ខេត្តបាត់ដំបង ៖ សេចក្តីរាយការណ៍បឋមបានឲ្យដឹងថា កម្ពស់ទឹកនៅបាត់ដំបងមានការកើនឡើងកម្ពស់១៣ម៉ែត្រជិតដល់ទីប្រកាសអាសន្ន ដោយរដ្ឋបាលបានត្រៀមកម្លាំងគ្រប់ទីកន្លែងតាមតំបន់ងាយរងគ្រោះ ដើម្បីចុះជួយប្រជាពលរដ្ឋដែលជួបការលំបាក វេលាព្រឹកថ្ងៃទី១១ ខែសីហានេះ ។
យោងតាមប្រភពព័ត៌មានពីក្រសួងធនធានទឹក និងឧតុនិយមបានឲ្យដឹងថា នៅថៃ្ងទី១០ ខែសីហានេះ ដោយមានភ្លៀងពីល្ងាចខ្លាំងនៅប៉ែកខាងលើស្រុកសំឡូតជាប់ព្រំដែនប្រទេសថៃ បណ្តាលឲ្យទឹកនៅចំណុចសំណង់ពហុបំណងសេកសកទឹកឡើងខ្លាំង ក្រសួងបានបើកទ្វារទឹកបន្ធូរស្ថានភាពទឹកធ្លាក់ចុះក្រោម ។ ដូចនេះនៅវេលារសៀលថ្ងៃទី១០ ខែសីហានេះទឹកនៅស្ទឹងសង្កែទីរួមខេត្តបាត់ដំបង កម្ពស់ទឹកនឹងឡើងខ្ពស់ សូមបងប្អូនមានការប្រុងប្រយ័ត្ន ដែលទឹកនៅតាមដងស្ទឹងសង្កែអាចជន់ឡើងវេលាយប់នេះ និងព្រឹកស្អែក ។
សាលាខេត្តបាត់ដំបងសូមជម្រាបជូនដំណឹងជូនដល់បងប្អូនប្រជាពលរដ្ឋដែលរស់នៅតាមបណ្តោយមាត់ស្ទឹងសង្កែទាំងអស់ឲ្យបានជ្រាបថា នៅថៃ្ងទី១០ ខែសីហានេះ ដោយមានភ្លៀងធ្លាក់ខ្លាំងនៅប៉ែកខាងលើស្រុកសំឡូតជាប់ព្រំដែនប្រទេសថៃ បណ្តាលឲ្យទឹកនៅអាងស្តុកទឹកទំបន់ពហុបំណងសេកសកទឹកឡើងខ្លាំង ដូច្នេះមន្ទីរធនធានទឹក និងឧតុនិយមខេត្តបាត់ដំបង នឹងបើកទ្វារទឹកបន្ធូរស្ថានភាពទឹកតាមស្ទឹងសង្កែ ដូច្នេះនៅល្ងាច ឬយប់នោះទឹកនៅក្នុងស្ទឹងសង្កែទីរួមខេត្តបាត់ដំបងកម្ពស់ទឹកនឹងកើនឡើងខ្ពស់ អាស្រ័យដូចនេះសូមបងប្អូនមេត្តាមានការប្រុងប្រយត្ន័ខ្ពស់ ។
ក្នុងនោះការជូនដំណឹងរបស់ស្នងការដ្ឋាននគរបាលខេត្តបាត់ដំបង នៅវេលាព្រឹកថ្ងៃទី១១ ខែ សីហានេះម៉ោង៩និង៣០នាទីនេះ ស្ថានភាពទឹកនៅសំណង់ស្ទាក់ទឹក (កង្ហត) ស្រុកបាណន់ ទឹកនៅមានកម្ពស់ខ្ពស់ ហើយលំនៅដ្ឋានខ្លះរបស់ប្រជាពលរដ្ឋនៅភូមិកំពង់ស្រម៉ ឃុំឈើទាល ស្រុកបាណន់ទឹកស្ទឹងសង្កែបានហូរចូលដល់លំនៅដ្ឋានមួយចំនួនជាបណ្តើរៗហើយ ដោយឡែកព័ត៌មានពីស្រុកសំឡូត ស្ថានភាពនៅពេលនេះមេឃនៅបន្តរលឹម បើទោះបីទឹកនៅពហុបំណង (សេកសក) មានកម្រិតថយចុះក៏ដោយ ។
លោកចាន់ សំបូរ ប្រធានមន្ទីរសាធារណការ និងដឹកជញ្ជូនខេត្តបាត់ដំបងបានបញ្ជាក់ថា កម្ពស់ទឹកវេលាម៉ោង១១និង០០ថ្ងៃត្រង់នេះបានឡើងកម្ពស់ដល់១៣ម៉ែត្រ លើសពីព្រឹកមិញតែ១២,៨៥ម៉ែត្រ លោកកំពុងត្រៀមគ្រឿងចក្រប្រចាំការតាមស្ពានថ្មឆ្លងស្ទឹងក្នុងក្រុងបាត់ដំបង ដើម្បីរើកកាយបញ្ចៀសគល់ឈើធំដែលអណ្តែតមកប៉ះជាប់នៅតាមគ្រប់សរសរស្ពាន ដើម្បីចៀសវាងយថាហេតុនៃការកើតឡើងណាមួយដែលយើងត្រូវប្រយ័ត្នជាមុន ។
លោកឧត្តមសេនីយ៍ទោ អ៊ុច សុខុន ស្នងការនគរបាលខេត្តបាត់ដំបងបានថ្លែងថា កម្លាំងនគរបាលជាង១០០នាក់ បានចេញត្រៀមជាស្រេចតាមព្រែកនានា និងនែនាំតាមស្រុកមួយចំនួន ដើម្បីត្រៀមកម្លាំងអន្តរាគមន៍ចុះជួយប្រជាពលរដ្ឋគ្រប់ពេលវេលា ហើយការតាមដានរបស់ប៉ូលិសនៅតាមតំបន់ស្រុកខាងលើក្បាលស្ទឹងបានរាយការណ៍មកផងដែរថា ថ្ងៃត្រង់នេះទឹកនៅខាងលើមានការស្រកចុះ ។
លោកងួន រតនៈ អភិបាលខេត្តបាត់ដំបងបានផ្តល់ដំណឹងទៅមន្ត្រីយោធភូមិភាគទី៥ ដែលមានលោកឧត្តមសេនីយ៍ត្រី ហៀង រ័ត្ន ដើម្បីត្រៀមទូកអូបរចុះតាមព្រែកមួយចំនួនរងចាំជួយសង្គ្រោះប្រជាជនសំខាន់មនុស្សចាស់ដែលជួបការលំបាកមករកទីទួលមានសុវត្ថិភាព ៕ កែសម្រួលដោយ ៖ សុឃាក់
ចែករំលែកព័តមាននេះ