល់ជនជាតិថៃ ដែលបានគោរពស្រឡាញ់រាប់អានកន្លងមក និងបានមកចូលរួមនាពេលនេះ តែប៉ុណ្ណោះ ។
គួររំលឹកថា អតីតមេដឹកនាំរបបខ្មែរក្រហម លោក នួន ជា អាយុ៩៣ឆ្នាំ បានទទួលមរណភាពកាលពីល្ងាចថ្ងៃទី៤ ខែសីហា ឆ្នាំ២០១៩ នៅមន្ទីរពេទ្យមិត្តភាពខ្មែរ-សូវៀត ហើយត្រូវបានរៀបចំបូជាសពបង្ហើយបុណ្យក្នុងវេលាយប់នេះ ។ (សម្រួលដោយ៖ ស្រីណា)
ចែករំលែកព័តមាននេះ