ខេត្តឧត្តរមានជ័យ ៖ បើតាមសេចក្តីរាយការណ៍បឋមបានឱ្យដឹងថា បុរសម្នាក់ត្រូវបានប៉ូលិសឃាត់ខ្លួន ខណៈតាំងខ្លួនជាគ្រូពេទ្យដើរព្យាបាលជំងឺក្នុងភូមិ បណ្តាលឱ្យស្ត្រីម្នាក់ស្លាប់បាត់បង់ជីវិតកាលពីម៉ោង៧និង៤៥នាទីយប់ ថ្ងៃទី១០ ខែសីហា ឆ្នាំ២០១៩ ស្ថិតនៅក្នុងភូមិជ្រឹងខាងលិច សង្កាត់កូនគ្រៀល ក្រុងសំរោង ខេត្តឧត្តរមានជ័យ។
សេចក្តីរាយការណ៍បន្តថា ស្ត្រីរងគ្រោះខាងលើឈ្មោះ ឈូក ម៉ៅ អាយុ២៤ឆ្នាំ ចំណែកគ្រូពេទ្យត្បាញអាយនោះឈ្មោះ ស្រឿង ប៊ុនរិទ្ធ អាយុ៦១ឆ្នាំ ទាំង២នាក់រស់នៅក្នុងភូមិ-សង្កាត់កើតហេតុខាងលើ។
បើតាមឪពុកម្តាយបង្កើតស្ត្រីរងគ្រោះបានឱ្យដឹងថា មុនពេលកើតហេតុ កូនស្រីរបស់ខ្លួនដែលគេហៅថា ជំងឺស្ត្រីទាស់សរសៃ ហើយរូបគាត់ជាឪពុកម្តាយបានហៅគ្រូពេទ្យមកមើល ខណៈពេលគ្រូពេទ្យមកដល់ក៏បានបញ្ចូលសេរ៉ូមឱ្យស្ត្រីរងគ្រោះ រហូតដល់ម៉ោងប្រមាណ៤ល្ងាចទើបអស់សេរ៉ូម លុះនៅម៉ោង៦ល្ងាចក្នុងថ្ងៃដដែល គ្រូពេទ្យរូបនេះបានឱ្យថ្នាំគ្រាប់លេបបន្តទៀត ដោយប្រើប្រាស់ថ្នាំ Glugose និងថ្នាំ Vitamin Becomplex ក្រោយពីបានលេបរួចមក លុះនៅម៉ោង៧និង៤៥នាទីយប់ ស្ត្រីរងគ្រោះស្រាប់តែប្រកាច់ដាច់ខ្យល់ស្លាប់បាត់បង់ជីវិតតែម្តង ។
ទាក់ទិននឹងព័ត៌មាននេះ លោកប្រធានមន្ទីរសុខាភិបាលខេត្តបានឱ្យដឹងថា ក្រោយពីបានទទួលនូវព័ត៌មានថា មានគ្រូពេទ្យព្យាបាលអ្នកជំងឺស្លាប់បាត់បង់ជីវិតនោះ លោកបានបញ្ជូនក្រុមគ្រូពេទ្យជំនាញ និងមានសហការជាមួយកងកម្លាំងប៉ូលិសចុះទៅដល់កន្លែងកើតហេតុតាមដានពិនិត្យជនរងគ្រោះ និងការប្រើប្រាស់ថ្នាំ គឺខុសបច្ចេកទេសរបស់គ្រូពេទ្យ ទើបបណ្តាលឱ្យអ្នកជំងឺស្លាប់ ខណៈមិនអាចប្រើប្រាស់ថ្នាំ Glugose និង Vitamin Becomplex ដែលមានសារធាតុបេអងលើសចំណុះទេ ដែលបណ្តាលឱ្យមានប្រត្តិកម្ម និងធ្វើឱ្យជាតិស្ករឡើងខ្លាំងខ្ពស់។
លោកបានបញ្ជាក់ថា គ្រូពេទ្យត្បាញអាយ ដែលតាំងខ្លួនប្រកបមុខរបរចាក់ថ្នាំតាមភូមិរូបនេះ ពុំមានសញ្ញាបត្រ័បញ្ជាក់ថា មានវិជ្ជាជីវ:ជាពេទ្យនោះទេ និងពុំមានអាជ្ញាបណ្ណ័ពីក្រសួង ឬពីមន្ទីរសុខាភិបាលនោះផងដែរ។ (កែសម្រួលដោយ ៖ បុប្ផា)
ចែករំលែកព័តមាននេះ